پەیامی سەرۆكی حكوومەتی ھەرێمی كوردستان بەبۆنەی رۆژی جیھانی ئافرەتان

پەیامی سەرۆكی حكوومەتی ھەرێمی كوردستان بەبۆنەی رۆژی جیھانی ئافرەتان

مەسروور بارزانی، سەرۆكی حكوومەتی ھەرێمی كوردستان بەبۆنەی 8ی مارس رۆژی جیھانی ئافرەتان، پەیامێكی بڵاوكردەوە و رایدەگەیەنێت" ئافرەتانی کوردستان رۆڵێکی کاریگەر و شکۆداریان لە بزووتنەوەی رزگاریخوازی گەلی کوردستاندا بینیوە و لە دژی داگیرکاریی و ستەمی کۆمەڵایەتی خەباتیان کردووە".

دەقی پەیامی سەرۆكی حكوومەتی ھەرێمی كوردستان بەبۆنەی رۆژی جیھانی ئافرەتان:

لە رۆژی جیهانیی ئافرەتاندا پیرۆزبایی لە ئافرەتانی هەرێمی کوردستان و جیهان دەکەم. یادکردنەوەی هەشتی مارس رێزگرتنە لە خەبات و تێکۆشانی ئافرەتان لە پێناو یەکسانیی و دادپەروەری کۆمەڵایەتی و نەهێشتنی ستەم و چەوساندنەوەدا .

ئافرەتانی کوردستان رۆڵێکی کاریگەر و شکۆداریان لە بزووتنەوەی رزگاریخوازی گەلی کوردستاندا بینیوە و لە دژی داگیرکاریی و ستەمی کۆمەڵایەتی خەباتیان کردووە. بۆیە ئێمە تیکۆشانی ئافرەتانی کوردستان، بەتایبەتی ئافرەتانی پێشمەرگە لە شۆڕشەکانی کوردستان و رۆڵی بەرچاویان لە رووبەڕووبوونەوەی تیرۆریستانی داعش بەرز دەنرخێنین و پابەندبوونی حکوومەتی هەرێمی کوردستان لە پاراستن و داکۆکیکردن لە مافەکانی مرۆڤ بە گشتی و مافەکانی ئافرەتان بەتایبەتی و رەخساندنی زەمینە و دەرفەتی یەکسانیی کارکردن و بەشدارییان لە بوارە جیاجیاکاندا دووپات دەکەینەوە.

داوا لە ئافرەتانی هەرێمی کوردستانیش دەکەم کە رۆڵی کارای خۆیان لە بڵاوکردنەوەی هۆشیاریی تەندروستی و جێبەجێکردنی رێنماییە تەندروستییەکان بۆ رووبەڕووبوونەوە و خۆپاراستن لە ڤایرۆسی کۆرۆنادا بگێڕن و هانی ئەندامانی خێزانەکانیان و کەسوکاریان بدەن بۆ پاراستنی پاک و خاوێنی و ژینگە کە ئەرکێکی نیشتمانیی و بەرپرسیارێتی هەموومانە.

 

مەسروور بارزانی

سەرۆکی حکوومەتی هەرێمی کوردستان

2020/3/8

 

زۆرترین بینراو