چنور مەحموود: بەشێكی زۆر لەو ژنانەی ئێستا دەر كەوتوون نەیان دەتوانی هەنگاوبنێن

چنور مەحموود: بەشێكی زۆر لەو ژنانەی ئێستا دەر كەوتوون نەیان دەتوانی هەنگاوبنێن

دیمانە محەمەد ئامۆكەیی- هەڵەبجە: خانمە شانۆكار چنوور مەحموود قادر، دانیشتووی هەڵەبجە، هونەرمەندی بواری شانۆیە، وەك خۆی گووتی" دەستپێكی كاری هونەریم بۆ هەشتاكانی سەدەی رابردوو دەگەڕێتەوە، بەشانۆی (ژن هێنان ) لە نووسینی مۆلیر و لە دەرهێنانی (بەختیار غەفور) بوو لە هۆلی رۆشنبیری هەڵەبجە نمایشكرا لەو كارەدا دوو رۆڵم هەبوو بۆ ماوەی 3 رۆژ نمایشكرا دوای ئەوە بەردەوام بووم هەتا ئەوكاتەی سەفەرمكرد بۆ دەرەوەی وڵات و لە بەریتانیا گیرسامەوە ئەوەش بووە هۆكاری ئەوەی كاریگەری زۆری هەبێت لە دواكەوتنم لەكاری هونەری، بەڵام دوای گەڕانەوەم دیسانەوە دەستم بەكاركردن كردۆتەوە هەتا ئێستاش بەردەوامم."
ئەو خانمە شانۆكارە لەبارەی بەرهەم و رۆڵی نوێ نەیشاردەوە و گووتی" نوێترین كارم (درامای بەختە باران)ە لە نووسینی ئەحمەد رەزا و دەرهێنانی د. نیاز هەتا ئێستا لە وێنەگرتن بەردەوامین و بەشێوەیەكی پڕۆفیشناڵانە ئەم دراماییە بەرهەم دێنین و لە 80 ئەڵقە پێكهاتووە."
چنوور مەحموود دەشڵێت" قسەكردن لەسەر دراما بیانییەكان بە تایبەت توركی و فارسییەكان زۆر لەوە زیاتر هەڵدەگرێت كە ئێمە بتوانین لەچەند دێڕێكدا قسەی لەسەر بكەین، گومانی تیانیە دراما توركی و فارسییەكان كردنەوەی دەرگای ڕاگەیاندنەكان بەڕووی ئەو درامایانە تاوەكو بگاتە كۆی خێزانەكان و كاركردن بۆ تێكدانی شیرازەی خێزان و دروستبوونی چەندین گرفتی كۆمەڵایەتی و خێزانی دروستكردنی كاریگەری داب و نەریت و كلتووری وڵاتانی ناو براو بە ئەندازەیەك كاریگەری دروستكردووە شانۆ و درامای كوردی لەگۆڕ ناوە، بەداخەوە نەدەبوا وابوایە دەبوایە وەزارەتی رۆشنبیری فلتەری تایبەت دابنێت بە پەخشكردنی ئەو درامایانە نەوەك هەر تیڤییەو بە ئارەزووی خۆی بێت چی بوێت پەخشی بكات."
هونەرمەند و شانۆكار چنوور، راشیگەیاند" كاتێك مرۆڤ لە كۆمەڵگەی ئێمە بیەوێت كاری هونەری بكات پێش هەموو شتێك كە خێزانەكەی پشتگیری نەكەن ئەوا ناتوانێت سەركەوتوبێت، دووەم هونەرمەند دەبێت ڕێچكە شكێن بێت، منێك كە كاری هونەری بكەم بمەوێت ڕۆڵم هەبێت لەڕێگای هونەرەكەمەوە خۆشی و ناخۆشیەكانی گەڵەكەم نیشان بدەم دەبێت توانای ئەوەشم هەبێت ڕووبەڕووی ڕەخنە ببمەوە، من لە كاتێكدا دەستم بە كاری هونەری كرد بەشێكی زۆر لەو ژنانەی كە ئێستا دەركەوتوون لە چوارچێوەی دیوارەكان نەیان دەتوانی هەنگاوبنێن، بۆیە كاری گەورە قوربانی دانی دەوێت شانۆ بەداخەوە لەئێستادا لە دۆخێكی خراپ دایەو ئەگەرچی گۆڕان كاری گەورە ڕووی داوە لەمەجاڵی پێشكەوتن، بەڵام بەداخەوە شانۆ و سینەما كە دڵی پێشكەوتنی هەرنەتەوە و گەڵێك پێشكەوتن و دواكەوتوی گەڵەكان لەسەر چەند هۆكارێك بەندە شانۆش یەكێكە لەوانە بەداخەوە لە كوردستان سەرەڕای كۆمەڵێك خەڵكی بەتوانا لەكارەكەیان بەزیندوویی لەگۆڕ نراوە بۆیە دەبێت وەزارەتی ڕۆشنبیری كاری یەكەمی ئەوە بێت شانۆ و خەڵك بەیەكەوە ئاشت بكاتەوە."
چنوور لە دوا پەیڤەكانیشیدا گڵەیی ئەوەی كردوو گووتی" بەداخەوە هۆڵەكانی شانۆش بەدەر نین لەكۆی كارو پڕۆژەكانی تر سەڕەرای ئەوەی لە كۆمەڵێك قەزاو ناحییەكان هۆڵی شانۆ بوونی نیە ئەوەی لەشارەكانیش دەبینرێت لەئاستێك دانین دڵخۆش كەربن كۆی ئەو بابەتانە پێویستیان بە پێداچونەوە هەیە بۆ چاكردنیان و دەشمەوێت بڵیم" ئێمە لە كوردستان خاوەنی كۆمەڵێك شانۆ كار و دەرهێنەری بەتواناین بەڵام بەداخەوە ئەوەی توانەكانی لەگۆڕ ناون هاوكاری نەكردنی هونەرمەندانە لەلایەن حكومەتی هەرێمی كوردستان بۆیە ئومێدەوارم ئەمساڵ ساڵی گۆڕان كاری و گرنگی دان بێت بەسەرجەم بوارە هونەرییەكان.

”منێك كە كاری هونەری بكەم بمەوێت ڕۆڵم هەبێت لەڕێگای هونەرەكەمەوە خۆشی و ناخۆشیەكانی گەڵەكەم نیشان بدەم دەبێت توانای ئەوەشم هەبێت ڕووبەڕووی ڕەخنە ببمەوە“

زۆرترین بینراو