ژیان تاهر: چاكسازی لە لیستی شەهیدان و زیندانیانی سیاسی دەستی پێ كردووە

ژیان تاهر: چاكسازی لە لیستی شەهیدان و زیندانیانی سیاسی دەستی پێ كردووە

دیدار –رائیب شێروانی
ژیان تاهر، جێگری سەرۆكی لیژنەی شەهیدان و زیندانیانی سیاسیی پەرلەمانی كوردستان، لە دیدارێكدا لەگەڵ هەفتەنامەی زاری كرمانجی گوتی :" چاكسازی لە لیستی شەهیدان و زیندانیانی سیاسی دەستی پێ كردووە و فایل بە فایل پێداچوونەوەی بۆ دەكرێت و هەموو ئەوانەی بەپێی یاسا مافی سوودمەندبوونیان نییە لادەبرێن و چاكسازیی تەواو لە لیستی شەهیدان و جینۆسایدكراوان و زیندانیانی سیاسیدا دەكرێت. دەشڵێ:" یاسای چاكسازی لە بەرژەوەندی كەسوكاری شەهیدانی راستەقینەدایە، چونكە هەبووە لەسەر كێشەی كۆمەڵایەتی كوژراوە و بە شەهید هەژمار كراوە، دەبێت هەموو ئەوانە لێك جیا بكرێنەوە، بۆیە ئەوانەی دەڵێن یاساكە لە بەرژەوەندی ئێمەدا نییە، ئەوانەن كە كێشە لە فایلی ئەواندا هەیە.
لە ئەنجامی شەڕی سێ ساڵەی بەرەنگاریی تیرۆریستانی داعش نزیكەی هەزار و ٨٠٠ پێشمەرگە و ئەندامانی هێزەكانی ناوخۆ شەهید بوونە و ژمارەیەكی بەرچاویش بریندار بوونە.
لە هەرێمی كوردستان حەفتا و هەشت هەزار و ٧٨٤ كەس وەك شەهید و شەهیدی جینۆساید تۆمار كراون، هەروەها پێنج هەزار و ١٥٧ زیندانیی سیاسی ماوەی ١٠ ساڵە سوودمەندن لە مینحەی حكوومەت و كۆی گشتیی ئەو زیندانیانەی فایلیان بۆ كراوە و كۆدیان بۆ دیاری كراوە، بەڵام لە وەرگرتنی مینحە سوودمەند نەبوونە هەژدە هەزار كەسە.
جێگری سەرۆكی لیژنەی شەهیدان و زیندانیانی سیاسیی پەرلەمانی كوردستان، دیاركرد:" بە پێی یاسا دەبێت هەر وارسێكی شەهید پارچە زەوییەك وەربگرێت، ئەوانەی وەریان نەگرتووە لەبەر ئەوەیە كێشەی نەبوونی پارچە زەوی هەیە، بەتایبەتی لە سەنتەری شارەكان، دەبێت ئەوە لەگەڵ وەزارەتی شارەوانی چارەسەر بكرێت، زۆر كەسوكاری شەهیدان هەن، رەزامەندی پارچە زەوییان بۆ هاتووە، بەڵام هێشتا زەوی بۆ دابین نەكراوە، دەبێت ئەو كێشەیە چارەسەر بكرێت، پاشان زەوییان پێ بدرێت، تازە بۆ نموونە لە سەنتەری شاری دهۆك پارچە زەوی نەماوە، دەبێت لەگەڵ شارەوانی قسە بكرێت بۆ ئەوەی لە كام شوێن پارچە زەوی دابین دەكرێت پاشان بەسەردا دابەش بكەن، بەڵام وەكو دان مافی كەسوكاری شەهیدانە كە پارچە زەوی وەربگرن".
ژیان تاهر، جێگری سەرۆكی لیژنەی شەهیدان و زیندانیانی سیاسیی پەرلەمانی كوردستان، راگەیاند: "یەكێك لە خاڵەكانی نێو یاسای چاكسازی پێداچوونەوەیە بە لیستی هەموو فەرمانبەران و مووچەخۆران و شەهیدان و كەرتی سەربازی و خانەنشینی، پێش دوو هەفتە لەگەڵ وەزیری شەهیدان و ئەنفالكراوان كۆبووینەوە ئەو پرسیارەمان لێ كرد كە ئێوە دەستان بە چاكسازی كردووە، وەزیر رایگەیاند لیژنەیەكی باڵای وەزارەتی كاروباری شەهیدان پێكهاتووە و خۆی سەرۆكی لیژنەكەیە و بەڕێوەبەرە گشتییەكانیش تێیدا ئەندامن، ئێمەش بەردەوام چاودێری دەكەین، لە مانگی هەشت كە پەرلەمان دەچێتە پشوو جارێكی دیكە سەردانی بەڕێوەبەرایەتیە گشتییەكان دەكەینەوە بۆ ئەوەی بزانین تا ئێستا چیان كردووە و دەیانەوێت چی بكەن.
ژیان، روونیشیكردەوە:" ئەم پاكسازییە بەپێی یاسای چاكسازی، بەشی دووەم، ماددەی دووەم، خالی دووەم: پاككرنەوە و هەڵوەشاندنەوەی ماف و ئیمتیازاتی میراتگری ئەو كەسانەی كە بەدەرن لە حوكمەكانی یاسای ژمارە (٩)ی ساڵی ٢٠٠٧ی هەمواركراو (یاسای ماف و ئیمتیازاتی كەسوكاری شەهیدان و ئەنفالكراوان) جێبەجێ دەكرێت.
جێگری سەرۆكی لیژنەی شەهیدان و زیندانیانی سیاسیی پەرلەمانی كوردستان زیاتر گوتی:"چاكسازی لە لیستی شەهیدان و زیندانیانی سیاسی دەستی پێ كردووە و فایل بە فایل پێداچوونەوەی بۆ دەكرێت و هەموو ئەوانەی بەپێی یاسا مافی سوودمەندبوونیان نییە لادەبرێن و چاكسازیی تەواو لە لیستی شەهیدان و جینۆسایدكراوان و زیندانیانی سیاسیدا دەكرێت."
ژیان تاهر، جێگری سەرۆكی لیژنەی شەهیدان و زیندانیانی سیاسیی پەرلەمانی كوردستان، دەشڵێ:" یاسای چاكسازی لە بەرژەوەندی كەسوكاری شەهیدانی راستەقینەدایە، هەبووە لەسەر كێشەی كۆمەڵایەتی كوژراوە و بە شەهید هەژمار كراوە، دەبێت هەموو ئەوانە لێك جیا بكرێنەوە، بۆیە ئەوانەی دەڵێن یاساكە لە بەرژەوەندی ئێمە دا نییە، ئەوانەن كە كێشە لە فایلی ئەواندا هەیە".

زۆرترین بینراو