ژیاننامەی شەهیدی فەرماندە شەوكەت رەمەزان دۆسكی

ژیاننامەی شەهیدی فەرماندە شەوكەت رەمەزان دۆسكی

بەرەڤان شاكر سلێمان لاچ– سۆران:
كاتێك دەست دەكەین بە نووسینەوەی لاپەڕەكانی مێژووی گەلی كوردستان، هەڵبەت چەندین دیمەنی تەژی تراژیدیایی و خەمناك دێنە پێشمان. هەڵبەت دەبێت ئەم دیمەنانە تۆماربكرێن بۆ ئەوەی نەوەكانی داهاتوومان بزانن ئەو ئازادییەی ئەوان هەروا بە ئاسانی بەدەست نەهاتووە.
سەرەڕای ئەوەی گەلی كوردستان گەلێكی ئاشتی خوازبووە، بەڵام هەردەم دوژمنان ویستویانە خاكی ئەم نەتەوە داگیر بكەن، هەڵبەت گەلی كوردستانیش دەستەوەستان نەبوون و هەردەم هەوڵی داوە بەو پەڕی تواناوە بەرگری لە خاك و نەتەوەی خۆی بكات، لەم پێناوەشدا چەندین شەهید و قوربانیان داوە.
لەم ژمارەی هەفتەنامەی زاری كرمانجیدا مەبەستمانە تیشك بخەینە سەر چەند وێستگەیەكی ژیان و خەباتی شەهیدی فەرماندە(شەوكەت رەمەزان دۆسكی).
شەهید رەمەزان، لە 1ی تەمموزی ساڵی 1967 لە گوندی بیری لە دایك بووە، شەهید رمەزان لە بنەماڵەیەكی شۆڕشگێر و خەباتكار لە دایك بووە، هەڵبەت ئەمەش كاریگەری لەسەر بیروباوەڕەكانی ئەو هەبووە.
بنەماڵەی شەهید شەوكەت هەر لە سەرەتاوە بڕیاری ئەوەیان داوە لە پێناو وڵات و نیشتیمان خویان گیان فیدایی بكەن، هەڵبەت ئەم بنەماڵەیە خاوەنی چەندین شەهیدی سەنگەرن، یەكێك لە شەهیدە هەرە دیارەكان، شەهید (رەمەزان محەمەد)ی باوكی شەهید شەوكەتە، شەهید رەمەزان لە ساڵی 1988 لە دەڤەری سیدەكان شەهیدكراوە. ئەمەش راستەوخۆ كاریگەری لەسەر شەهید شەوكەت هەبووە و وەك كۆڕە شەهیدێك هەردەم بە تامەزرووی ئەوەبووە ئازادی كوردستان ببینێت و لەم پێناوەشدا ئامادەی خۆفیداكردن و قوربانیدان بووە.
دوای نسكوی شۆڕشی ئەیلوول بنەماڵەی شەوكەت دۆسكی ئاوەرەی رۆژهەڵاتی كوردستان دەبن، ئاوارەبوون بۆ ئەم بنەماڵەیە جارێكی تر ئازارێكی تربووە، چونكە لە خاك و نیشتیمانی خۆیان دووركەوتونەتەوە.
شەهید شەوكەت، لە رۆژهەڵاتی كوردستان بەردەوامی دەداتە خوێندن، قۆناغەكانی سەرەتایی و ناوەندیی و ئامادەیی لە رۆژهەڵاتی كوردستان تەواو دەكات.
دواتر لە قوناغەكانی خوێندنی ناوەندی و ئامادەیی پەیوەندی بە رێزەكانی یەكێتی قوتابیانی كوردستانەوە دەكات، شەهید شەوكەت، لە ساڵی 1986، چەكی شەڕەف لە شان دەكات و بەشداری لە چەندین چاڵاكی پارتی زانی دەكات، لەو ماوەی لە رۆژهەڵاتی كوردستان بووە ویستوویەتی ئەزمونێك بۆ خۆی كۆبكاتەوە و شارەزایی لە زمان و كولتووری ئێراندا پەیدا دەكات.
دوای ئەوەی سەركردایەتی سیاسی كوردستان بڕیاری ئەوە دەدەن لەگەڵ خەڵكی كوردستان دەست بە راپەڕینی سەرتاسەری بكەن، هەر بەم مەبەستە بنەماڵەی شەهید شەوكەت لە ساڵی 1991 دەگەرێنەوە بۆ باشووری كوردستان و بەشداری لە راپەڕینی سەرتاسەری كوردستان دەكەن.
