چەند وێستگەیەكی ژیان و خەباتی شەهید محەمەد ئیسماعیل

چەند وێستگەیەكی ژیان و خەباتی شەهید محەمەد ئیسماعیل

بەرەڤان شاكر سلێمان لاچ- دهۆك:
ئێستا كوردستان ئازادە و گەلی كوردستان خاوەنی حكومەتێكە، هەڵبەت ئەم حكومەتە و ئەم ئازادییە بەرهەمی ماندوبوون و خەباتی گەلی كوردستانە، ئەو گەلەی كەوا ماوەی سەدان ساڵە خەبات لە پێناو سەربەخۆی و ئازادی دەكەن. بۆیە هەردەم دەبێت گەلی كوردستان رێز لەو كەسانە بگرێت كەوا لەپێناو ئەم سەربەخۆی و ئەم ئازادییەدا گیانی خۆیان فیدا كردووە. لەم ژمارەی هەفتەنامەی زاری كرمانجیدا دەگەرێینەوە بۆ سەر چەند وێستگەیەكی ژیان و خەباتی (شەهید محەمەد ئیسماعیل سەلیم). شەهید محەمەد ئیسماعیل، لە ساڵی 1975 لە گوندی چیێ لە دەڤەری دۆسكی ژووری لە دایك بووە. بنەماڵەی شەهید محەمەد لە ساڵی 1975 و دوای نسكوی شۆڕشی ئەیلوول ئاوارەیی رۆژهەڵاتی كوردستان بوونە.
شەهید محەمەد، هەر لە سەرەتای تەمەنیدا ئاشنای ژیانی ئاوارەیی و دەربەدەری بووە، ئەمەش راستەوخۆ كاریگەری لەسەر بیروبۆچوونە نەتەوەییەكانی ئەو هەبووە.
شەهید، لە رۆژهەڵاتی كوردستان دەست بە خوێندنی سەرەتایی دەكات و هەر لەوێش كۆتایی بە قۆناغەكانی خوێندنی ناوەندی و ئامادەیی دێنێت.
دوای راپەڕینی بەهاری ساڵی 1991، پەیتا پەیتا خەڵكی كوردستان ئەوانەی لە ترسی حكومەتی بەعس كوردستانیان بەجێهێشت بوو گەڕانەوە بۆ سەر خاك و نیشتیمانی خۆیان، شەهید محەمەد و بنەماڵەكەی لە ساڵی 1999 دەگەرێنەوە بۆ باشووری كوردستان و دەست بە ژیانێكی نوێ دەكەن.
شەهید، لە تەمەنی 16 ساڵیدا چەكی شەڕەف لە شان دەكات و وەك پێشمەرگەیەك لە سۆپای سیدەكانی سەر بە فەرماندەی هەڵگۆرد دەست بە خەباتی نەتەوەیی خۆی دەكات، لەم وێستگەیەوە چیرۆكی گیانفیدایی و خەباتی شەهید محەمەد دەست پێدەكات. دواتر بەشداری لە خولی ئەفسەران دەكات لە كولێژی سەربازی زاخۆ و بە پلەی یەكەم دەردەچێت، دواتر دەگەرێتەوە و وەك ئەفسەر لە لیوای 7ی پیادەی سۆران درێژە بە خەباتی خۆی دەدات.
نەقیب محەمەد عەبدلرەحمان، هاورێی نزیكی شەهید محەمەد، سەبارەت بە كەسایەتی شەهید محەمەد دەڵێت: بۆ من ئەستەمە بتوانم وەسفی شەهید محەمەد بكەم، ترسم لەوەیە نەتوانم حەقی خۆیی پێبدەم. بەڵام شەهید كەسایەتییەكی رەوشت بەرز بوو، كەسێكی هەست ناسك و بەزەیی بوو، نەرم و نیان و بەوەفا بوو، هەردەم ئامادەبوو قۆربانی لە پێناو هاورێیەكانی بدات.
لەو ماوەی خەریكی كاركردن بووین لەسەر ژیانی شەهید محەمەد، ئاشنای هاورێیەكی شەهید محەمەد بووین، هاورێیەك كەوا تا رۆژی شەهیدبوونیشی شان بەشانی ئەو بووە، ئەویش عەگید دۆسكییە، عەگید، سەبارەت بە شەهید دەڵێت: شەهید بۆ من وەك ئاو و هەناسە وابوو، ئەستەم بوو بێ ئەو بژیم، كاتێك ئەو شەهیدبوو من لە لای ئەو بووم، بەڵام باوەرم نەدەكرد كەوا شەهیدبووە. بۆیە لە رووی دەروونیەوە زۆر شڵەژام، تا وام لێهات تووشی نەخۆشی دەروونی بووم و لە خۆمەوە قەسەم دەكردن و دەچوومە دەشت و چیایەكان، ماوەیەكی زۆرە هەوڵدەدەم بۆ ئەوەی بیرەوەریەكانی ئەوم لا نەمێنن، بۆیە ناتوانم سەبارەت بە شەهید هیچ بڵێم تەنها ئەوە نەبێت كەوا شەهید محەمەد بۆ من لە هەموو دونیا ئازیزتر بوو.
