چەند وێستگەیەكی ژیانی شەهید سەلام مەعروف شێروانی

چەند وێستگەیەكی ژیانی شەهید سەلام مەعروف شێروانی

بەرەڤان شاكر سلێمان لاچ- سۆران:
گەلی كوردستان یەك لەو گەلانەیە كەوا لە دێر زەمانەوە هەوڵ بۆ سەربەخۆ دەدات، هەڵبەت بۆ ئەم هەوڵەش چەندین لاو و گەنج خۆیان فیدایی ئەم خاكە كردووە. لەم ژمارەی هەفتەنامەی زاری كرمانجیدا، باس لە ژیان و خەباتی شەهیدی جوانەمەرگ ( سەلام مەعروف شێروانی) دەكەین.
سەلام مەعروف حەسەن محەمەد ، لە 1ی كانونی یەكەمی ساڵی 1991 لە ئۆردوگای زێوە لە دایك بووە، لەدایك بوونی جوانەمەرگ لە كات و ساتێكی زۆر هەستیاردا بوویە، بەتایبەت بۆ گەلی كوردستان، لەلایەكەوا لەو ساڵەدا كوردستان راپەڕی و ئاڵای رێژمی بەعس هێنایەخوارەوە، لە لایەكی ترەوە گەلی كوردستان تۆشی كۆڕەوە گەوەرەكەی ساڵی 1991 بوو.
مەعروف حەسەن محەمەدی باوكی شەهید دەڵێت: دوای ئەوەی حكومەتی عێراق دەستی بە پڕۆسەی ئەنفالی بارزانییەكانی كرد، ئێمە خۆمان رادەست نەكرد و لە رێگەی باكووری كوردستانەوە ئاوەرەی رۆژهەڵاتی كوردستان بووین، دواتر لە ئۆردوگای زێوە نیشتەجێ بووین، هەر لە ئاوەرەییدا بووین كاتێك خوای گەورە شەهید سەلامی بە ئێمە بەخشی.
دوای ئەوەی لە باشووری كوردستان راپەڕین ئەنجامدرا و گەلی كوردستان بەرەو سەربەخۆی هەنگاوی نا، ئێمەش بە یاوەری جەنابی سەرۆك بارزانی گەڕاینەوە بۆ باشووری كوردستان، دواتر من و باب و برایەكانم گەڕاینەوە بۆ گوندی خۆمان لە كانیە بۆتێ، ئەو كات كەس لە گوند نەبوو و گوندێكی چوڵكراوبوو.
شەهید وەك هەر منداڵێكی هاتەمەنی خۆی دەچێتە قوتابخانە و تا پۆلی دووی ناوەندی بەردەوامی بە خوێندن دەدات.
شەهید سەلام، یەكێك بووە لەوانەی لە ئاوەرەی لە دایك بووە، بەهۆی باوكییەوە بەردەوام نزیك بووە لە هێزی پێشمەرگەوە، كوردایەتی و نیشتیمان پەروەری ڕەگ و ڕیشەی لەو بنەماڵەیەدا داكوتاوە، هەر بۆیە شەهید سەلام چەكی شەڕەف لە شان دەكات و لە ساڵی 2008 لە هێزی تایبەتی یەك دەبێتە پێشمەرگە.
سەبارەت بە كەسایەتی شەهید، باوكی شەهید دەڵێت: هەرچی سەبارەت بە سەلام بگوترێت لە رووی رەوشت بەرزی و ئەخڵاقەوە هەر كەمە،من و سەلام وەك هاوڕێ وابووین، ئەوەندە لێك نزیك بووین زۆر جار ئێمەیان بە هاورێ ناسیوە، شەهید كەسێكی نەرم و نیان بوو، هەردەم بیری لە كارەكانی دەكردەوە، كەسێكی دەم بەخەندە و روو خۆش بوو، بە ڕاستی من وەك كوڕی خۆم نا، بەڵكو وەك برادەرێك هەڵسوكەوتم لەگەڵی دەكرد.
دوای دروست بوون و پەلهاوێشتنیان رێكخراوی تیرۆرستی داعش بۆ سەر باشووری كوردستان، شەهید سەلام یەك لەو پێشمەرگانە دەبێت كەوا بەوپەڕی هێز و تواناوە بەشداری لە پاراستنی كوردستان و دەستكەوتەكانی دەكات.
شەهید بەشداری لە هەریەك لە داستانەكانی (سنونێ، زوومار، موسڵ، ڕەبیعە) كردووە.
هاوسەنگەرەكانی شەهید دەڵێن: شەهید توانی بووی شوێنی خۆی لە دڵی هەمووماندا بكاتەوە، ئەو كەسێكی بەوەفابوو، هەردەم هاوبەشی خۆشی و ناخۆشییەكانی هاوڕێیەكانی خۆی دەكرد. لە رووی پێشمەرگایەتییەوە كەسێكی بووێر و چاونەترس بوو، هەردەم ئامادەبوو بۆ هەر ئەرك و بەرپرسیاریەتێك، بەراستی شەهید سەلام لای هەموومان خۆشەویست بوو.
