پێبۆ خدر: هەوڵ دەدەین هەڵبژاردەی عێراق بێنینە رواندز

پێبۆ خدر: هەوڵ دەدەین هەڵبژاردەی عێراق بێنینە رواندز

" تاكە لیژنەین گرنگی بە تێكڕای وەرزشەكان دەدەین"

 

زاری كرمانجی- رواندز: دوای ئەوەی ساڵی 2016 لە رواندز لیژنەی تیپە میللیەكان دامەزراو تێكڕای تیپەكانی ئەم سنورە كەوتنە بەر سێبەری ئەم لیژنەیە, كارو چالاكییەكانی وەرزشی ئەو شارە پێشكەوتنی بەرچاوی بەخۆیەوە بینی و جیا لەمەش بەهۆی سەركەوتوویی لیژنەكە چەند تیپێكی شاری سۆرانیش هاتنە نێو لیژنەی تیپە میللیەكانی رواندز.


لە دیمانەیەكدا سەرۆكی لیژنەی تیپە میللیەكانی رواندز پێبۆ خدر باسی لە كارو چالاكییەكانی لیژنەكە كردو سەرەتا گووتی" دوای ئەوەی ساڵی 2016 لەلایەن چەند گەنجێكی شارەكەمان ئەم لیژنەیە دامەزرا خۆشم یەكێك بووم لە دامەزرێنەرەكان, لیژنەی تیپە میللیەكانی رواندز لە دەرەوەی سنوری پارێزگای هەولێر یەكەم لیژنەیە كە دامەزراوەو دوای ئێمەش سۆران دامەزرا".


دواتر باسی رێكخستن و چالاكییەكان كردو گووتی" توانیمان پۆلێنكارییەك بكەین بۆ تیپەكان, ئەوە بوو بەڕێرەوێكی باش رۆیشت و تێكڕای تیپەكانمان بۆ سێ ئاست پۆلین كردن, كە پلە یەك 10 تیپی لەخۆگرت و پلە دوو بەهەمان شێوە, پلە سێش 12 تیپ, هەمان ساڵ خولی تیپەكانی پلە یەك و دوومان ئەنجامدا و دواتریش پاڵەوانییەتی جامی رواندز كە تەواوی تیپەكانی هەرسێ ئاستی لەخۆگرت, بۆ یەكمجار جامی سوپەری رواندز لەم دەڤەرە بەڕێوەچوو".


پێبۆ زیاتر تیشكی خستەسەر بەرنامەو كارو چالاكییەكانی ئەم لیژنەیەو گووتی" بۆ ئەمساڵ زۆرترین چالاكییمان لەهەگبەدایە دەمەوێ ئاماژە بەوە بكەم ئێمە تاكە لیژنەین لەسەر ئاستی كوردستان توانیومانە گرنگی بەگشت یارییەكان بدەین بەبێ جیاوازی وەك (تۆپی پێ, تۆپی بالە, تۆپی باسكە, تێنسی سەر زەوی, تێنسی سەرمێز, مەلەوانی, پاسكلسواری, شەترەنج, خولی نابژیوانی), سەرەتا هەڵساین بە كردنەوەی خولی تۆپی پێی دێرینەكان, مەبەستمان لەكردنەوەی ئەم خولە گەڕانەوەی یاریزانە دێرینەكانە بۆ نێو یاریگەكان و ئاشنا بوونیان بەیەكتری, چونكە دێرینەكان پێشەنگ و جێی شانازی ئەو لاو و گەنجان كە ئەمڕۆ لەمەیدانن, ئەگەر ئەوان نەبوونایە ئێمەش نەمان ئەتوانی ئەمڕۆ لە یاریگەكان ئامادەبین, خولەكە پێكهاتووە لە ۱۰ تیپ كە تیپی بنەسڵاوە وەك میوان داوەت كراوەكە یەكێكە لە تیپە دێرینەكانی شاری هەولێرو خاوەن زۆرترین دەسكەوتە, جیا لەوەش زۆرترین هاندەری هەیە, تیپەكانمان بەسەر دوو كۆمەڵە دابەش كردوون و بە كۆكردنەوەی خاڵ لەهەر كۆمەڵەیەك دوو تیپ سەردەكەون بۆ چوارگۆشەی زێڕین، خۆی خولی دێرینەكان وا باشە لە تەمەنی 40 ساڵەوە دەست پێ بكات, بەڵام بەهۆی نەبوونی تیپەكانی ئەم دەڤەرە كردمانە 37 ساڵ, وەك ئاگاداریشین لەم ناوچەیە یاریزان تەمەنی درێژی وەرزشی نیەو لە دوای تەمەنی 30 ساڵی لە یاریگەكان دوور دەكەوێتەوە, بەرنامەكانی داهاتوومان بە یارمەتی هاوكارانم لە لیژنەی تیپە میللیەكان و بنكەی وەرزش و لاوان و ناوەندی لاوانی رواندز رێگەمان پێ بدرێت لە ناو یاریگە ژورێكی نووستن درووست بكەین بۆ مانەوەی تیپەكانی دەرەوە بۆ ئەوەی بتوانین خزمەتێكی باشیان بكەین, چاكردنەوەی هەردوو یاریگەی تێنسی سەر زەوی و تۆپی بالە بۆ ئەوەی بتوانین كارو چالاكیەكانمان ئەنجام بدەین, كردنەوەی هەرسێ خولەكانی پلە یەك دوو سێ, بەتەواوی جوانتر كردنی وەرزشی شار, تا ئێستا تیپەكان و یاریزانان زۆر بەباشی هاوكارمانن ئەوەش جێگەی دەستخۆشیە ئەركی ئێمەیان ئاسانتر كردوە ئەوەی پێشمان بكرێت درێغی ناكەین".


