چەند گەڕەكێكی رواندز پێویستیان بە خزمەتگوزارییە

چەند گەڕەكێكی رواندز پێویستیان بە خزمەتگوزارییە

محەمەد ئامۆكەیی- رواندز: لە قەزای رواندز چەند گەڕەكێك بەدەست نەبوونی پڕۆژەی خزمەتگوزاری رێگاو بان دەناڵێنن و داوادەكەن لایەنی پەیوەندی داری قەزایەكە هەوڵەكانیان بخەنە گەڕ بۆ گەیاندی خزمەتگوزارییەكان، زاری كرمانجی كێشەو گرفتی دانیشتوانی چەند گەڕەكێكی گەیاندۆتە شارەوانی رواندز.
هاووڵاتیانی گەڕەكی شەهیدانی رواندز ئاماژە بەوە دەكەن" چوار كۆڵانی گەڕەكی شەهیدانی رواندز كە زیاتر لە (60) ماڵ دەبێت داوا لە لایەنی پەیوەندی دار دەكەین خزمەتگوزاریان بۆ بچێت، ئەوان بۆ ئەوە بەرپرسیارەتیان پێدراوە بەدەم داواكاری خەڵكەوە بێن و وڵامی كێشەو گرفتەكان بدەنەوە، نەك خۆیان بدۆزنەوە لە گرفتەكانی دانیشتوان."
ئەوەش دەڵێن" چەندین جار بۆ گەیاندی كێشەو گرفتی ئەو گەڕەكە بە نووسراو و سەردان چوینەتە لای قائیمقام و شارەوانی، كەچی هیچ وەڵامێكیان پێ نەبووە، لێیان دەپرسین" ئایا هۆكار چییە ئەو پرۆژەییە تەواو ناكرێت چونكە نزیكی 50% كارەكان تەواوبوونەو نیوەكەی تر بۆ جێ بەجێ ناكرێت."
هاووڵاتیەكی ئەو گەڕەكە باس لەوەش دەكات" لە ساڵی 2012وە ئەوە حاڵی ئێمەیەو كاتی قەیرانی دارایی هەبوو هیچ داواكاریمان نەبوو لەبەر ئەوەی هەموومان ئەو بارە خراپە داراییەی كوردستانمان لەبەرچاوبووە، بۆیە دوای نەمانی قەیرانی دارایی و باشبوونی دۆخی ئابووری حكومەت و دەستپێكردنەوەی پڕۆژەكان لە هەرێمی كوردستان، داوادەكەین بەرپرسانی شار واز لەو كەمتەرخەمییە بێن و خزمەتی هاوشاریان بكەن." یان خوود لێپێچینەوە لەگەڵ خاوەنی پڕۆژەكەش بكەن بۆ لێی ناپرسن هۆكار چییە وا كەمتەرخەم و دەستە وەستان ماون ئەو كارەتەواو ناكەن، هیوادارین داواكارییەكەمان بگاتە شوێنی مەبەست و بەدواداچوونی تەواوی بۆ بكرێت، پارەیەی ئەو پڕۆژەیە گوایە وەرگیراوە چی بەسەر هاتووە ئەگەر پڕۆژەكە گەڕێنراوەتەوە بۆ حكومەت بۆچی سەرۆكی شارەوانی رواندز و قائیمقام خەمێك ناخۆن.
لای خۆشیەوە نەجات مەجید، سەرۆكی شارەوانی رواندز، بە زاری كرمانجی راگەیاند" ئاگاداری ئەو گرفتەین و چەندین جاریش هەوڵمان داوە بۆ قیڕتاوكردنی ئەو كۆڵانانە، بەڵام ئەوكاتەی پڕۆژەی قیڕتاوكردن بۆ ئەو شوێنانە دەرچوو قەیرانی دارایی بەسەر داهات و بۆیە نەمان توانی خزمەتگوزاری پێویست بگێنین بەو شوێنانە، دڵنایی دانیشتوانی ئەو گەڕەكانە دەكەمەوە بەردەوام لەسەر خەت دەبین بۆ ئەوەی كێشەو گرفتەكانیان چارەسەربكەین و لە هەفتەی دابێت تێكەڵە رێژی ئەو كۆڵانانە دەكەین تا ئەوكاتەی قیڕتاوكردن دەست پێدەكانت."
سەرۆكی شارەوانی رواندز، ئەو دەنگۆیانەشی رەتكردوو كە باس لەوە دەكرێت شارەوانی و قائیمەقامیەت كەمەتەرخەمبوونە لەگەیاندنی پڕۆژەكانی خزمەتگوزاری گووتی" وەك شارەوانی كارەكانی خۆمان بە باشی رای كردووە، ئەو دەنگۆیانەش دوورن لە راستی كە ئێمە كەمتەرخەم بوبینەو بەدەم كێشەو گرفتی خەڵك نەچوینە، هەر كەسێك هاتبێت بە شێوازێكی جوان پێشوزایمان لێكردووە و وەڵامی داواكاریمان داونەتەوە بەڵام كە پارە نەبێت چیبكەین.

زۆرترین بینراو