وەهمی هەڵوەشاندنەوەی كیانی كوردستان

د. زیرەك عەبدولڵا

قەوارەی سیاسی هەرێمی كوردستان، لە بنەچەدا بووێكە وابەستەی كەسێك، توێژێك، گرووپێك، پارتێكی سیاسی نییە، بەڵكو پەیوەستە بەتەواوی كۆمەڵگە، واتا موڵكی كۆمەڵگەیە.
بە گەڕانەوە بۆ مێژوو بەئاسانی دەبینرێت، كە ئەو كیانە لەلایەن هەموو چین و توێژ و پێكهاتێكی كوردستانەوە خەباتی بۆ كراوە، خوێنی بۆ دراوە، پارێزراوە و گەشەی پێدراوە. هەر چەندە لە ئێستادا بێكەموكوری و كێشە نییە، بەلام بێسوودی ماددی و مەعنەویش نییە. لەلایەنی ئەخلاقییەوە ئەو قەوارەیە چەندە پێوەست بێت بەوانەی لە ژیاندان، ئەوەندەش پێوەستە بە خوێنی رژاوی پێشمەرگە قارەمانەكان و بنەماڵەكانیان، پێوەستە بە گوندی وێرانكراو و شاری كیمیابارانكراو، پێوەستە بەمێژووی ئەو نەتەوە و پێكهاتانەی لەسەری دەژین.

"لەلایەنی ئەخلاقییەوە ئەو قەوارەیە چەندە پێوەست بێت بەوانەی لە ژیاندان، ئەوەندەش پێوەستە بە خوێنی رژاوی پێشمەرگە قارەمانەكان و بنەماڵەكانیان"

ئەو كیانە لە گێتیدا بریتییە لە ناوبانگی كورد، بوونی كوردی پێوە پێوەستە. قسەكردن لەسەر مان و نەمانی ئەو كیانە، قسەكردنە لەسەر مان و نەمانی كورد خۆی. تۆ لەشێوەدا هەر مرۆڤبە، كاتێك پانتاییەكی جوگرافی تایبەت بە خۆت نەبێت، كە تیایدا براكسیسی ژیان، سرووت، نۆرم و ترادیسیۆنەكانت بكەی، ئیدی لەبەردەم كێشەیەكی گەورەی مرۆڤبووندای، ئەوە كوردانی پارچەكانیتر دەبینین لە چ رەوشێك و لە ژێر چ ستەمێكدا ژیان دەكەن. كوردبوونیان بەسە بۆ ئەوەی بەهەموو شێوەیەك بێرێزیان لەبەرانبەرادا بكرێت، دەستبەسەر بكرێن، لەسێدار بدرێن. ئەوان لە كەمترین ماف كە خوێندنە بەزمانی دایك بێبەشن، لە دامەزراوەكان، لە بۆنەكان تەنانەت ناتوانن بەزمانی دایكیان گوزارشت لە بۆچوونەكانیان بكەن. ئایا ئەمە بەهۆی چییەوەیە؟

 

" هەڵوەشاندنەوەی كیانی سیاسی و ئیداری هەرێمی كوردستان، تەنها ژاوەژاوێكی بەرنامە بۆدارێژراوی بێبەهایە، لەلایەن گرووپێك كە پاڵپشتی لە ئیران وەردەگرن"


هەرێمی كوردستان كیانێكی بە دەستوور دانپیانراوە، پالپشتی یاسایی هەیە، هیچ لایەنێك ناتوانێت ئەو هەرێمە هەڵبوەشێنێتەوە، تەنها ئەوكاتە نەبێت كە دەستور بگۆرێت، ئەگەر ئەمە لەسەر كاغەزیش بكرێت، دیسان وەكو دیفاكتۆر هەرێمی كوردستان هەر دەمێنێت، تا ئەو كاتەی داگیر دەكرێت، بەرجەستەكردنی ئەمەش لە ئامادەیی بەرژەوەندی ولاتانی زلهێز و ئەو گرێبەستە ئابوورییە گەورانەی كراوە، هەروەها بەرگریكردنی قارەمانانەی پێشمەرگە و نیشتیمانپەروەران، پێدەچێت خەون بێت.
هەڵوەشاندنەوەی كیانی سیاسی و ئیداری هەرێمی كوردستان، تەنها ژاوەژاوێكی بەرنامە بۆدارێژراوی بێبەهایە، لەلایەن گرووپێكەوە كە پاڵپشتی لە ئیران وەردەگرن، ئامانج لێی بێبەهاكردنی كوردستان و دزێوكردنی كیانەكەیەتی. لەوانەشە ئامانجی دیكەی هەبێت.

