ژانرە ئەدەبییەكان كەوتە بازاڕ

ژانرە ئەدەبییەكان كەوتە بازاڕ

زاری كرمانجی: كتێبی ژانرە ئەدەبییەكانی سمكۆ محەمەد كە بریتییە لە 104 لاپەڕە بە قەبارە مام ناوەندی لەسەر ئەركی خۆی بەچاپی گەیاندووە كەوتە بەردەستی خوێنەران.
نووسەر لەم كتێبەیدا باس لەو چەمكانە دەكات كە پەیوەندی بە ئەدەب و فكرەوە هەیە و لە ساڵانی هەشتاكانەوە هاتۆتە نێو دونیای ئەدەبی كوردی، بەڵام وەكو نووسەر لە پێشەكی كتێبەكەیدا نووسیویەتی" بەهۆی ئەوەی ئەو چەمكانە درووستكراوی ئێمە نین و كارمان پێیان نەكردووە وەك بەشێك لە شۆڕشی فەرهەنگی، بۆیە بەهەڵە كاریان پێكراوە و بەهەڵە لەنێو توێژینەوەی ئەدەبیدا كاریان پێكراوە، بۆیە منیش جارێكی تر بەپێی ئەو لۆژیكەی كە نوێخوازی بە گرنگی دەزانێ جارێكی تر پێناسە و شیكردنەوەم بۆ كردووە، یان باشتر بڵێم لەسەریانم نووسیوە".
نووسەر لە پێشەكی كتێبەكەیدا دەڵێ "قسەكردن لەسەر دەقی دەربار و دەقنووسی كورد، وەكو جۆرێك لە تابۆ دیاریكراوە و بووەتە هێڵی سوور، ئەوەش كەجار بەجار رچەشكێنی كردووە و لەسەر شاعیری دەربار شتی نووسیوە، هێندەی لەژێر كاریگەری سیاسەت و ئیدیۆلۆژی بووە، یان سەرچاوەكەی لە كۆنە قینەوە بووە، هێندە مەبەستی خزمەتكردن نەبووە بە ئەدەبیات و دەرهاوێشتەكانی دیكەی، ئەمە لەحاڵێكدا شاعیری دەربار لە دەروەی دونیای ئەدەبی كوردی، مێژوویەكی هەیە و لەوانەش نموونەم بەشێك لەشاعیرەكانمان هێناوەتەوە".
هەروەها كاتێ باس لەو چەمكانە دەكات ئاماژە بۆ ئەوە دەدات كە " بەشێكی دیكەی ئەو چەمك و دەستەواژانەی لە دونیای فكری ئەدەبیدا بەكار دێت، لێرەدا تێشكمان خستۆتە سەری، لەوانەش (دەقاوێزان و دەقی فۆرمالیستی و هایكۆیی و هتد بوو، مەبەستەكەش ئەوەیە هەریەك لەو چەمكە فكریانە لەفۆرمی دەقەكاندا بەكار هاتووە، بەڵام پێناسە نەكراوە تا خوێنەر بتوانێ پۆلێنیان بكات و مەعریفەیەكی لەبارەوە بزانێ".
زیاتر دەڵێت " ئەخلاقیاتی خوێندنەوە، یەكێك لەو وتارانەیە قسەی زۆری لەسەر كراوە، بەتایبەت بۆ ئەو كەسانەی بەناوی خوێندنەوەی دەقەوە، بەستایلێكی كلاسیكیانە مامەڵە لەتەك دەقدا دەكات، بۆ نموونە ئێستاش هەندێ خوێنەر هەن هێندەی باس لە دەقنووس و ژیانی تایبەتی و مەبەستگەرایی دەنووسن، هێندە باس لەجەوهەری دەقەكە و تەكنیك و نووسین ناكەن، لەحاڵێكدا ئەم ستایلە لە دونیادا نەماوە و ناخوێندرێتەوە، تا ئەو رادەیەی وەك كۆمیدیایەك تەماشا دەكرێت".
نووسەر سمكۆ محەمەد ئەمە 18 هەمین كتێبیەتی و 3 كتێبی دیكەی لەبارەی سیاسەت و رەخنەی ئەدەبی و چاوپێكەوتنەكانی لەژێر چاپدان و لەماوەیەكی كورتدا دەكەونە بەردەستی خوێنەران.

زۆرترین بینراو