چەند وێستگەیەك لە خەباتی  شەهید عەبدولواحید گوانی

چەند وێستگەیەك لە خەباتی شەهید عەبدولواحید گوانی

بەرەڤان شاكر سلێمان لاچ- سۆران:
كاتێك دەست بە خوێندنەوەی مێژووی گەلی كوردستان دەكەین ئاشنای زۆر هەوراز و نشێو دەبین، كەوا گەلی كوردستان پێیدا تێپەڕیوە، بەڵام گەلی كوردستان هیچ كاتێك بێ هیوا نەبووە و بەردەوام بووە لەسەر داواكردنی مافی خۆی. هەڵبەت ئەمەش قوربانی زۆری وویستووە و گەلی كوردستان درێغی نەكردووە لە قوربانیدان و خۆ فیداكردن.
لەم ژمارەی هەفتەنامەی زاری كرمانجیدا مەبەستمانە باس لە چەند وێستگەیەك لە ژیان و خەباتی شەهید ( عەبدولواحید گوانی )بكەین.
شەهید عەبدولواحید، لە ساڵی 1946 لە داوێنی چیای زۆزك و لە گوندی گوان لەدایك بووە، وەك هەر منداڵێكی ئەو كاتی كوردستان و لەبەر بارودۆخی ئەو كاتی كوردستان نەیتوانیوە بچێتە قوتابخانە، بەڵام هەردەم ئارەزووی بووە بخوێنێت.
شەهید، هەر لە تەمەنی لاوی خۆیدا هەستی نیشتیمان پەروەری لای گەڵاڵە بووە و هەر ئەم هەستە نەتەوەییە وایكردووە كەوا پەیوەندی بە رێزەكانی رێكخستنی پارتی دیموكراتی كوردستانەوە بكات، لە كۆنگرەی شەشەمی پارتی دیموكراتی كوردستاندا شەهید رۆلێكی دیاری هەبووە لە ناوچەی رواندز، شەهید لە ماوەیەكی كەمدا توانیویەتی هەبوونی خۆی بسەلمێنێت و شوێنی خۆی لە دڵی هەموو لایەكدا بكاتەوە، هەر بۆیەش لە ماوەیەكی كەمدا دەكرێتە بەرپرسی شانە لە لێژنەی ناوچەی دیانا.
شەهید عەبدولواحید لە ساڵی 1974 وە پەیوەندی بە رێزەكانی پێشمەرگەوە دەكات و دەكرێتە سەرپەل لە بەتالیونی شەهید عاسێ كەركوكی.
موشیر گوانی، هاورێ و هاوسەنگەری شەهید دەڵێت: ئێمە پێشتر پێشمەرگەبووین لەگەڵ حاجی بێرۆخی، بەڵام كە عەبدولواحید گوانی هاتە ناو رێزەكانی شۆرش ئێمەش پەیوەندیمان بە ئەوەوە كرد. شەهید كەسێكی نەرم و نیان و لەسەرخۆ بوو، كەسێكی تێگەیشتوو و دووربین بوو، كوردپەروەر بوو، هەرچی سەبارەت بە شەهید عەبدولواحید بڵێم ناتوانم بە تەواوی وەسفی كەسایەتی ئەو بكەم.
مام موشیر، دەمانگەرێنێتەوە بۆ داستانی چیای گوڕەز و دەڵێت: لە گوانەوە بەرێكەوتین بۆ چیای گوڕەز، ئێمە سێ بەتەلیون بووین، بەتەلیونی حاجی بێرۆخی، بەتەلیونی مستەفا نێروەیی، بەتەلیونی شەهید عاسێ كەركوكی بووین، دوای نوێژی ئێوارە پێشمەرگە لە دیاناوە بە تۆپ قەسفی دوژمنی دەكرد بۆ ئەوەی ئاگایان لە ئێمە نەبێت تا دەگەینە سەرەوە، ئێمە چووینە پێشەوە و گەیشتینە سیم و ژمارەیكی زۆری ئەلغاممان لابرد، دواتر چووینە پێشتر و شەڕ لە هەموو لایێكەوە دەستی پێكرد، ئێمە بە ئەندازیەك لێكنزیك بووین، بینیم كەوا دوژمن رۆمانەیەكی فڕێدا و بە دەستی شەهید موسا شێمەت مزوری كەوت، لەوێ هەر یەك لە موسا مزوری و عەبدولواحید گوانی شەهید بوون و وەسوو گوانی برای عەبدولواحید برینداربوو، ئێمە كشاینەوە و دوژمن شكەستی تێكەوت و ڕەبایەكانی خۆیان بەجێهێت، من لەگەڵ بریندارەكان چوومە ئێران، دوای نزیكەی هەفتەیەك كە چووینە شوێنی شەڕەكە، بینیمان دوژمن ژمارەیەكی زۆری كوژراوی بەجێهێشتوە و بوون هەموو شوێنێكی تەنیبوو.
