پەكەكەو توركیا ژیانی هاووڵاتییان دەخەنە مەترسییەوە

پەكەكەو توركیا ژیانی هاووڵاتییان دەخەنە مەترسییەوە

زاری كرمانجی-قەسرێ‌: بەهۆی بوونی پارتی كرێكارانی كوردستان (پەكەكە) لەناوچەكەو بۆردومانی بەردەوامی سوپایی توركیا، دانیشتوانی زیاتر لە (27) گوندی ناحیەی قەسرێ‌ سەربە قەزای چۆمان، لە دۆخێكی مەترسیداردان.
دانیشتووانی دەیان گوندی سنووری ناحیەی قەسرێ‌ سەربە قەزای چۆمان، بەهۆی بوونی پارتی كرێكارانی كوردستان (پەكەكە) لەناوچەكەو بۆردومانی بەردەوامی سوپایی توركیا بەم هۆیەوە، چەندین جار دووچاری زیانی گیانی و ماددی و ئاوارەیی بونەتەوەو داواكارن لەحكوومەتی هەرێم و لایەنە پەیوەندیدارەكان چارەسەرێك بۆ ئەم رەوشە بدۆزرێتەوەو چیتر لەسەر خاكی خۆیان نەبنە قوربانی سیاسەتی پەكەكە و توركیا".
شاخەوان حوسێن، بەڕێوەبەری ناحیەی قەسرێ‌، رایگەیاند " نیگەرانین لەم بارودۆخەی سنوورەكەمان، (27) گوندی ناحیەی قەسرێ‌ دەكەونە دۆڵی باڵەیان و بناری قەندیل، پارتی كرێكارانی كوردستانی توركیا (پەكەكە) لەسنوورەكە بوونیان هەیە، بەمەش دانیشتووانی ئەم گوندانە لە دۆخێكی خراپ و مەترسیداردان، چونكە بە شێوەیەكی بەردەوام چەندین ساڵە سنووری ئەم گوندانە بەهۆی خراپی رەوشی سەربازی و بوونی (پەكەكە) لە ناوچەكەدا، بەشێوەیەكی بەردەوام لەلایەن فڕۆكە جەنگییەكانی سوپایی توركیا بۆردوومان دەكرێت، لەم نێوانەشدا خەڵكی بێتاوانی ئەم گوندانەو رێبواران و كۆچەریان دەبنە قوربانی و باجەكەی دەدەن، تا دێت رەوشەكەش روو لە خراپ بوونەو دانیشتووانی گوندەكانی ناوچەكە بێزارن لەم بارودۆخە مەترسیدارە".
بەڕێوەبەری ناحیەی قەسرێ‌ دەشڵێت " جێگەی داخە بەهۆی شەڕی نێوان پارتی كرێكارانی كوردستانی توركیا (پەكەكە) و بۆردومانی فڕۆكەكانی سوپایی توركیا، چەندین كەسی سڤیل بوونەتە شەهیدو قوربانی و دووچاری كەمئەندامبوون بوونەتەوە".

 

زۆرترین بینراو