پەیامی ڕێكخرای وار لە یادی حەوت ساڵەی دامەزراندنیدا

پەیامی ڕێكخرای وار لە یادی حەوت ساڵەی دامەزراندنیدا

بەبۆنەی تێپەربوونی حەوت ساڵ و هەنگاونان بۆ هەشتەمین ساڵیادی دامەزراندنیدا، ڕێكخراوی وار بۆ پاراستنی ژینگە گەرمترین پیرۆزبایی ئاراستەی خەڵكی كوردستان بەتایبەتی ژینگەدۆست و خەمخۆرانی ژینگە و خۆبەخشانی وار دەكات، هیوادەخوازین ئەم یادە ببێتە هۆی كۆتایی هاتنی سەرجەم كێشەكان و سەوزتر بوونی ژینگەی كوردستان و لەسەرووی هەموویشەوە كۆتایی بێت بەم پەتا جیهانیەی كە بووەتە هۆی دوژمنێكی بێ بەزیی بەرامبەر تێكرای مرۆڤایەتی، ئەگەرچی بۆ ژینگە وەچەرخانێكی مێژوویی گرنگ بوو. ڕێكخراوی وار بۆ پاراستنی ژینگە، وەك تاكە ڕێكخراوی بواری ژینگەیی لە دەڤەرەكە لە ڕێككەوتی ۲۰۱۳.٦.٢٤ لەسەر دەستی كۆمەڵە گەنجێكی خۆبەخشی لەخۆبردویی دەڤەری سۆران دامەزرا، ئامانج لە دامەزراندنی ڕێكخراوەكە بڵاوكردنەوەو هۆشیاركردنەوەی هاوڵاتیان بوو لەچۆنیەتی پاراستنی ژینگە، هەروەك ئاشكرایە ژینگە چەمكێكی فراوانە تەنها خۆی نابینێتەوە لە فڕێدان یان فڕێنەدانی كەل و پەل و پیسایی، بەڵكو پەیوەندی ڕاستەوخۆی بە ژیانی مرۆڤایەتیەوە هەیە، ژینگە واتە پاراستنی ئاو هەواو سەوزكردنی وڵات لەڕێگەی چاندنی نەمام بۆ دەستكەوتنی ئۆكسیجین لەمانەوەمان لە ژیان، هەروەها ژینگە واتە بەدەستهێنانی زانیاری لەهەسارەكانی بۆشایی ئاسمان كە چۆن بەو قەبارە گەورەیە لەخزمەتی مرۆڤایەتیدان، ژینگە واتە ڕەخساندنی ژینگەیەكی لەبار بۆ خوێندن دوور لە ژاوەژاو، واتە خۆپاراستن لە نەخۆشیەكان بە ڕەچاوكردنی پاكو خاوێنی، ئەمانە و چەندان چەمكی تر دەچنە خانەی زانستی ژینگەوە. وار سەربەرزە بە خۆبەخشانی كە ماوەی حەوت ساڵە بێ گوێدانە ماندووبوون خزمەتی خەڵك ونیشیتمان دەكات، هەر ئەم جۆشو خرۆشە وایكرد وار پەل بهاوێژێ بۆ كردنەوەی چەندان لق لە قەزاكانی (ئاكرێ، چۆمان، ڕواندز، مێرگەسۆر و ناحیەكانی سیدەكان و خەلیفان) وە دانانی نوێنەر لە هەردوو پارێزگای هەولێر و دهۆك، لەڕێگەی ئەم لقانەوە وار توانی خزمەتێكی گەورەی ژینگەیی و مرۆیی و هۆشیاری بە هاوڵاتیان بگەیەنێت، ئەویش لە ڕێگەی كردنەوەی چەندان خولی جۆراوجۆری گەشەپێدانی ژینگەیی و پەروەردەیی و مرۆیی بۆ هاوڵاتیان بە گشتی و بەتایبەت لە زانكۆ و قوتابخانەكان، توانی ببێتە فریادرەسی ژینگەی سروشتی و مرۆیی و جێگەی خۆشحاڵی هاوڵاتیان. بەڕێزان، ئەوەی باسمانكرد دڵۆپێكە لەدەریا، بەڵام بێ ئاستەنگیش نەبووین، بگرە دووچاری دەیان ئاستەنگی گەورەی مرۆیی و دارایی و ئێرەیی بردن بووینەتەوە، بەڵام وار خاوەن ڕۆحیەتی خزمەتكردن و ئامانج و پلانە، بەربەستەكان هەرچەندەگەورەبن ئیڕادەی تێكشكاندنمان بەهێزترە، بۆیە هەرچیەك لەبارەی ئێمەوە بگوترێ لە ناڕاستی ئێمە بەگروتینێكی زیاترەوە دێنەوە مەیدانی كاركردن. هەر لێرەوە بە پێویستی دەزانین سوپاسی یەكە بەیەكەی ئەو كەس و لایەنانە بكەین كە ڕۆژێك لە ڕۆژان هاوكاری مادی و مەعنەوی وار بوون، هەروەها سوپاسی سەرجەم كەناڵەكانی ڕاگەیاندن دەكەین كە هاوكارمان بوون و بوونە هۆی گواستنەوەی دەنگ و ڕەنگی وار، هەروەها سوپاس ئەو پەیج و ئەكاونتانە دەكەین كە لەڕێگەی سۆشیاڵ میدیای سەردەمەوە دەنگ و ڕەنگی واریان بە خەڵك ئاشناكرد، دڵنیابن وار لەبیرتان ناكات هەمیشە وەك مۆمێكی درەوشاوە لە ئەرشیفی یادگاریەكانی واردا یاد دەكرێنەوە. دووبارە ئەم یادەتان پیرۆزو هەمیشە لەژینگەی خۆشی و ئارامیدا بژین، بەهیوای تەندروستیەكی باش بۆ سەرجەم كوردستانیان.


ڕاگەیاندنی ڕێكخراوی وار بۆ پاراستی ژینگە
23-6-2020

زۆرترین بینراو