دوای دەستپێكردنی هێرشی پێشمەرگە بۆ رزگاركردنی ناوچەی بادووش، رۆژی 2ی تشرینی یەكەمی ساڵی 2016، فرۆكەیەكی بێ فرۆكەوانی تیرۆرستانی داعش دەكەوێتە ناو سەنگەرەكانی پێشمەرگە و TNTیەك بە هێزەكانی پێشمەرگەوە دەتەقێتەوە، سەر ئەنجام هەر یەك لە ( سەلام مەعروف و سەگڤان سندی ) شەهید دەبن، دوای شەهیدبوونیشی لە ڕێورەسمێكی شایستەدا تەڕمی شەهید سەلام دەگەڕێنرێتەوە بۆ زێدی خۆی و لە گوڕستانی گوندی كانی بۆتێ دەنێژرێت.
سەبارەت بەو رۆژانە باوكی شەهید دەڵێت: سەلام پێی گووتم پەیوەندییان پێوەكردووم بۆ ئەوەی بگەڕێمە بۆ دەوام. شەهید گەڕایەوە بۆ ئەركی سەربازی خۆی لە سنووری میحوەری مووسڵ، رۆژی بەر لە شەهیدبوونی پێی گووتم، بەیانی تا نیوەڕۆ پەیوەندیم پێوە نەكەن و لەوانەیە مۆبایلەكەم دابخەم، رۆژی دواتر نزیك كاتژمێر دوانزدەی نیوەڕۆ بوو، من لە ناو باغی ماڵەوە كارم دەكرد، لە ماوەیەكی كەمدا ژمارەیەكی زۆری دۆست و برادەر پەیوەندییان پێوەكردم، هەر كەس تەلەفۆنی دەكرد، باسی بارودۆخی گوند و ناوچەكەی دەكرد، من هەستم بە هەبوونی شتێك كرد، بەڵام كاتێك نەقیب مەحمود پەیوەندی پێوەكردم زانیم شتێك لە سەلام هاتووە، هەر لە سەرەتای پەیوەندییەكەمدا پێم گووت سەلام شەهید بووە؟ گووتی نا بەس بڕێك بریندار بووە، پێم گووت بەچی برینداربووە؟ گووتی تێنتییان پێوە تەقیوەتەوە، هەر یەكسەر زانیم سەلام شەهید بووە.
باوكی شەهید، بە هەڵكێشانی چەند هەناسەیەكی قۆڵ بەردەوام بوو و گووتی: من نەمزانی چی بكەم، هەموو شتێكم لێ بەزر بوو، لێم مەگرن، ئاخر شەهید بۆ من هەموو شتێك بوو، دوای ئەوەی زۆر مشەوش بووم ماڵەوەمان زانی شتێك بووە، منیش هەر زوو راستی بابەتەكەم بۆ گووتن.
مام مەعروف گووتی: دوای ئەوەی گەیشتم بە تەرمی شەهید خۆم پێنەگیرا و لە هۆش خۆم چووم، كاتێك بەخەبەر هاتم گووتم كوا سەلام؟ گووتییان هەستە وا لەسەر قەبران چاوەڕێی تۆ دەكەن، هەر بێ پێلاو چووم و خۆم گەیاندە لای ئەوان، هەر لەسەر گۆڕی شەهید گووتم، هەزاران جار شوكر كوڕەكەم لەسەر رێبازێكی پیرۆز شەهید بوو، ئەمە رێگایەكە هەموومان ئاواتی بۆ دەخوازین، رێگای كوردایەتی رێگایەك نییە كەوا بۆمان دانرابێت، بەڵكو خۆمان ئەو رێگایەمان هەڵبژاردووە.
لە كۆتای چاوپێكەوتنەكەدا باوكی شەهید دەڵێت: من لە ئێستادا پێشمەرگەم و لە سەنگەری پێشەوەی پاراستنی كوردستانم، لەو رۆژەوەی بۆم بە پێشمەرگە پێشبینی شەهیدبوونم بۆ خۆم و تەواوی ئەندامانی خێزانەكەم كردبوو، شەهید سەلام بۆ من كەسێكی گرنگ و گەورە بوو، بەڵام ئێستاش ئامادەم خۆم و هەموو كوڕەكانم بكەم بە قوربانی كوردستان و جەنابی سەرۆك، هەموو ئەوەی ئێمە كردوومانە بۆ ئەوە بوویە گەلی كوردستان ببێتە خاوەنی وڵاتێكی سەربەخۆ و رێگە نەدەین دەژمنان بەسەر ئێمەدا زاڵبن، هەروەك چۆن ئەنفال و كیمیا باران و شەهیدبوون، نەیتوانی كورد لەناوببات، دڵنیام كورد بەسەر ئەم بارودۆخەشدا زاڵ دەبێت و ئاڵای وڵاتی سەربەخۆی خۆی هەڵدەكات، بەو هیوایەم هەموو لایەك رێز لە خوێنی شەهیدان بگرێت .

 

زۆرترین بینراو