چەند وێستگەیەكی ژیان و خەباتی شەهید فەرماندە هادی ئامۆكەی

چەند وێستگەیەكی ژیان و خەباتی شەهید فەرماندە هادی ئامۆكەی

بەرەڤان شاكر سلێمان لاچ- هەریر:
ئەگەر بگەرێین بەناو لاپەرەكانی مێژووی خەباتی گەل و وڵاتاندا، دەبینین كورد تاكە میللەتە دوای سەدان ساڵ لە خەبات، سەرەڕای هەزاران دوژمن بەڵام هەرگیز ئامادە نیە دەست لە مافی سەربەخۆی و ئازادی بەربدات. بێگومان ئەم خەباتە و ئەو هەوڵدانە بۆ بەدەست هێنانی ئازدای بە خوێنی چەندین لاو و ڕۆلەی ئەم نیشتیمانە بووە.
لەم ژمارەی هەفتەنامەی زاری كرمانجیدا تیشك دەخەینە سەر چەند وێستگەیەكی ژیان و خەباتی شەهیدی فەرماندە.
شەهید( هادی شێخ عومەر سورچی)، ناسراو بە هادی ئامۆكەی.
شەهید هادی لە ساڵی 1970، لە گوندی ئامۆكای سەر بە قەزای شەقڵاوە لەدایك بووە.
خوێندی سەرەتای لە گوندی ئامۆكا دەست پێكردووە و بۆ خوێندنی قوناخی ناوەندیش رووی لە شارەدێی هەریر كردووە. لە ساڵی 1985، شەهید هادی ئامۆكەی پەیوەندی بە رێكخستنەكانی پارتی دیموكراتی كوردستانەوە دەكات لە ناوچەی شەقڵاوە. لە ساڵی 1986 دەبێتە پێشمەرگە و چەكی شەڕەف لە شان دەكات. شەهید هادی هەر لە تەمەنی لاوی خۆیدا، دەستی داوەتە خەبات و سڵی لە پاراستنی كوردستان نەكردووە. لە ساڵی 1988 بە بڕیارێكی لقی دووی پارتی دیموكراتی كوردستان شەهید هادی لەگەڵ چەند پێشمەرگەیەكی تر دەكرێنە مەفرەزەی پارتی زانی و لە ناوچەكانی ( دۆڵی بالیسان، بەنی هەریر، هەریر، ناوچەی خەیلانەتی)، چەندین چاڵاكی گرنگ ئەنجام دەدەن و گورزی گەورە لە حكومەتی عێراق دەدەن.
لەو ئەركەی دا شەهید هادی توانی لە ماوەیەكی كورتدا ئەزمونێكی زۆر كۆبكاتەوە. لە راپەڕینی بەهاری ساڵی 1991 ڕۆلێكی بەرچاوی هەبووە لە ئازادكردنی (هەریر، شەقڵاوە، ئاكرێ، كەركوك).
شەهید هادی لە ساڵی2003 و لە پڕۆسەی رزگاركردنی عێراقدا دەورێكی باڵای گێراوە و یەكەم پێشمەرگە بووە بپەرێتەوە لە جسری خازر.
هادی ئامۆكەی لە هەمبەر لێهاتووی و قاڕەمانیەتیدا چەندین ئەركی سەربازی پێسپێردراوە، دوا جار و لە ساڵی2007، لەسەر فەرمانی مەسعود بارزانی فەرماندەی گشتی هێزە چەكدارەكانی كوردستان پۆستی فەرماندەی بەتەلیونی (1) لە هێزی(1)ی سەر بە فەرماندەی سپیلكی پێ سپێردراوە.
دوای هاتنی تیرۆرستانی داعش بۆ سەر سنورەكانی هەرێمی كوردستان، شەهید هادی وەك فەرماندەیەكی سەربازی دەورێكی باڵا دەگێرێت لە پڕۆسەی راوەدوونانی تیرۆرستانی داعش لە هەر یەك لە ناوچەكانی( شەنگال،رەبیعە، سەدەی موسڵ).