 

" قسەكردن لەسەر پرسی نەهێشتنی قەوارەی كوردستان، خۆبەخۆ قسەكردنە لەسەر پرسی خیانەت بە نیشتیمان"


قسەكردن لەسەر پرسی نەهێشتنی قەوارەی كوردستان، خۆبەخۆ قسەكردنە لەسەر پرسی خیانەت بە نیشتیمان. پێشتر لەوبارەیەوە نووسینمان هەبووە، بەلام چ هۆكارێك وا دەكات بەئاشكرا و بێسڵەمینەوە جاری لەناوبردنی ئەو قەوارەیە لەلایەن ئەو گرووپەوە بدرێت؟ ئایا ئەم رەفتارە بێ پێشینەیە؟ بێگومان نەخێر. لەراستیدا ماوەیەكە بەپلان هەوڵی بەبەهاكردنی دیاردەی خیانەت دەدرێت، هەروەك هەوڵی بێبەهاكردنی نیشتیمان و سیمبولەكان و چارەنووسسی دەدرێت.
برینی مووچە لە بەغدا بۆ مەبەستی چۆكپێدادان و دوورخستنەوەی كوردستان لە بیری ئابووری سەربەخۆ. هزری جولاندنی هێزی سەربازی بەمەبەستی لەناوبردنی قەوارەی كوردستان، هەڵمەتی نەخێر بۆ سەربەخۆیی، ناپاكی 16 ئۆكتۆبەر، ...تاد، هەموو ئەو رەفتارانە لەپێش پرسی (نەهێشتنی قەوارەی كوردستان) بوونیان هەبووە.

 

"ئەوانەی پرسی هەڵوەشاندنەوەی قەوارەی كوردستان دەوروژێنن، بێ هیچ دوودڵیەك بووكەلەیەكن بەدەستی ئاخوندەكانەوە"


ئەوانەی پرسی هەڵوەشاندنەوەی قەوارەی كوردستان دەوروژێنن، بێ هیچ دوودڵیەك دەستی ئیرانیان لە پشتە، ئەوان بووكەلەیەكن بەدەستی ئاخووندەكانەوە. گرنگ نییە بە روخسار لەنێو چ پارت و گرووپێكی سیاسیین، چ بیروباوەر و ئایدیۆلۆژیایەك بەیان دەكەن، گرووپبەندی و رەنگرێژی ناوەكیان هەڵخەڵەتێنەرە، چونكە هەموویان لەبنەمادا سەر بە ئایدیۆلۆژیای دژە كوردستانین. جا مۆتیڤاتسیۆن و بنهۆكەیان هەرچی بێت، دواجار خۆیان لەدژی كوردستان و لە خزمەتی ئاخوندە دۆزیوەتەوە. ئیران لە گۆرەپانی سیاسی كوردستاندا رقوكینە بەرهەمدەهێنێت، ئەمەش دەكاتە چەكێك بۆ بەگژیەكداكردنی پارت و لایەنە سیاسییەكان، لەهەمانكاتیشدا كۆمەكی ئەوانە دەكات كە دژی كوردستانن. دەشێت بڵێین كە ئیران یاریكەرێكی سەرەكییە لە دروستكردنی دوژمن بۆ كوردستان. ئەو قسەیە بۆ توركیاش هەر راستە. بەلام ژینگەی سیاسی و كۆمەڵایەتی و مەعریفی ئامادە لە كوردستان، ژینگەی بەرهەمهێنەری جاش و ناپاكە. بەهۆی بوونی رقوكینەی ئایدیۆلۆژی نێوان لایەنەكان، بوونی گەندەلی و نادادپەروەرییەكی لەرادەبەدەر، رووتێكردنی تاكەكان لە بەها ماددییەكان و بەبەهاكردنی پارە و سامانی ماددی، نەبوونی لێپرسینەوە و دادگاییكردنی ناپاكەكانی دژە كوردستان،..تاد ئیدی ئەو ژینگەیە بۆتە كارگەی بەرهەمهێنانی جاش.
پێدەچێت لە كوردستان خیانەت بووبێتە پیشە، یان مۆدێكی سیاسی. یانیش رێگەیەك بۆ پەیداكردنی پارە و دەستەبەركردنی بەرژەوەندییەكان. بەڵام ئەی كوا رەفتاری دژە خیانەت؟ چۆن سنوور لەپێش ئەو دیاردەیە دادەنرێت؟ دەشێت بۆ ئەم مەبەستە، گرتنەبەری هەر یەكە لە رێگەی (شەرعیەتی شۆرشگیری)، (بەرجەستەكردنی یاسا) و (بێبەهاكردنی خیانەتكردن)، سوودی هەبێت.

