چەند وێستگەیەكی ژیان و خەباتی شەهیدی فەرماندە (لوقمان چەمچەماڵی)

چەند وێستگەیەكی ژیان و خەباتی شەهیدی فەرماندە (لوقمان چەمچەماڵی)

بەرەڤان شاكر سلێمان لاچ- هەولێر:
گەلی كورد، نەتەوەیەكە ساڵانێكی زۆرە لەلایان بێگانەكانەوە وڵاتەكەیان لێداگیركراوە، بەڵام ئەوەی وایكردووە كەوا لەو هەموو ساڵانەدا ئەو گەلە لەسەر پێی خۆی بوەستێت و خۆی لە لەناوچوون بپارێزێت، ئەوەیە كەوا رۆلەكانی ئەم گەلە بەردەوام ئامادەبوونە خۆیان بكەن بە قوربانی و قەلغان بۆ پاراستنی گەل و نیشتیمانەكەیان.
لەم ژمارەی هەفتەنامەی زاری كرمانجیدا باس لە چەند وێستگەیەكی ژیان و خەباتی شەهید( لوقمان چەمچەماڵی) دەكەین.
لوقمان مەحمود ئەحمەد، لە ساڵی 1972 لە بنەماڵەیەكی كوردپەروەر و خاوەن مێژوو لە ناحیەی سەنگاو لەدایك بووە.
شەهید، هەر لە ناحیەی سەنگاو دەچێتە قوتابخانە، بەڵام لەبەر خراپی بارودۆخی ئابووری خێزانەكەی نەیتوانیوە درێژە بە خوێندن بدات و هەر لە قۆناغی سەرەتایدا واز لە خوێندن دێنێت.
شەهید، هەر لە تەمەنی لاوی خۆیدا هەستی نەتەوایەتی لای گەڵاڵە دەبێت، لە ساڵی 1986 پەیوەندی بە رێكخستنەكانی پارتی دیموكراتی كوردستانەوە دەكات.
تەمەنی لاوی شەهید لوقمان هاوكات بووە لەگەڵ كۆمەڵێك روداووی زۆر ناخۆش كەوا بەسەر گەلی كوردستانەدا هاتوون، بەڵام ئەو روداووانە هاندەرێكی سەرەكی و بەهێزبوونە بۆ ئەوەی شەهید لەگەڵ چەندین گەنجی تر هەوڵبدەن بۆ ئەوەی گەل و وڵاتەكەی خۆیان لە بن دەستی ئازادبكەن.
شەهید لوقمان، لە ساڵی 1991 و هاوكات لەگەڵ دەستپێكردنی راپەڕینی سەرتاسەری گەلی كوردستان دەبێتە پێشمەرگەو چەكی شەڕەف لەشان دەكات.
لەبەر دڵسۆزی و لێهاتووی دەكرێتە جێگری بەرپرسی رێكخراوی ئەشداخ، دواتر لە ساڵی 1994، بەرپرسیاریەتی جێگری بەرپرسی هێزی 37 لە سۆپای 7ی لە شەقڵاوە پێدەسپێردرێت.
شەهید لوقمان، لە ژیانی پێشمەرگایەتیدا كەسێكی بوێر و خاوەن هەڵوێست بووە، بەردەوام هەوڵیداوە ئەو ئەركەی پێ سپێردراوە زۆر بە دڵسۆزی و ئامانەتەوە بەجێ بگەینێت، هەربۆیەش بە كەسێكی خۆشەویست ناسراوبووە لای هاورێ و هاوسەنگەرەكانیدا.
یەشداری لە پڕۆسەی رزگاری عێراقدا دەكات و رولێكی گرنگ و بەرچاوی دەبێت.
دوای دامەزراندنی فەرماندەیی زێرەڤانی، شەهید لوقمان دەكرێتە فەرماندەی فەوج لە هێزی 4 ی سۆپای 2ی زێرەڤانی.
شەهید لوقمان، وەك فەرماندەیەكی پێشمەرگە هەردەم لە ئامادەباشیدابووە بۆ بەرگریكردن لە خاك و وڵاتەكەی خۆی، ئەمە جگەلەوەی وەك فەرماندەیەك بەردەوام هاوكاری پێشمەرگەكانی كردووە و بەتەنگ داواكاری و دەنگیانەوە چووە.
دوای پەیدابوون و پەلهاوێشتنیانی تیرۆرستانی داعش بۆ سەر خاكی پیرۆزی كوردستان، شەهید هەر زوو بەخۆی و هێزەكەیەوە لە سەنگەرەكانی پێشوە ئامادەدەبێت بۆ بەرگریكردن لە دەستكەوتەكانی كوردستان.
