چەند پرۆژەیەكی گەشتیاری لە دەڤەری سۆران جێبەجێ دەكرێن

چەند پرۆژەیەكی گەشتیاری لە دەڤەری سۆران جێبەجێ دەكرێن

ڕائیب شێروانی: بارزان محەمەد، بەرێوەبەری بەڕێوەبەرایەتی گەشتوگوزاری سۆران لە دیدارێكدا لەگەڵ هەفتەنامەی زاری كرمانجی گوتی:" بەمەبەستی هێنانی گەشتیاری ئێرانی بۆ ناوچە گەشتوگوزاریەكانی دەڤەری سۆران 18 كۆمپانیای ئەو بوارە لە وڵاتی ئێران سەردانی ناوچەكەیان كرد و سەرسامی خۆیان بە سرووشت و جوانی ناوچە گەشتیارییەكان دەربڕی و بەڵێنی هێنانی گڕووپی گەشتیاریاندا. گوتیشی:" رۆژانە زیاتر لە 10 هەزار گەشتیار سەردانی شوێنە گەشتیارییەكانی دەڤەری سۆران دەكەن، كۆمەڵێك پرۆژەی دیكەی گەشتیاری لەناوچەكە دروست دەكرێن، ئەوەش هاندەرێكی باش دەبێت بۆ ڕاكێشانی گەشتیاری زیاتر بۆ ناوچەكە.
بەرێوەبەری بەڕێوەبەرایەتی گەشتوگوزاری سۆران رایگەیاند:" شاندێكی كۆمپانیا گەشتیارییەكانی وڵاتی ئێران كە پێكهاتبوون لە ١٨ كۆمپانیا لە شار و شارۆچكەكانی وڵاتەكە سەردانی سنوورەكەیان كرد و لەسەر هێنانی گەشتیار بۆ ناوچە گەشتیارییەكانی دەڤەرەكەمان رێكەوتین.
بارزان، ئەوەشی گوت:" كۆمپانیاكان لە رێگەی گڕووپی گەشتیاری سەردانی دەڤەرەكەمانیان كرد و سەرسامی خۆیان بە سرووشت و جوانی ناوچە گەشتیارییەكان دەربڕی و بەڵێنی هێنانی گڕووپی گەشتیاریاندا، بەمەش تەكانێكی تر لە سێكتەری گەشتیاری دەڤەرەكەمان دێتە ئاراوە.
بەرێوەبەری بەڕێوەبەرایەتی گەشتوگوزاری سۆران روونیشیكردەوە:" ئەو كۆمپانیانە پێشتر گەشتیاریان دەبردە شاری وان لە توركیا، بەڵام ئێستا دەیانەوێت گەشتیار بۆ سنووری پارێزگای هەولێر و شوێنە گەشتیارییەكانی سۆران بهێنن، شوێنە گەشتیارییەكانیان زۆر بە دڵ بوو و بەڵێنیان دا كە بە شێوەی گروپات گەشتیار بۆ سنووری سۆران بهێنن، بۆیە بەردەوام لەسەر خەتین لەگەڵ كۆمپانیا گەشتیارییەكان بۆ ئەوەی گەشتیاری زیاتر بێنە دەڤەری سۆران، شاندێكی دەستەی گەشتوگوزاری هەرێمی كوردستان سەردانی دیاربەكری كرد، لەو ماوەیەدا سەردانی شاری وان دەكەین، بەردەوام دەگەڕێین بۆ ئەوەی بتوانین گرووپاتی گەشتیاری بهێنینە هەرێمی كوردستان.
بەرێوەبەری بەڕێوەبەرایەتی گەشتوگوزاری سۆران دەشڵێ:" رۆژانی هەینی و شەممە زیاتر لە 10 هەزار گەشتیار سەردانی شوێنە گەشتیارییەكانی دەڤەری سۆران دەكەن، رۆژانی ئاسایی نزیكەی 5 هەزار گەشتیار سەردانی ئەو ناوچانە دەكەن.
بارزان محەمەد، ئاشكراشی كرد:" كۆمەڵێك پرۆژەی گەشتیاری رەوانەی سەرووی خۆمان كردوونە، چاوەڕوانی رەزامەندی دەكەین، هەر كاتێك رەزامەندی لەسەر درا كۆمەڵێك گۆڕانكاری لەناوچە گەشتیارییەكان روودەدەن، ئەوەش هاندەرێكی باش دەبێت بۆ ڕاكێشانی گەشتیاری زیاتر بۆ ناوچەكە".

 

زۆرترین بینراو