 

"پێدەچێت لە كوردستان خیانەت بووبێتە پیشە، یان مۆدێكی سیاسی. یانیش رێگەیەك بۆ پەیداكردنی پارە و دەستەبەركردنی بەرژەوەندییەكان"


لە مێژووی شۆرشگێری كوردیدا، زۆرجار شەرعیەتی شۆرشگیری لەلایەن شۆرشگیرانەوە لە دژی خیانەتكاران پەیرەو كراوە. ئەوە چەندە دڵرەقانە و نامرۆڤانەیە، ئەوەندەش بۆ كاری سیاسی و ئامانجەكانی سوودی هەبووە، ئەم رەفتارە لەشۆرشی گەلانی دونیاشدا بوونی هەیە، چونكە ئامرازی كۆنترۆڵكردن و خۆبەهێزكردنە. با نموونەیەك بهێنینەوە، پەكەكە بە شەرعیەتی شۆرشگیری لەبەرانبەر ئەوانە دەجوولێتەوە كە جاشایەتی بۆ دژەكانیان دەكەن، لەمەدا توانیویەتی كۆنترۆڵی زۆر شت بكات. بەڵام لێرەدا كێشەكە چییە؟ ئەوان لەو كاتەی دوژمنی ناپاكەكانن لە باكوور، ئەوا لە هەمانكاتدا بەشدارێكی چالاك بوون لە پیلانەكانی ئۆكتۆبەر دژی كوردستان. كەواتە كێشەكە ئەو دەبل مۆرالییەیە لە زۆرینەی پارتی سیاسی كوردیدا هەیە، هەر بەتەنها پەكەكە نییە.

 

"كاتێك كوردێك ناپاكی لەنەتەوە و كیانەكەی دەكات، بۆتە چەكێك بۆ بێگانە، ئیدی پێویستە رۆلەكەی دیلیت بكرێت"


