ژیاننامەی مەسروور بارزانی

ژیاننامەی مەسروور بارزانی

 


• مەسروور مەسعوود مستەفا بارزانی، لە 2/ 3/1969 لە گوندی دیلمان لە ناوچەی باڵەكایەتی چاوی بە دنیا هەڵهێناوە.

• لە هاوینی ساڵی 1985 لە تەمەنی 16 ساڵیدا پەیوەندی بە ریزەكانی هێزی پێشمەرگەی كوردستان كردووە و لە ریزی شۆڕشی گوڵانی پێشكەوتنخوازەوە دەستی بە خەباتی چەكداری كردووە.

• ساڵی 1988 بەشداریی مەیدانیی داستانی بەنێوبانگی (خواكوڕك)ی كردووە لە دژی سوپای رژێمی دیكتاتۆری بەعس و بە كامێرای تایبەتی خۆی بەشێكی نەبەردییەكانی تۆمار كردووە، كە بە یەكێك لە فلیمە دیكیۆمێنتارەكانی شۆڕشی چەكداری گەلی كوردستان دادەنرێت.

• ساڵی 1991 لە دوای شەڕی یەكەمی كەنداو بەشداری لە راپەڕینی گەلی كوردستان كردووە.

• سەرەڕای ئەوەی بە هۆی شۆڕش و بەرخودانی گەلی كورد ژیانی منداڵیی خۆی لە ئاوارەییدا بەسەر بردووە، بەڵام قۆناغەكانی خوێندنی سەرەتایی و ناوەندی و ئامادەیی لە ئێران بە سەركەوتوویی بڕیوە.

• ساڵی 1992 بۆ فێربوون و شارەزابوون لە زمانی ئینگلیزی رووی لە لەندەنی پایتەختی شانشینی بەریتانیا كردووە و بۆ ماوەی ساڵێك لەوێ خوێندوویەتی‌.

• دواتر بۆ درێژەدان بە خوێندن رووی لە ویلایەتە یەكگرتووەكانی ئەمەریكا كردووە و لە زانكۆی ئەمەریكا لە واشنتۆن دی سی (1993- 1997) دەستی بە خوێندن كردووە و بە سەركەوتوویی بڕوانامەی بەكالۆریۆسی لە زانستە سیاسییەكان بەدەست هێناوە.

• پاشان لە هەمان زانكۆدا بۆ بەدەستهێنانی بڕوانامەی ماجستێر لە بواری ئاشتی و چارەسەری ناكۆكییەكان خوێندوویەتی‌.

• ساڵی 1998 گەڕاوەتەوە كوردستان و بەشداری لە كۆنگرەی 12ی پارتی دیموكراتی كوردستان كردووە و بە دەنگی بەشداربووانی كۆنگرە بە‌ ئەندامی كۆمیتەی ناوەندی و مەكتەبی سیاسی هەڵبژێردراوە و ئەركی بەڕێوەبردنی ئاژانسی پاراستن و هەواڵگری پێ سپێردراوە.

• ساڵی 2005 لە بەرامبەر رۆڵی خەبات و پرەنسیپەكانی مستەفا بارزانی لە ژیاندا، دەزگای خێرخوازیی بارزانی دامەزراند، وەك‌ دەزگایەكی مرۆیی خێرخوازیی قازانجنەویست بۆ پێشكەشكردنی یارمەتی و هاوكاری بە ئاوارە‌ و پەنابەران و كەسانی خۆجێیی، كە پێویستیان بە یارمەتییە.

• لە كۆنگرەی 13ی پارتی دیموكراتی كوردستان، كە لە ساڵی 2010 بەڕێوە چوو، یەكەمین دەنگی بەشداربووانی كۆنگرەی بەدەست هێنا و دووبارە بە ئەندامی ئەنجوومەنی سەركردایەتی و مەكتەبی سیاسی هەڵبژێردرا.

• بە فەرمانی بەڕێز مەسعوود بارزانی سەرۆكی هەرێمی كوردستان، بە بڕیاری ژمارە (68) لە 30/ 4/ 2012 بۆ سەرپەرشتیكردنی دەزگاكانی ئاسایش، هەواڵگریی سەربازی و دامەزراوە هەواڵگرییەكان بە راوێژكاری ئەنجوومەنی ئاسایشی هەرێمی كوردستان دامەزرا.

• لە دوای ئابی 2014دا لەبەر بەرچدانەوە و روبەڕووبوونەوەی هێرش و پەلامارەكانی تیرۆریستانی داعش بۆ سەر هەرێمی كوردستان، ژووری ئۆپەراسیۆنی هاوبەشی لەگەڵ هاوپەیمانان پێك هێناوە، كە ئەم هەوڵە هاوبەشە رۆڵێكی كاریگەری لە ئاڕاستەكردنی هێرشە ئاسمانییەكان و بەڕێوەبردنی ئۆپەراسیۆنە مەیدانییەكان لە دژی تیرۆریستان هەبوو. خودی مەسروور بارزانی لەگەڵ سەرۆك بارزانی بە شێوەیەكی مەیدانی لە بەرەكانی جەنگ ئامادە بوو و بەشداری لە سەرپەرشتیكردنی زۆربەی ئۆپەراسیۆنەكانی دژی داعش كردووە.

• دامەزرێنەر و سەرۆكی بۆردی زانكۆی ئەمەریكیی كوردستانە لە دهۆك، كە لە دێسەمبەری 2013دا بەردی بناغەی پڕۆژەكەی دانا.

• 3/ 12/2018 لەلایەن ئەنجوومەنی سەركردایەتیی پارتی دیموكراتی كوردستانەوە بۆ پۆستی سەرۆكی حكوومەتی هەرێمی كوردستان بەربژێر كرا.

• 11/ 6/2019 وەك براوەی یەكەمی هەڵبژاردنی گشتی 30/9/2018 لەلایەن فراكسیۆنی پارتی دیموكراتی كوردستان، ناوی پێشكەشی سەرۆكایەتیی پەرلەمانی كوردستان كرا و لە دەنگدانێكی راستەوخۆدا بە دەنگی (87) پەرلەمانتار لە ئامادەبوونی (97) پەرلەمانتار، بووە بەربژێر بۆ پێكهێنانی كابینەی نوێی حكوومەتی هەرێمی كوردستان.

• 12/ 6/2019 بە فەرمانی هەرێمیی ژمارە (1ی ساڵی 2019) لەلایەن سەرۆكی هەرێمی كوردستان بۆ پێكهێنانی كابینەی نوێی حكوومەتی هەرێمی كوردستان راسپێردرا.

• خێزاندارە و خاوەنی سێ كوڕ و كچێكە بە ناوەكانی (یاسەمین، ئارین، بەرزین، ئاران).

• شارەزایی تەواوی لە نووسین و خوێندنەوە و قسەكردن بە زمانەكانی (كوردی، فارسی و ئینگلیزی) هەیە و لە زمانی عەرەبیش تێدەگات.

• لە بواری هونەری و وەرزشی شارەزایی لە شێوەكاری و ئەسپسواری و مەلەوانی هەیە.

زۆرترین بینراو