هەربۆیەش دوای ساڵی 1994 شەهید شەوكەت دەكرێتە فەرماندەی سریە لە بەتالیونی پاسەوانە تایبەتەكانی نێچیرڤان بارزانی، لە ساڵی 1996 دەكرێتە بەرپرسی ئیدارە لە سنووری ناوچەی سیدەكان، دواتر لە ساڵی 1998 دەكرێتە بەرپرسی ئۆپڕاسیۆنی هێزی 63ی تایبەت، لە ساڵی 2001 دەكرێـتە فەرماندەی هێزی سەربەخۆی زێرەڤانی.
شەهید شەوكەت، جگە لە ئەركی فەرماندەیی هەوڵی داوە بەردەوامی بە خوێندنی خۆی بدات، بەو مەبەستەش لە كولێژی یاسا لە زانكۆی جیهان بەردەوامی بە خوێندن دەدات.
دوای پەیدابوونی رێكخراوی تیرۆرستانی داعش و پەلهاوێشتنیان بۆ ناوچە سنووریەكانی كوردستان، شەهید شەوكەت وەك فەرماندەیەكی پێشمەرگە چووەتە سەنگەرەكانی پێشەوەی پاراستنی كوردستان، لەهەر یەك لە میحوەرەكانی( زوومار، خازر، مووسڵ)، بەشداریەكی كارای هەبووە، توانیویەتی رۆلێكی گەورە بگێرێت لە تێكشكاندنی هێرشەكانی تیرۆرستانی داعش.
لیوا بەهجەت تەیمەز، ئەندامی فەرماندەیی زێرەڤانی سەبارەت بە كەسایەتی شەهید شەوكەت دەڵێت: من و شەهید شەوكەت ساڵانێكی زۆربوو یەكترمان دەناسی، بەڵام دوای هاتنی شەهید شەوكەت بۆ ناو هێزەكانی زێرەڤانی، زیاتر یەكترمان ناسی و بەردەوام لە پەیوەندی دابووین لەگەڵ یەكتر.
بەهجەت سێلكی بەردەوام و گووتی: شەوكەت كەسایەتییەكی بەهێزی هەبوو، هەردەم كەسێكی خۆڕاگربوو، وەك فەرماندەیەك هەرچی ئەركێكمان پێی سپاردبا زۆر بە دڵسۆزیەوە ئەنجامی دەدا، لە زۆر داستانی شەڕی داعشدا هاوسنگەربووین، بەڵام لە دوا شەڕ كەوا رۆژی 17- 12- 2015بوو پێكەوەبووین، شەڕەكە لە (تل اسود) بوو، لەو شەڕەدا داعش لە حەوت لاوە دەستی بە هێرشكردن كرد، ئەگەرچی ئەركی ئەو لەو میحوەرە نەبوو، بەڵام شەهید هاتە لامان و رۆلێكی گەورەی لەو شەڕەدا دەگێڕا، لەسەرەتادا هەوڵەكانمان بۆ ئەوەی بوو كەوا ئەو هێرشە تێكبشكێنن، دوای ئەوەی هێرشەكەمان تێكشكاند بڕیاروابوو هێرشی پێچاوانە دەست پێبكەین، لەو كاتانەدابوو كەوا شەهید پێی گووتم، تا ئێوە خۆتان ئامادە دەكەن من پشویێك دەدەم، هەر لەو كاتانەدا ئۆتۆمبێلێكی خۆكوژ بەرەو لای ئەوان هات و خۆی تەقاندەوە، بە داخەوە لیوا شەوكەت برینداربوو و چەند پێشمەرگەیەكی تریش شەهید و برینداربوون، بەڵام شەهید شەوكەت نەگەینرایە نەخۆشخانە و لە رێگادا شەهیدبوو.
بەهجەت گووتیشی: شەهیدبوونی لیوا شەوكەت بۆ ئێمە كارەساتێكی گەورەبوو، چونكە شەهید رۆل و پێگەیەكی گەروەی هەبوو، ئەگەرچی كەس ناتوانێت شوێنی كەسێكی تر پڕبكاتەوە، بەڵام لە رێبازی كوردایەتی ئێمەدا هەردەم وایە تا كەسێك شەهید دەبێت هەزاری تر ئامادە دەبن بۆ ئەوەی پارێزگاری لە وڵاتی خۆیان بكەن، بەڵام هەرگیز ( شەهید شەوكەت)ێكی تر دروست نابێتەوە.
جێگای ئاماژە پێدانە ئەو رۆژەی كەوا شەهید شەوكەت شەهیدبوو، كاتی تاقیكردنەوەیەكی شەهید بووە لە زانكۆی جیهان، بەڵام خۆی پێڕانەگیرابوو بۆ هاوكاریكردنی هاورێیەكانی بەشداری ئەو شەڕەی كرد و هەر لەو داستانەشدا شەهیدبوو.

 

زۆرترین بینراو