پاراستنی خێزان و منداڵ لەزیانەكانی تۆڕە كۆمەڵایەتیەكان

معروف ملا محمد وەرتی

گومانی تێدانیە كە ئەنتەرنێت و تۆڕەكانی چەندەها سوود وكەڵكی زۆری بە مرۆڤایەتی بەخشیوە،بەشێوەیەك ڕێگای زۆر دوورو درێژی بۆكورت كردوینەوە، وەك هەواڵ پرسین و ناردنی وێنە و ڤیدیۆ و زانیەریەكان لەچركەیەكدا بۆهەر شوێنێك كەبتەوێ، ئاگاداربوونی چركە بەچركە لە هاوڕێ و خزم و كەسوكار لە هەر شوێنێكی ئەم جیهانەن، جگە لەوە چەندەها سوودی تری زانستی و فێركاریشی لێوەدەست دێت، تۆڕەكۆمەڵایەتیەكان ئەگەرچی سودی گەورەیان هەیە پێویستە بزانین لە هەمان كاتیشدا زیان و مەترسی یەكجار زۆریشیان هەیە بۆتەواوی جیهان و بۆ ژیانی مرۆڤ بەگشتی و بەتایبەتیش بۆبەكار هێنەرانی،لە هەمووشیان مەترسیدارتر و كاریگەرتر فەیسبووكە كە زیاتر لەدووملیار كەس بەكاری دەهێنن لەجیهاندا، لەهەمان كاتدا زۆرترین زیان و مەترسی هەیە بۆ مرۆڤ ، بەشێوەك مەترسیدارە شارەزایان دەڵێن: ئەگەر مرۆڤ تەنیا دووهەفتە لە سەریەك فەیس بووك بەكار بێنێت، ئەوا ڕاستەو خۆ باری دەروونی تێك دەچێ و گۆڕانكاری گەورە و مەترسیدار لە سەر تەواوی ژیانی دروست دەبێ و ڕەوشت و ئاكارەكانی گۆڕانكاری بەسەردادێت.
ئەوانەی فەیس بووك زۆربەكاردێنن لە هەموویان زیاتر لە ژیان بێزارن، چونكە لە جیهانی راستی دووردەكەونەوە و هەستی ڕەگەزپەرستی و تووڕەیی زۆریان بەسەردا زاڵ دەبێت.
هەندێ لە باوترین و دیارترین زیانەكانی تۆڕەكۆمەڵایەتیەكان
زیانەكانی تۆڕەكۆمەڵایەتیەكان تادێت لەزیادبوون و گەشەسەندن دایە زیانەكانیشی ئەوەندە زۆرن هەرچەند بنووسین ناتوانین دەست نیشانی هەموویان بكەین، لەناویاندا زیانی زۆرگەورە و مەترسیدار هەیەو پێویستە لەسەر هەموو مان هۆشیاری بدەین لەبارەیەوە، لێرەدا من چەند خاڵێك دەخەبەردیدی خوێنەران
یەكەم: لێكترازانی ژن و مێردو زۆربوونی ڕێژەی تەڵاق.
جگە لەهەموو ئەو كێشەوگرفتەگەورانەی ئێمە بەچاوی خۆمان ڕۆژانەدەیبینین كەلەدەرەنجامی تۆڕەكۆمەڵایەتیەكان ڕوودەدەن وەك كوشتن و تەڵاق و كێشەوگرفتەكانی نێوان خێزانەكان،بە پێی تازەترین لێكۆڵینەوەكان دەركەوتووە كە ئەنتەر نێت و تۆڕەكانی ئەوەندە كاریگەری خراپیان دروستكردووە لەنێو خێزانەكاندا كە لە هەر پێنج خێزانێكدا یەكێكیان توشی لێكترازان و هەڵوەشانەوە بووە
دووەم : كەم تەرخەمی بەرامبەر بەئەنجام دانی نوێژ بەتایبەتیش نوێژی بەیانی
زۆرن ئەوانەی تادرەنگانی شەو خۆیان خەریك دەكەن بەتۆڕەكانەوە پاشان بەجەستەیەكی ماندوو و خەیاڵی پڵاوەوە خەویان بەسەردا زاڵ دەبێت و نوێژی بەیانی لەپێناودا دەفەوتێنن
سێیەم: بەفیڕۆدانی كات تۆڕەكۆمەڵایەتیەكان یەكێكن لەو هۆكارانەی زۆرترین تەمەن و كاتی مرۆڤی تێتدا سەرف دەبێت و بەفیڕۆ دەچێت.
چوارەم: گاڵتە كردن و سوكایەتی كردن بەیەكتری ودەستنیشانكردنی كەمو كوڕیەكانی یەكتری،بەڕاستی لەباوترین ئەو كارانەی ئەمڕۆ زۆرینەی خەڵكی لە تۆڕٍەكۆمەڵایەتیەكاندا ئەنجامی دەدەن بریتیە لە گاڵتەو گەمە كردن و سوك كردنی یەكتری و بڵاوكردنەوەی كەم و كوریەكانی یەكتری و ئاشكراكردنی نهێنیەكانی تاك و خێزان و شكاندنی بەهای خەڵكی بەبێ جیاوازی هیتد...

بۆنووسینی ئەم بابەت سوودم لەم سەرچاوانەوەرگرتووە
ئێن ئارتی
ماڵپەری چەتر

زۆرترین بینراو