سەرۆكی لیژنەی تیپە میللیەكانی رواندز لەسەر دانانی سیستەمی ڤار لە خولەكانی رواندز گووتی" بە سوپاسەوە بەنزینخانەی شاد ئۆیل خاوەنی جوانرۆ سەتار هەستا بە سپۆنسەركردنی سیستەمی ڤار كە جێگەی دەستخۆشیە, سوودەكانی ڤار ئاسانكارییەكی تەواوی بۆكردووین هەڵەكانمان بۆ ئاشكرا دەكات, هەموو تیپەكانیش مافی تەواوی خۆیان پێ ئەدرێ لەرێگەی ڤارەوە، وەكو شاریش پێشكەوتنێكی زۆر باشەو دەتوانم بلێم تاكە قەزای كوردستانین ڤارمان بەكارهێناوە, هەرچەندە لە گەڕانەوە بۆ ڤار كاتی یارییەكان كەمێك دوا دەكەوێ لە دۆزینەوەی هەڵەكان, بەڵام تیپەكان هەموویان دڵخۆشن و كەسیش گازاندە ناكات لە گۆڕینی ئەنجام".


لە كۆتایی قسەكانیدا سەرۆكی لیژنەی تیپە میللیەكانی رواندز گووتی" دەستەیەكی رێكوپێكی ناوبژیوانانمان هەیەو هەموویان لەوپەڕی ئاست بەرزی دان, لەگەڵ ئەوەشدا پێویستیان بەكردنەوەی خولێكی ناوبژیوانییە بۆ ئەوەی بتوانن بچنە نێو خولەكانی كوردستان و عێراق, پەنا بەخوا لە ماوەكی كەم خولێكی ناوبژوانیان بۆ دەكەینەوە بۆ بەرەوپێشچوونی ئاستیان و پێدانی بڕوانامەی یەكێتی تۆپی پێ, لە بەرنامەشماندایە لە رواندز خولێكی خۆش و بەچێژ بۆ تۆپی پێی دێرینەكان بۆ تیپەكانی چەند پارێزگایەكی كوردستان و عێراق بكەیەنەوە, پەنا بەخوا ئامادەكاری باش دەكەین تا بتوانین هەڵبژاردەی عێراق بهێنینە شارەكەمان بۆ یاریێكی دۆستانە لەگەڵ دێرینەكانی رواندز, سوپاس و دەستخۆشی و بۆ ئەو كەسانە كە هاوكاریان كردووین بە تایبەتی بەنزینخانەی شاد ئۆیل و كۆمپانیای ATLAS.KITCHEN بۆ سپۆنسەركردنی خولەكانمان سوپاس بۆ بنكەی وەرزش و لاوانی رواندز ماموستا حلمی كە لە هەموو كارەكانمان هاوكارو پاڵپشتمانە هەروەها سوپاسی ناوەندی لاوانی رواندز و فەرهاد ساڵح دەكەین".

 

بابەتى پەیوەندیدار وەرزشى

زۆرترین بینراو