عەلی محەمەد، لە لایێك هاورێ و لە لایێك ئامۆزای شەهید محەمەدە ئەو دەڵێت: من و شەهید هەر لە منداڵییەوە پێكەوە بووینە، تا ئەو رۆژەی شەهیدیش بوو لە یەك سەنگەردا بووین.
عەلی زۆر بە خەمناكیەوە بەردەوام و گووتی: دوای ئەوەی هێزەكانی پێشمەرگە لە شەنگال و چەند شوێنێك پاشەكشێیان كرد، ئێمە بارەگای خۆمان هێنایە چیای باشیك، لەوێ چەند خانویێكمان كردە بارەگای لیوای 7ی پیادە، سەرەڕای ئەوەی چەند ساترێكمان دروستكرد، بەڵام شوێنەكە دیاربوو و رۆژانە چەندین میوانمان بۆ دەهاتن. رۆژی 31-8- 2014 ئێمە لەگەڵ لیوا بەهرەم دەچووین بۆ شوێنێك، نەقیب محەمەد خەریكی خۆ ئامادەكردن بوو، پێم گووت تۆ مەهێ من دەڕووم، یان ئەوەتا دەبێت تۆ بچی یان من، ئەویش رازی بوو كەوا لە بارەگا بمێنێتەوە.
دواتر لە بەردەم بارەگای لیوامان چەند پێشمەرگەیەك كۆدەبنەوە و نەقیب محەمەد دەچێت بۆ ئەوەی ئاگاداریان بكاتەوە لەوەی ئەو قەلەبالغیە نەهێڵن نەكا داعش دەست بە قەسفكردن بكات، لەو كاتانەدابوو نزیكەی 14 هاونێك بەرەوڕووی ئەوان دێن و بە داخەوە چەند ساچمەیەك بەر سەر و پشتی شەهید محەمەد دەكەوێت و هەر لەوێ شەهید دەبێت. بەداخەوە لەو بۆردومانەدا نەقیب محەمەد ئیسماعیل و رائید رەشید هەركی شەهید بوون و چەند پێشمەرگەیەك برینداربوون.
شەهیدبوونی شەهید محەمەد بۆ ئێمە خەسارەتێكی گەورە بوو، تا ئێستاش شوێنی بە بەتاڵی ماوەتەوە.
شایەنی باسە شەهید محەمەد جگە لە راپەڕاندنی ئەركی سەربازی خۆی، یاریزانێكی لێهاتووی یاری تێكواندوو بووە، وەك مامۆستایەك لە هەوڵدابووە بۆ ئاشناكردنی كۆڕ و كچانی كوردستان بەو یارییەو و چەندین جار خەڵاتی پێبەخشراوە و دواجا پشتێنی رەش وەردەگرێت.
هەوار تەحسین، هاورێ و هاوسەنگەری شەهید دەڵێت: ئەو رۆژەی نەقیب محەمەد شەهید بوو، هەر هەمان رۆژ پلەی سەربازی ئەو بەرز بوو بۆ پلەی رائید و جەنابی لیوا بەهرام پێگووت بۆ پلە نوێیەكەت نابەستی؟ ئەویش گووتی ناردومەتە دهۆك بۆ ئەوەی پلەی سەرشانم بۆ بێنن و دواتر دەبەستم. هەرچەندە تەمەن رێگەی نەدا و پلەی نوێی سەربازی ببەستێت، بەڵام پلەی شەهیدبوونی بە نسیب بوو.
شەهید محەمەد، لە ماوەی خزمەتكردنیدا چەندین ئەرك و بەرپرسیاریەتیان پێ سپاردوو و دواجار دەكرێت بە جێگری فەرماندەی سریە لە لیوای 7ی پیادەی سۆران.
لە كۆتایدا دەڵێین، مردن رێگایێكە و هەموومان پێیدا تێدەپەڕین، بەڵام كەمن ئەوانەی وەك شەهید محەمەد بە سەربەرزییەوە گیانی خۆیان دەبەخشن و تا ئەبەت ناوی خۆیان بە سەربەرزیەوە دەهێڵنەوە.

 

زۆرترین بینراو