ژیاننامەی شەهید كاوە قادر كەریم

ژیاننامەی شەهید كاوە قادر كەریم

بەرەڤان شاكر سلێمان لاچ- هەولێر:
كاتێك لاپەڕەكانی مێژووی سەروەری كوردستان هەڵدەدەینەوە، ئاماژە بە خەبات و تێكۆشانی چەندین خەباتكار و گیانفیدایان كراووە، كەوا بە خوێن و گیانی خۆیان پارێزگارییان لە كوردستان كردوو.
لەم ژمارەی هەفتەنامەی زاری كرمانجیدا مەبەستمانە بگەڕێینەوە بۆ سەر چەند وێستگەیەكی ژیان و خەباتی شەهیدی فەرماندە ( كاوە قادر كەریم).
كاوە قادر كەریم، لە ساڵی 1970 لە گوندی ناوگەردانی سەر بە پارێزگای سلێمانی لەدایك بووە.
شەهید، هەر لە سلێمانی دەست بە خوێندن دەكات و هەوڵ بۆ بەدەستخستنی زانست و زانیاری دەدات، بەڵام بەهۆی خراپی بارودۆخی ئابووری ماڵباتەكەی شەهید كاوە واز لە خوێندن دێنێت.
دوای ئەوەی حكومەتی عێراق چەندین زوڵم و ستەم لە گەلی كوردستان كرد، ئەمە بۆیە هۆكاری ئەوەی شەهیج ئم زوڵم و ستەمە قەبول نەكات و شەهید لە ساڵی 1991 پەیوەندی بە رێزەكانی پارتی دیموكراتی كوردستانەوە دەكات لە سنووری سلێمانی.
بەر لە راپەڕینی ساڵی 1991 شەهید كاوە چەكی شەڕەفی كوردایەتی لەشان دەكات و دەبێتە پێشمەرگە لە ناوچەی عەربەتی پارتی دیموكراتی كوردستان.
دواتر شەهید پەیوەندی بە رێزەكانی سوپای رزگاری كردووە، دواتر وەك ئەفسەر دەگوازرێتەوە بۆ فەرماندەیی سلێمانی و چەندین ئەرك و بەرپرسیاریەتی لەشان دەگرێت.
شەهید لە ژیانی پێشمەرگایەتی دوو جار برینداربووە، بەڵام بەردەوام هەوڵی داوە خزمەت بە گەلی كوردستان بكات و ئامادەبووە بۆ پارێزگاریكردن لە خاك و وڵاتی خۆی.
دواتر وەك فەرماندەی سریە لە سوپای 4ی زێرەڤانی دەست بەكاردەبێت و رولێكی بەرچاوی دەبێت لە پڕۆسەی رزگاری عێراقدا.
شەهید، لە هەمبەر خەبات و ماندووبوونیدا و بەهۆی برینداربوونی بڕیار دەدرێت بە پلەی موقەدم خانەنشین بكرێت.
دوای پەیدابوون و پەلهاوێشتنی تیرۆرستانی داعش بۆ سەر خاكی كوردستان، شەهید هەر زوو پەیوەندی بە هێزەكانی پێشمەرگەوە دەكات و وەك پێشمەرگەیەك ئامادەیی خۆی بۆ پارێزگاریكردن لە كوردستان دەربڕیوە.
سەبریا عوسمان، خێزانی شەهید دەڵێت: لە ساڵی 1994 ژیانی هاوسەرگیرم لەگەڵ شەهید كاوە پێكهێناوە، لە سەرەتای ژیانی هاوسەرگیرماندا لە بارودۆخێكی سەخت و دژواردا دەژییان، ئەو كاتانەی شەهید لە ئەرك دەگەڕایەوە بەردەوام سەردانی خزم و دۆستانی دەكرد، شەهید كەسێكی كۆمەڵایەتی و نەرم و نیانبوو، بەردەوام دووپاتی دەكردەوە كەوا وەك پێشمەرگەیەك ئامادەیە خۆی لە پێناو خاك و وڵاتەكەی خۆیدا فیدا بكات.
ئاواتی شەهید ئەوەبوو منداڵەكانی بخوێنن و لە رێگەی زانست و زانیارییەوە خزمەت بە خاك و وڵاتی خۆیان بكەن.
دوای ئەوەی سەرۆك بارزانی لە پەیامێكدا داوای لە هاووڵاتییان كرد بەشداربن لە پاراستنی خاك و دەستكەوتەكانی كوردسان، شەهید كاوە هەر زوو پەیوەندی بە هێزەكانی پێشمەرگەوە دەكات و وەك فەرماندەیەك ئامادەیی دەبێت لە سەنگەرەكانی بەرگریكردن لە خاك و وڵات.
شەهید یەك لەو پێشمەرگانە دەبێت سەرەڕای ئەوەی خانەنشینكراوە، بەڵام بەردەوام هەوڵیداوە لە سەنگەرەكاندا بمێنێتەوە.
شەهید، بەشداری لە شەڕەكانی عەلی رەش و میحوەری خازر كردووە، دواجار وەك فەرماندەیەك بەشداری لە شەڕی ئازادكردنی چیای زەرتك كردووە، بەڵام بەداخەوە لە رۆژی 5-9-2014دا، لە شەڕێكی دەستەویەخەدا كاوە قادر شەهید دەبێت و دەگاتە كاروانی شەهیدانی كوردستان.
سەبارەت بە شەهیدبوونی سەبریا عوسمانی خێزانی شەهید دەڵێت: رۆژێك بەر لە شەهیدبوونی ئێمە دانیشتبووین و باسی لەوە كرد كەوا بەیانی دەچێتە بەرەكانی شەڕ، ئەو رۆژە زۆر بێ تاقەت بوو، بەڵام زۆر دڵ خۆش بوو، ئەو ئامۆژگاری ئێمەی دەكرد و بە منداڵەكانی خۆی گووت، ئەگەر شەهید بووم ئێوە بە زانست و خوێندن درێژە بە خەباتی من بدەن.
بەداخەوە دوای چوونی بۆ بەرەكانی جەنگ هەواڵی شەهیدبوونی بە ئێمە گەیشت، ئاواتی ئەو شەهیدبوون بوو، هەردەم حەزی دەكرد لە سەنگەرەكانی بەرگریدا شەهیدبێت.
لە كۆتایدا بنەماڵەی شەهید دەڵێت: شەهید كاوە، تەنها مۆڵكی ئێمە نییە، ئەو تاكە شەهید و كۆتا شەهیی بنەماڵەی ئێمە نییە و نابێت، ئەگەرچی ئەو گەیشتە ئاواتی خۆی، ئێمەش بەردەوامی بە خەباتی ئەو دەدەین تا ئاواتی هەموو شەهیدان بەدی دێنین كەوا سەربەخۆییە.

 

زۆرترین بینراو