من زۆر لەگەل هزری شەرعیەتی شۆرشگیری نیم، بەبەراورد بە رێگەی دووەم كە رێگەی یاساییە، كە دواتر باسی دەكەم، چونكە ئەوەی دووەم مەدەنیتر و سیاسیترە، بەڵام ئەوەش رێگەیەكە لە رێگەكان، كاتێك نەتەوەیەك بە كیمیاباران لە رۆژێكدا 5 هەزار كەس دەكوژرێن، كاتێك بە ئەنفال سەدان هەزار كەسی لەنێو دەبرێت، ئیدی بۆ گرنگە بیر لەلایەنی مرۆیی جاشێك و ناپاكێك بكرێتەوە، كە یارمەتیدەرە بۆ ئەوەی دەستی دوژمن بگاتە گیانی هاوڵاتیانی كورد؟!
كورد لەناوچەیەك دەژیێت، تەواوی وڵاتانی سەردەست دیكتاتۆرن، سڵ لەهیچ رەفتارێكی كۆمەڵكوژی، چەوساندنەوە، جینۆساید و ....تاد ناكەنەوە، بۆ ئەمەش هەموو دژەكانیان دەكەنە ئامانج. ولاتانی وەك توركیا، سوریا، ئیران و ئێراق بۆ چۆنیەتی چەوساندنەوە و كوشتنی كورد كۆبوونەوەی بەردەوام دەكەن. لەسێكتەرە جیاوازەكاندا پلانی جۆراوجۆر دادەرێژن. كوردیش دەبێت وەكو ئەوان بەستراتیژ سیاسەت بكات. بۆ بەهێزبوونی كیانەكەی پێویستە یەكگرتوو یێت، چەكەكانی بەباشی بەكاربهێنێت، لەهەمانكاتدا چەكی دوژمن لەناوبدات. كاتێك كوردێك ناپاكی لەنەتەوە و كیانەكەی دەكات، بۆتە چەكێك بۆ بێگانە، ئیدی پێویستە رۆلەكەی دیلیت بكرێت، بۆ ئەمەش پێویستە بەرێگەی یاسایی رووبەرووی ببیتەوە. پێویستە ناپاكەكان دادگایی بكرێن، بەڵام نابێت پارتە سیاسییەكانی دەسەلات ناپاكەكان بپارێزن، ئەوە نالێم كە پارتەكە خۆی بۆ ناپاكیكردن دروستكرا بێت. ریگەی یاسایی چەكێكی كاریگەرە و پێویستە بیری لێبكرێتەوە، هەر ئەوەندە چەند سیمبولێكی ناپاك و جاشەكان دادگایی بكرێت و سزا بدرێن، ئیدی خۆبەخۆ ئەو دیاردەیە بێبەها دەبێت و كەسانیتر جورئەتی ئەوە ناكەن ببنە جاش و ناپاكی لەنیشتیمانیان بكەن. بەلام بۆچی جاش و ناپاكەكان دادگایی ناكرێن؟ بۆچی ئەو پرسە بەیاسا رێكناخەن؟ بۆچی یاسا هیچ رۆڵێكی لەو پرسەدا نییە؟ لە نەبوونی دادگا و یاسایی سزادانی ناپاكیكردن بەنیشتیمان، مرۆڤ پێویستە گومانێكی قوڵ لە هزری ئیدارەدانی ئەو وڵاتە بكات، گومان لەوانەش بكات باسی سەربەخۆخوازی دەكەن، لەدونیادا ولاتێك و كیانێك نییە بۆ پرسی خیانەت بەنیشتیمان، دادگا و سزای نەبێت، ئەی كوردستان چی؟
رۆشنە كە پارتە سەرەكییە كوردییەكان لەسەردەمی برینی مووچە لەلایەن مالیكییەوە، تاوەكو ئێستا، بوونەتە دوو بەرە، دەشێت ناویان بە بەرەی سەربەخۆخوازی نیشتیمانی و بەرەی خیانەتكاران بنێین. بەڵام دەپرسم بۆچی لە دوای ١٦ ئۆكتۆبەرەوە تا دێت بەرەی نیشتیمانی لە هەڵوێستەكانیان لاوازتر و بەرەی خیانەتیش بەژمارە زۆرتر و لەهەڵوێستەكانیشیان توندتر دەبن؟ ئایا بەرەی نیشتیمانی وەكو پێویست لە ئیدراەدانی یارییەكە شارەزان؟ بێگومان شارەزا نین. جگە لەوە موجامەلەی بەشێك لەخیانەتكارانیش دەكەن. بەلام لەشوێنێكدا وەكو بەرەی دژ نێگەتیڤن بۆ سەر قەوارەی كوردستان. بەرەی نیشتیمانپەروەر لەبەرانبەر پرسی گەندلی دەستەوەستانە، شتێكی ئەوتۆی پێنەكراوە شایانی ئاماژە بۆ كردن بێت، نەیتوانییوە لەدژی گەندەلەكانی نێو خۆیشی هەڵوێست وەربگرێت، لەكاتێكدا پرسی گەندەڵیش بۆخۆی خیانەتە لە نیشتیمان، بەوەی دەست بەسەر سامانی گشتیدا دەگیرێت و تاڵان دەكرێت. نیشتیمانپەروەر نابێت هەر تەنها دژی ئەوانە رەفتار بكات كە دژی قەوارەی كوردستانن، بەڵكو دەبێت دژی ئەو گەندەلانەش بێت كە كوردستان بۆ بەرژەوەندی تایبەت دەدۆشن، دەبنە هۆی ئەوەی هاونیشتیمانی هەست بە نادادپەوەری و نایەكسانی بكات، لەدەرەنجامدا ئامادەی ئەوە بێت دژی نیشتیمانەكەی قسە، یان رەفتار بكات. بەڵام لەبیر نەكەین، بەرەی خیانەت بەپاڵپشتی ژووری ئۆپەراسیۆنی هابەش (فرە لایەن و نەتەوە)ی دژە كورد هێرشی زیاتر دەكەن، ئەوەتە یەكێك مووچە دەبرێت و یەكێكیش هەڵمەتی راگەیاندن دەكات. ئەو یارییە ئەوەندە دژواركراوە، تا ئەو ئاستەی مانەوە و نەمانەوەی قەوارەی كوردستان پێوەستكراوە بە موچەی موچەخۆر.
بەلام ئێمە دەبێت بپرسین, ئایا بەرگریكردنی پارتی لە هەولێر و دهۆك لە ١٦ ئۆكتۆبەردا، بەرگریكردنە لە كوردستان، یان بەرگریكردنە لەبەرژەوەندییە تایبەتییەكانی؟ ئەگەر ئەوەی یەكەمە، ئەوە دەبێت بەرگریكردن لە كوردستان لە ئاستی جیاواز بێت. بەرگریكردن هەر تەنها لەبەرانبەر دوژمنی دەرەكی نییە، بەڵكو دوژمنە ناوەكییەكانیش، ئەوانەی كە لەبەرژەوەندی دوژمنی دەرەكی كاردەكەن، بگرێتەوە. ئەگەر پارتی بۆ مانەوەی قەوارەی كوردستان ئەو كارەی كرد، خۆ مانەوە و بەهێزبوونی قەوارەی كوردستان لەو كارە قەتیس نەماوە، ئیدی هەنگاوی دیكەش پێویستە بگیرێتەبەر. دوای ئەو شەڕە جوامێرییانە پردێ و سەحێلا، ئیدی دەستەوئەژنۆ دابنیشیت و هیچ نەكەیت! ئەمە چۆن دەبێت. ئایا پارتی هەرەشەی گرووپێكی نێو یەكێتی و ئیسلامییەكان و راگەیاندنی شاسوار و ..تاد لەبیر كرد؟ ئەی بۆ دواتر هیچ رەفتارێكی لە دژی راگەیاندنەكانی دژ بە كوردستان نەگرتەبەر؟ گرنگی بوونی راگەیاندنێكی بەناو كورد، كە لەدژی بەرژەوەندی و كیانی كوردستان كار دەكات و دەخوازێت كوردستان داگیر بكرێت، چییە؟ بۆ نابێت دادگایی بكرێن؟ بۆیە لە راستیدا پارتیش بێخەتا نییە. لە قۆستنەوەی هەلەكاندا تێدەگەی سیاسەتكارانی سەربەخۆخوازی كورد كورتبین و بێئیرادەن، چونكە دوای ئەو رووداوانە و بە زیاتر لە ٥٠ كورسی پەرلەمانی و هێزێكی ماددی و مەعنەوی زۆر، تائێستا نەیانتوانیووە رێكارگەلێكی سیاسی و یاسایی لە دژی گرووپێكی ناپاك و دژ بەقەوارەی كوردستان بگرنەبەر. پارتی لەو رەوشەی هەیە خەتابارە، بەچاوپۆشی لە گەندەلەكانی نێوخۆ و جاشەكانی دەرەوە.
ئەوەی ١٦ ئۆكتۆبەر و شەرەكانی بەسەردا هاتبێت، دواتر ٥٠ كورسی پەرلەمانی و زۆرینەی دەسەلاتی هەبێت، بەو شێوەیەش سیاسەت لە دژی جاش و ناپاكەكان بكات، بێگومان شوناسی بێئیرادە و بێپلانی بەخۆی دەدات. ئەگەرنا كوا ژووری پرۆسەكانی دژی جاشەكان و قوتابخانە هزرییەكانیان؟ كوا پلانی بێبەهاكردنی خیانەت لە نیشتیمان؟ كوا دادگایكردن و یاسای سزادانی ناپاكیكردن بە نیشتیمان؟ پارتی لەدوای ١٦ ئۆكتۆبەرەوە چی كردووە؟ هیچ! تەنانەت لە زۆرترین رەفتارە دزێو، دزی، مرۆڤكوژی، تاڵانكارییەكانی ناپاكەكان بێدەنگبوو. بۆ؟ پارتی لەگەڵ بەشێكی زۆر لە جاشەكانی ١٦ ئۆكتۆبەر دانیشت و كێكی حكومەتی نوێی دابەشكرد، بێئەوەی كەمترین هەڵویێستی لە رەفتارە ناپاكییەكانیاندا هەبێت.