شەهید، رۆلێكی بەرچاوی گێڕاوە لە تێكشكاندنی تیرۆرستانی داعشدا، بەشداری لە هەریەك لە شەڕەكانی(گوگجەلیل، عەلە ڕەش، حەساو، چیای زەردەك، حەسەن شام، شەنگال، خازر، زوومار، رەبیعە، میحوەری خازر)دا كردووە و رولێكی بەرچاوی هەبووە، ئەمە جگەلەوەی شەهید لوقمان برایەكی بەناوی (سیروان چەمچەماڵی)، شەهیدبووە.
شەهید، لە ژیانی پێشكەرگایەتیدا دوو جار برینداردەبێت، بەڵام برینداربوون نابێتە رێگر بۆ ئەوەی شەهید لە بەرگریكردن لە وڵاتەكەی دووربكەوێتەوە.
رۆژی 28-7-2016، دوای دەستپێكردنی هێرشی پێشمەرگە بۆ ئازادكردنی گوندی موفتی، هێزەكانی پێشمەرگ دەكەونە شەڕێكی گەورە لەگەڵ تیرۆرستانی داعش، لەم شەڕەدا زیانی زۆر بە داعش دەگەینرێت و تیرۆرستانی داعش تێك دەشكێنرێن، بەڵام بەداخەوە لەو شەڕەدا عەقید لوقمان و مولازمی یەك سالار سەعید، شەهید دەبن و دەگەن بە كاروانی شەهیدانی كوردستان، شەهیدبوونی عەقید لوقمان كاریگەریەكی زۆری لەسەر هاوسەنگەرانی هەبووە، بەڵام وەك ئەوان دەیلێن: بەڵێنمان داوە تا دوا دڵۆپی خوێن ئەم رێگایە بەرنەدەین و خەبات لەپێناو سەرخستنی دۆزی كوردستان بكەین.
دلبەر خان، هاوسەری شەهید دەڵێت: لە ساڵی1992من و شەهید لوقمان ژیانی هاوسەرگیریمان پێكهێنا، لەو ماوەیەی پێكەوبووین هەردەم پیاوێكی دڵ پاك و خاكی بوو، هەردەم حەزی لە هاوكاریكردن دەكرد، ئەگەرچی ئەو زۆربەی كاتەكان لەناو پێشمەرگە بوو، بەڵام هەركات بگەڕابایەوە ماڵەوە دەم بە خەندە بوو، هەردەم بە قەسە خۆشەكانی ئێمەی دێنایە پێكەنین.
هاوسەری شەهید بەردەوام بوو لەسەر ووتەكانی و گووتی: ئەگەرچی شەهید فەرماندەیەكی سەربازی بوو، بەڵام هەرگیز ئەو چاوی لە پۆست و پلە نەبوو، ئەو پیاوی تەنگانە بوو، بۆ من تەنها هاوسەر نەبوو، بەڵكو شەهید وەك چیایێك بوو بۆ من.
بارزان مەحمود، برای شەهید دەڵێت: من ئەفسەربووم لەلای شەهید، ئەو هیچ كات جیاوازی نەدەكرد لە نێوان پێشمەرگەكان، شەهید هەردەم كەسی بووێر و چاونەترسی خۆشدەویست. ئەگەرچی ئەو فەرماندەمان بوو، بەڵام وەك پێشمەرگەیەكی سادە كاری ناو بارەگای دەكرد، زۆرجار خۆی بارەگایەكانی پاكدەكردەوە، ئەمە جگە لەوەی بۆ هەر هێرش و شەڕێك یەكەم كەس بوو، زۆرجار لە شوێنێكی تر شەڕدەبوو، ئەو حەزی دەكرد بەشداربێت و هاوكاری پێشمەرگەكان بكات.
لە كۆتایدا بنەماڵەی شەهیدی فەرماندە لوقمان مەحمود دەڵێن: شەهید لوقمان یەكەم شەهید و دوا شەهیدی بنەماڵەكەمان نییە، ئێمە هەموومان بە روح و گیانەوە خۆمان قوربانی خاكی پیرۆزی كوردستان دەكەین.
هەردەم سەربەرزین بەخەبات و تێكۆشانی شەهید لوقمان و تەواوی شەهید و پێشمەرگەكان، با دوژمنان بزانن تا ئەوان یەك لوقمانمان لێ شەهید دەكەن، ئێمە هەزاران لوقمانی تر دروست دەكەین، كوردایەتی و پێشمەرگایەتی بۆەتە خوێنی ناو جەستەمانەوە، لێرەشەوە جارێكی تر، بەڵێن بە شەهید سیروان و شەهید لوقمان دەدەین تا دوڵۆپی خوێن پارێزگاری لەم خاك و وڵاتە دەكەین.

زۆرترین بینراو