عەبدولرەحمان گوانی، كۆڕی شەهید دەڵێت: بیرم دێت باوكم پێشڕەوی كۆمەڵێك لە پێشمەرگە بوو، لە گوانەوە بە نیازبوون بچنە چیای گۆڕەز، من لە ماڵی خاڵم مامەوە و ئەوانیش رۆیشتن.
رۆژێك لە گوندبووم پێشمەرگەیەك بەرەو ماڵی ئێمە هات و بووە قەرەبالغی و منیش نەمدەزانی ئەو قەرەبالغییە چییە، بەڵام دواتر زانیم كەوا باوكم شەهیدبووە و وەسووی مامیشم بریندار بووە.
عەبدولرەحمان بەردەوام و گووتی: هیچ هەستێك لەوە ناخۆشتر نییە كەوا دەستی بەزەییت بەسەردا بێنن، هیچ شتێك بۆمن لەوە ناخۆشتر نەبووە، بیرم دێت لەبەر حكومەت نەیان توانی باوكم لە گوندی گوان بشارنە، بۆیە بردیانە سیتكان و لەوێیان شاردەوە، كە تەڕمی وەسووی مام گەڕایەوە ئەویش لای باوكم نێژرا. دوای باوكمان لە لای باپیرم ماینەوە، بێ باوكی برینێكی گەورەیە و هیچ شتێك ناتوانێت ئەو برینە پڕبكاتەوە، كاتێكیش ئێمەیان ڕاگواستە بۆ باشووری عێراق باپیرم دایكی منی بە كچی خۆی و ئێمەشی بە كۆڕی خۆی ناونووس كرد، هەڵبەت ئەمەش لەبەر ئەوەبوو بۆ ئەوەی حكومەت نەزانێت كەوا باوكمان شەهیدە، ئەگەر حكومەت زانیبای ئەوا زۆر ئەشكەنجەیان دەداین.
ئێمە لە چیا ژیابووین كەچی ئێمەیان بۆ بیابانی چوڵ و بێ دەنگ بردبوو، هەرلەوێ و لەسەر ناسنامەی باپیرم چوومە قوتابخانە، كاتێك دەنگوباسێك لە كوردستانەوە بۆ خەڵكی دەهات هەموویان دڵخۆش دەبوون، بۆ ساڵی پاشتر ئێمەیان گەڕاندەوە، كاتێك گەڕاینەوە باپیرم ئێمەی لەسەر ناوی خۆی لادا و لەسەر وەسیەتی باوكم بەردەوام بووم لەسەر خوێندن.
شەهید عەبدولواحید یەك لەو پێشمەرگانەبووە كەوا سەرەڕای تەمەنێكی كەمی هەبوو هەردەم كەسێكی گەورە و پیاو ماقوڵ بووە، لە رێكخستنەكانی ناو پارتییەوە دەچێتە ناو هێزەكانی پێشمەرگە، لەوێ ئەرك و رۆلێكی گەورە و بەرچاوی گێڕاوە، هەردەم جێگای متمانەی كەسانی دەوروبەر بوویە، بەڵام بەداخەوە و لە رۆژی 17-4-1974لە داستانی چیای گوڕەز لەگەڵ برایەكی خۆی بە ناوی وەسوو گوانی شەهید دەبێت و دەگاتە كاروانی شەهیدانی كوردستان.
بنەماڵەی شەهید دەڵێن: شەهید عەبدولواحید یەكەم شەهید و دوا شەهیدی بنەماڵەكەمان نەبووە، هەردەم سەربەرزین بەو خەباتەی لە پێناو كوردستان كردووە، ئێمە شۆرشمان كردووە و ئێستاش دڵخۆشین كەوا دەبینین كورد و كوردستان ئازادە، بەو هیوایەین كەوا رۆژێك بێت و دەوڵەتی سەربەخۆی كوردستان ببینین.

زۆرترین بینراو