پارتی دەبێت بزانێت كاتێك ٤٥ كورسی لە پەرلەمان دەهێنیێتن ئەوە توانای بنكەی جەماوەری و نفوزی سیاسی خۆی نییە، بەڵكو بەشێك لەوە دەنگی ئەو نیشتیمانپەروەرانەیە كە بەهۆی ریفراندۆم و ١٦ ئۆكتۆبەر و رووداوەكانی، وەك هیوایەك بۆ بەردەوامبوونیان لەسەر هێلی نیشتیمانی و بەهێزبوونیان لە دژی جاش و ناپاكەكان پێدراوە، بۆیە نابێت خیانەت لەو دەنگانە بكات. گرووپێك پلە و پایەی ئیدارییان وەگرتووە و بێدەنگ لێیدانیشتوون و دەخۆن، گاڵتە بەخەونی نیشتیمانپەروەران و سەربەخۆخوازان دەكەن. تەنانەت ١٦ ئۆكتۆبەریشیان بیر نەماوە. كاتێك تۆ دەسەلاتت هەبێت و هیچ رێوشوێنێك بۆ مەبەستی سنوردانان بۆ پرسی ناپاكی و..تاد نەگریەبەر، ئەوە كەمتەرخەمی گەورە تۆی. بۆ خاینەكانیش ئەوە ئاماژەیەكی دڵنیاكەرەوەیە كە دەسەلات هیچ هەڵوەێستێكی نابێت، بۆیە تۆش لەسەر رەفتارە ناپاكییەكانت بەردەوام بە. پارتی با وێنابكات، ئەگەر كەمینەبوایە و ناپاكەكان زۆرینە بووان، ئەوا هەر بەیاسا چییان لە پارتی و كوردستان و كیانەكەی دەكرد؟
رێگەی سێیەم بۆ بەرنگاربوونەوەی دیاردەی خیانەت، بریتییە لە بێبەهاكردن خیانەت و بە بەهاكردنی نیشتیمان و سیمبوولەكانی، ئەمەش دەبێت بەپلان و لەسەر ئاستی رۆشنبیری و پەروەردەیی..تاد كاری لەسەر بكرێت، جیا هەڵمەتی راگەیاندنی بۆ بكرێت. سیمینار، بەرنامەی تەلەفزیۆنی، دراما، شانۆگەری، توێژینەوەی زانستی...تاد. ئەمە لەسەر ئاستی ناوەخۆ، بەلام لەسەر ئاستی دەرەكی، بەبۆچوونی من راستترین میتۆد كە بگیرێتەبەر، بریتییە لە حەدی بوون. سنووردانان لەبەردەم خیانەتكاران و ئەوانەی لە پشت خیانەتكارانەوەن، بۆ نموونە ئیران، پێویستە راستەوخۆ بە دەسەلاتدارانی ئیران بووترێ، دەستبردنتان بۆ ئەو كارتە یەكسانە بە دەستبردنمان بۆ ئەو كارتە. سیاسەت بەشەرمكردن لەویتر، یان خۆ بەبچوكزان ناكرێت، ئەوی بەرانبەر وەكو تۆ كارتی هەیە، دەیجولێنێ، پێویستە سیاسەتكارانی سەربەخۆخوازیش كارتەكانیان بجولێنن. بۆ نموونە هێنانەپێشەوەی خیانەتكاران و بیری لەناوبردنی قەوارەی كوردستان، یەكسانە بەزیندووكردنەوەی شۆرشی چەكداری دیموكراتی ئیران و چەكدان بە پارتەكانی رۆژهەڵات. ئەوان باسی برینی موچە دەكەن، ئێوە باسی پرسی سەربەخۆی بكەن، واتا دانوستانێكی بێمنەتانە. ئێستا باشترین كاتە دژی ئیران دەنگهەڵبریت، چونكە دوژمنێكی دزێوی ئەمریكایە و ناتوانێت دژی كیانی كوردی هەنگاو بنێت، لە دونیاشدا خاوەنی ناوبانگێكی ناشیرینە.
لە ئامادەیی نەوەیەكی نیشتیمانپەروەر كە ئاراستەیەكی سیاسی بەهێزی بۆ سەربەخۆخوازی هەیە، لەئامادەیی بەرژەوەندی زلهێزەكان لە كوردستان، كە پێگەی هەرێمی بەهێزكردووە، كە ئامادەیی پشمەرگەیەكی بەهێز، كە هێزە شپرێوەكانی حەشد و ئێراق ناتوانن بیبەزێنن، لە ئامادەیی دەستوورێك، كە شەرعییەت بەبوونی كیانی كوردستان دەدات، ئیدی ئیران و پیاوە قەزەمەكانی، لە وەهمی هەڵوەشاندنەوەی قەوارەی هەرێمی كوردستان دەژین.

 

بابەتى پەیوەندیدار بیروڕا

زۆرترین بینراو