عومەر ئاغا برای شەهید هادی ئامۆكەی و هاوسەنگەری شەهید هادی دەڵێت" ئێمە لە میحوەری رەبیعە بووین، من ریشم دەتراشی و لایەكی ریشم تەواوكرد بوو، شەهید لە بن خێمەدا هاتەدەر و هاواری كرد عومەر داعش هێرشی هێناوە، هێرشی داعش كاتژمێر 6:20 خولەكی بەیانی دەستی پێكرد، لەو كاتەدا بینیمان چەند خۆكوژێكی داعش بەرەو ساترەكای ئێمە دەهاتن، سەرەتا هەوڵیاندا بێنە ناو بارەگایەكەماندا بەڵام شەهید هادی ئۆتۆمبێڵێكی بە چەكی ئێس پی جی تەقاندەوە، دواتر شەر دەستی پێكرد، لە هەموو لایەكەوە هێرشیان بۆ ئێمە هێنا، شەهید هادی بەو پەڕی توانای خۆیەوە شەڕی دەكرد، دەمێك بە قەناسە شەڕی دەكرد، دەمێك بە بیكەیسی، دەمێك بە ئێس پی جی، سەرەتا هەموو هەوڵمان بۆ ئەوە دا لێنەگەرێین داعش بێتە ناو ساترەكاندا و لەخۆمان دووری بخەینەوە، هەرچەندە ئەم وویستەمان زۆری كێشا بەڵام دواتر داعشمان لە ساترەكاندا دوور خستەوە، دۆخەكە ئارام بوو، شەهید هادی گووتی خۆتان بشارنەوە پیلانێكیان هەیە، لەو كاتەدابوو ئەو ساترەی ئێمە دروستمان كردبوو، لە یەكێك لە كونەكانەوە گولەی قەناسەیەك بەر سینگی شەهید هادی كەوت، من و ئەو لە تەنیشت یەكتر بووین، بوویە هادی كەوتە سەر چوكم و تەنها گووتی" عومەر من بریندارم و شەهید دەبم بەڵام ئێوە شەڕ بكە و كۆڵ نەدە".
ئەمەی گووت و زانیم رۆحی دەرچوو، تەنها ئەوەی پێمكرا چاوەكانم داخست و خاولیێكم بەسەردادا بۆ ئەوەی توزی قەناسەكەمی لەسەر نەنیشێت، شەهید كردنی برام لە پێش چاوی من بۆ من وا ئاسان نەبوو بەڵام بەردەوامیمان بە شەڕەكەدا، هەتا یەك داعش مابوو ئێمە نەوەستاین. لەو شەڕەدا زیانی زۆرمان بە داعش گەیاندن نزیكەی 50 كوژراویان لەنزیك ساترەكانی ئێمە كەوتبوون، شەرەكە نزیكەی پێنج سەعات و نیو خایاندی".
تارق سلێمان هەرنی فەرماندەی فەرماندەی سپیلك سەبارەت بە كەسایەتی شەهید هادی دەڵێت" هادی ئامۆكەی جگە لەوەی فەرماندەیەكی سەربازی بوو، كەسێكی خۆشەویست بوو لای هەموو ئەفسەر و پێشمەرگەكان. هادی توانیبووی خۆی كەسایەتیەك بۆ خۆی دروست بكات و خۆی پێشبێخیت، هەر كاتێك ئەركێكمان بە هادی سپاردبا بێ خەمبووین لەوەی زۆر بە دڵسۆزیەوە ئەركەكەی بەجێ دەگەینێت. هەر دەم دەمان زانی بۆ بەجێ گەیاندنی ئەركی خۆی ئامادەیە گیان بسپێرێت. كەسێكی رەوشت بەرز و بیر فراوان بوو، كەسایەتیەكی بەهێزی هەبوو، هەموو كات ئامادەبوو بۆ بەجێگەیاندنی ئەرك، قەسە خۆشەكانی هەردەم هێز و توانای بە پێشمەرگەكان دەدا. بەڵام بە داخەوە هادی ئامۆكەی لە رۆژی 18-11-2014 بەجێی هێشتین، بەراستی شەهید بوونی برینێكی گەورەبوو بۆ ئێمە، لە دوای شەهید بوونیەوە تاكو ئێستا نەمان توانیوە شوێنی ئەو پڕبكەینەوە، دواجار بەڵێن بە رۆحی شەهید هادی ئامۆكەی و تەواوی شەهیدانی رێگای رزگاری خوازی كوردستان دەدەین، لەسەر رێبازی ئەوان بەردەوام بین و پارێزگاری لە خاكی پیرۆزی كوردستان بكەین".

 

بابەتى پەیوەندیدار جۆراوجۆر

زۆرترین بینراو