وەرن با ئێمەش‌ هونەرمەندانە بژین

وەرن با ئێمەش‌ هونەرمەندانە بژین

ن/ ئاواز نەجم
تیری ناڕەزایەتیت بۆ ڕۆتین و كاری دووبارەو تاقەتپڕووكێنی ڕۆژ مەهاێژە و بێئاگایانە بیانوو بە خانوو و ماڵ و پیشە و ئۆتۆمبێل و مۆبیلیات و كەرەستەی نێوماڵەكەت مەگرە!.
كار هەركارە ، لە دیرۆك و لەئێستادا مرۆڤ و كارو ماندوویی دوالیزمەیەكی دانەبڕاوبوون.
پێشینانیش چەند هێندەی مە ماندوو و شەكەت بوون ، لێ ئەوەی ئەوانی جوداكردووەتەوە لە ئێمە شتێكی دیكەیـە ، چەندی سروشت و دۆخەكە دۆست و دەستبار نیـن، ئاوەز و سەلیقەی خۆشمان بڕی پێینەكردووە؛ .
ئەوان زاهیدانە ژیاون و پێكوتە و دژەتەنی ڕۆتینیان دۆزیبووەوە ، لەوە فامیبوون كە جەستە وشك و دزێو ڕەقهەڵاتووەكەی خەم كوێی دێشێ ، قەیناخی شیعر و بەیت و ئاواز و هونەریان لەدژی داسی تیژو هەمیشە دەمەزەردی واقیع پۆشیبوو ، بەو هەموو سەختی و نەهامەتەییەوە ڕۆژی حەوت بـار شوكرانەی كار و نان و زەوادی خودایان دەكرد!.
حەكیمانە بە گیراوەی شادابی و كەنین ڕەسیبوون!.
گۆرانی هەرەوەزیی عانی دروێنەو گەرمەچڕینێكی وەختی دۆینەنانەوەی ژنگەل و سۆز و هۆرەی جوانكەو بێری و لاوانی دێ، نەیاندەهێشت ئەو شـانۆ بچووك و تەریكەی ژیان بێ دەنگ و تۆن و میوزیك بێ!
باڕەی كاریلەو زرینگەی زەنگۆڵەی ئێوارانی ڕانەمەڕو ویرغە و سمكۆڵانی ئەسپ ، قریوەی زیقاوڵە و سوڕلی و هاژەی پۆڕ ، زڕەی سوێسكە و ڕەوە كوڕكوڕ عانی گەرمێن و كوێستان ، یەكپارچە گوزەرەكەی دەكردە سەمفۆیایەكی خودایی.. . بۆچی بیمارخانەو گەرد وگرێ وگۆڵی دەروونی دەیانوێرا بێژن لەل!.
ئەوان بە لایڤ و زیندە هونەرمەندانە دەژیـان، دیرۆكی وان پڕ لە بۆیە و خاسەڕەنگ و هونەر بوو، تەنسیق و یەكرەنگیی بەشی پیرو پەككەوتەو بەتەمەنەكان بوو، هەر لە پۆشاكیی كیژۆڵەیەكی دێدا هونەری سینی و تارانی و تەورێزی و ئەستانبوڵی شەڕیان بوو.
میوزیك و هونەر چووبووە كەلوێر و كەلەبەری گشت پنتێكی ئەو دونیا چكۆلەیەوە، لەبری سیرامیك و زینە نەنكم بە چەپكێ گوڵەگەنمی سروشت میوانەكەی نەخشاندبوو!.
ئەدی ئێمە چی...؟!
"چڵە ڕێحانەی دوورە دێراویـن
سازی ناسازی هەڵپەسێراویــن"
دوور لەسروشت و سەرچاوەی ئارامی و خۆراكی ڕۆحیـن؛ بەردەرگاكە ئاوپەرژێن دەكەین و دەروونمان وشك و برینگ! چڵك و چەوری دەوری و پێخۆرەكان دەشۆین و جێگەو ڕایەخەكە گسك دەدەین و لەولاشەوە دڵمان گەردو غوباری دنیای لەسەر نیشتووە!.
هۆرنی ئۆتۆمبێل و هاڕەی مۆلیدە و فڕكەی ماتۆڕ و هەرای تیڤی و شاشە هەراسانیان كردووین و ناتوانیـن بە چەورەســانی میوزیك و بەچەشەی ئەدەب وهونەر و ئەم خوانە كورتخایەنە ڕابخەین!
وەرن با هونەرمەندانە بژین و زاهیدانە چێژ لە كار و ماندوویەتی ناڕەحەتـی ببەین ، مەهێڵن بێدەنگ و بێ ڕەنگ و هونەر ئەم شانۆ تەمەنكورتە بەجێبهێڵن، تا دەنگ لەگەرووتدایە بئاخڤە، تا بیستنت بڕی ژێ و تۆنەكان دەكات گوێ ڕادێرە، تا بیناییت دەگاتە حەناسیی جوانی تەماشـاكه و ڕابمێنە...
لێ ئـامێری تەوقیتكراو و بێ ڕۆح مەبـە.

زۆرترین بینراو