پەیامی نێچیروان بارزانی بە بۆنەی ساڵیادی هەڵگیرسانی ثشۆڕشی ئەیلوولی مەزنەوە‎

پەیامی نێچیروان بارزانی بە بۆنەی ساڵیادی هەڵگیرسانی ثشۆڕشی ئەیلوولی مەزنەوە‎

  نێچیروان بارزانی" جێگری سەرۆكی پارتی دیموكراتی كوردستان بە بۆنەی ساڵیادی هەڵگیرسانی شۆڕشی ئەیلوولی مەزنەوه‌ پەیامێك بڵاودەكاتەوە. ‎ زاری كرمانجی:

پەنجا و هەشت ساڵ بەسەر سەرهەڵدانی شۆڕشی مەزنی ئەیلوولدا بە سەركردایەتیی پارتی دیموكراتی كوردستان و ڕێبەرایەتیی بارزانیی نەمر تێدەپەڕێت. ئەم شۆڕشە نیشتیمانییە یەكێكە لە سەروەرییە مەزنەكانی مێژووی گەلی كوردستان بۆ بەرگریكردن لە ماف و خواستە ڕەواكانی و ڕووبەڕووبوونەوەی سیاسەتی تاكڕەوی. پاش ئەوەی نەتوانرا بە خەباتی مەدەنی و تێكۆشانی جەماوەرەییانە، خواست و داواكانی گەلەكەمان بەدی بهێنرێن، شۆڕشی ئەیلوول وەك پێویستییەكی مێژوویی سەری هەڵدا.

بڕوا و متمانەی كوردستانییان بە ڕێبەری شۆڕش و سەركردایەتیی پارتی دیموكراتی كوردستان و یەكڕیزی و یەكگرتووییی گەلەكەمان، سەرچاوەی بەهێزیی شۆڕش بوون كە لە ماوەیەكی كەمدا سەرجەم ناوچەكانی كوردستانی گرتەوە و هەموو چین و توێژ و پێكهاته نەتەوەیی و ئایینییەكانی كوردستان، چالاك و دڵسۆزانە بەشدارییان تێدا كرد. شۆڕشی ئەیلوول بە دیدگایەكی ڕۆشنی سیاسی و كولتوورێكی لێبوردووانە و گیانێكی مرۆڤدۆستانەوە هەنگاوی نا، بە خۆڕاگریی گەلی كوردستان و قارەمانیەتیی پێشمەرگە، چەندین داستانی مێژوویی تۆمار كرد كە مایەی شانازیی گەلی كوردستانن.

شۆڕشی ئەیلوول بە ئەندازەی مەزنیی خۆی، دەستكەوتی مەزن و مێژوویی بۆ گەلەكەمان بەدیهێنا، ئازادیی ئەمڕۆ و پێشكەوتنە سیاسی و ئابووری و كۆمەڵایەتی و فەرهەنگییەكانی كوردستان، زادەی ئەو دەستكەوتانە و شۆڕش و ڕاپەڕینەكانی دواتر و ئەو قوربانییە مەزنانەن كە گەلی كوردستان لەپێناو مانەوە و ماف و ئازادی و ئاشتی و سەرفرازیدا، بەخشیویەتی.

بەرزڕاگرتنی ئەم یادە شكۆدارە، وێڕای ئەوەی ڕێزگرتنە لە مێژوو و قوربانی و سەروەرییەكانی گەلەكەمان، هاوكات بۆ لێفێربوون و وەرگرتنی وانە و پەندی گرنگە. شۆڕشی ئەیلوول سەلمێنەری ئەو ڕاستییەیە كە شۆڕش و ڕووبەڕووبوونەوەكانی گەلی كوردستان هەمیشە بۆ بەرگریكردن لە بوون و ناسنامە و داكۆكیكردن لە ماف و خواستە ڕەواكانی بووە. گەلەكەمان هەمیشە بە یەكڕیزی و یەكگرتوویی، دەستكەوتی مەزنی بەدەست هێناوە، كوردستانییانیش بە هەموو جیاوازییە ئیتنی و ئایینی و سیاسییەكانیانەوە، هەمیشە یەك چارەنووسیان هەیە و یەك ئایندە چاوەڕێیان دەكات.

وەفاداریی بۆ ئەم شۆڕشە مەزنە و شۆڕش و ڕاپەڕینە مێژوویییەكانی گەلی كوردستان، كار و هەوڵی بەردەواممان لێ دەخوازێ بۆ پاراستنی دەستكەوتەكانمان و بەزیندووهێشتنەوەی ناو و كار و خەباتی شۆڕشگێڕ و تێكۆشەران و سەربازە ونەكانی شۆڕش، بەر لە هەمووانیش شەهیدانی قارەمان. گەلی كوردستان خاوەنی مێژوویەكی پڕ سەروەری و مایەی شانازییە، یەكێك لەو سەروەرییە مەزنانەش،‌ شۆڕشی ئەیلوولە.

سڵاو لە گیانی پاكی شەهیدانی قارەمانی شۆڕشی ئەیلوول و سەرجەم شەهیدانی كوردستان.

بەرز و شكۆدار بێت، ساڵیادی پیرۆزی شۆڕشی ئەیلوولی مەزن.

سڵاو و ڕێز بۆ گیانی خۆڕاگریی گەلی كوردستان.

سڵاو و ڕێز بۆ پێشمەرگەی قارەمان و تێكۆشەرانی شۆڕشی ئەیلوول.

 

نێچیرڤان بارزانی

جێگری سەرۆكی پارتی دیموكراتی كوردستان

١٠/٩/٢٠١٩

زۆرترین بینراو