ژینە بەربەستەكان تێكدەشكێنێت بۆ گەیشتن بە خەونەكانی

ژینە بەربەستەكان تێكدەشكێنێت بۆ گەیشتن بە خەونەكانی

د/ هۆژین شەوكەت-رواندز
وێنەگری پیاو زۆرن، بەڵام كم ئافرەت هەن بواریان بۆ رەخسابێت دەست بەرن بۆ كاری وێنەگری، لەوانەیە كۆمەڵگە، لەوانەشە خێزانەكانیان رێگر بووبن لە ئەنجامدانی ئەم كارە، لەگەڵ ئەوەشدا خۆشبەختانە ئافرەت هەن بەسەر رێگریەكاندا سەركەوتوون، گەر لە مەودایەكی كمیش بێت ئەم كارە دەكەن، ژینە سەلام تەمەنی ٢١ ساڵە، دانیشتووی قەزای رواندزە، خوێندكاری قۆناغی چوارەمی زانكۆیە، یەكێكە لەو ئافرەتانەی بوێرانە دەستی بردووە بۆ كاری وێنەگری و وەك حەز و خولیایەك ئەم كارە دەكات، وەك خۆی باسی لێوە كرد پاڵپشتی دەوورووبەری وایلێكردووە درێژە بە كاروانەكەی بدات، ئەو لە دیمانەیەكدا بۆ زاری كرمانجی دوا و باسی لە دەستپێكی كارەكانی كرد و گووتی" هەر لە تەمەنێكی بچووكەوە كاتێك لەگەڵ ماڵەوە دەچوومە دەرەوە وێنەم دەگرت و ئەوانەی لە دەوورووبەرم بوون پێیان دەگووتم كە دەتوانیت وێنەی باش بگریت منیش هەر لەو كاتەوە تا ئێستا وێنە دەگرم و ساڵ بەساڵ شارەزایی زیاتر پەیدا دەكەم و ئێستا باشتر و جوانتر لە جاران وێنەدەگرم ، ئەم كارە حەز و خولیای منە گەر كارێك حەز و ئارەزوت بۆی نەبێت ناتوانیت سەركەوتوو بیت تێیدا منیش حەز و ئارەزویەكی زۆرم بۆ ئەم كارەم هەیە و خودی خۆم لە وێنەكاندا دەبینمەوە و وێنەگرتن ئاسوودەیم پیدەبەخشێت، خێزانەكەم هەمیشە پاڵپشتم بووە، بەڵام پلكم (پەیمان) هەمیشە هێزێكی ترە بۆ من و وام لێدەكات زیاتر متمانەم بە خۆم هەبێت".
گووتیشی" من زیاتر وێنەی كەسەكان دەگرم بە تایبەت ئەوانەی دەیان ناسم و حەز دەكەن وێنەیان بۆ بگرم، جیا لەوە ئارەزووی وێنەی سرووشتم هەیە چونكە سرووشت ئاوێتەی رۆح و دەروونە، كاتێك وێنەی سرووشت دەبینین هەر لە خۆمانەوە خۆشییەك بەناو رۆحماندا دێت، جا چ بگات بەوەی خۆت لەو سرووشتەدا بیت و بە دەستەكانت وێنەی لێ بگریت، لە كۆمەڵگای ئێمە ئەم جۆرە پیشانە ئاسان نین دەبێت هەوڵی بۆ بدەیت، بە تایبەت لە قەزایەكی وەك رواندز كاری وا زۆر كمە و شاراوەیە بۆیە گەر بكرێت لە داهاتوو پەرە بە كارەكانم دەدەم لەپاڵ خوێندنەكەم".
هەر كارێك ئەنجامی بدەیت سەرسام دەبیت بە هاوپیشەیەكت جا چ لە ناوخۆ یا دەرەوە بێت، ژینەش وەك هەموان سەرسامە بە كاری كەسانێك كە لە بواری فوتوگرافی كاردەكەن و دەربارەی ئەمە گووتی" من سەرسامم بە فۆتۆگرافی كورد كەیوان شەعبان كە فوتوگرافێكی زۆر بەتوانایە و لە بیانییەكانیش سەرسامم بە لیانا جینای كە خانمە فوتوگرافێكی ئەمەریكییە".
زیاتر گووتی" من تەنها بە مۆبایل وێنە دەگرم ناتوانم هەموو بۆنەیەك قبۆڵ بكەم و بەژداربم لە خۆشیەكانیان و وێنەیان بۆ بگرم، بەڵام هەندێك بۆنەی وەك لەدایك بوون كە هی كچان بێت وێنە دەگرم ئەوانیش لە وێنەكانیان رازین گەرچی بە كامێرایەكی پێشكەوتووش نەبێت، دەمەوێت دەرفەتێكی باشم بۆ بڕەخسێت تا بتوانم ئەو ئاوات و حەزەی هەمە بیهێنمە دی، ئەو وێنانەی دەیگرم لە داهاتوو بكرێن بە تابلۆ پیشانی هەموو كەسێكی بدەم، بە تایبەت بۆ كەسانێك هاندەر بێت كەوا حەز و ئارەزووەكانیان یا ئەو بەهرەی هەیانە قەتیس نە بێت و لەناو نەچێت و بتوانن لە ناو خۆیاندا پەرەی پێبدەن بۆ ئەوەی گەر سوودێكی بچووكیش بێت بە كۆمەڵگای بگەیێنن".

بیروڕا

زۆرترین بینراو