کرێى خوێندن لە زانكۆ و پەیمانگە تایبەتەکان بەڕێژەى (١٠بۆ ٢٠%) کەمکرایەوە

کرێى خوێندن لە زانكۆ و پەیمانگە تایبەتەکان بەڕێژەى (١٠بۆ ٢٠%) کەمکرایەوە

 بەلەبەرچاوگرتنى بارودۆخى دارایى هاوڵاتیانى هەرێمى کوردستان، وەزارەتى خوێندنى باڵا و توێژینەوەى زانستى، کرێى خوێندن لە زانکۆ و پەیمانگە تایبەتەکان بەپێى ئەنجامەکانى ڕێزبەندى نیشتیمانى زانکۆکانى کوردستان بۆ ساڵى (٢٠١٩)، بەڕێژەى (١٠ بۆ ٢٠ %) بۆ سەرجەم قۆناغەکانى خوێندن کەمکردەوە. ئەمڕۆ یەکشەمە ڕێکەوتى (٢٢/١١/٢٠٢٠) بەسەرپەرشتى د. ئارام محمد قادر سەرۆکى ئەنجومەنى وەزارەت و وەزیری خوێندنی باڵا و توێژینەوەی زانستی و ئامادەبونى بریکارى وەزارەت و سەرۆک زانکۆکان و ئەندامانی ئەنجومەنی وەزارەت، کۆبونەوەى تەواوکارى ژمارە (١٠)ى ئەنجومەنى وەزارەتى خوێندنى باڵا و توێژینەوەى زانستى بە شێوەى ئۆنلاین بەڕێوەچو. لەسەرەتاى کۆبونەوەکەدا د. ئارام محمد قادر بەناوى ئەنجومەنى وەزارەتى خوێندنى باڵا و توێژینەوەى زانستى جارێکى تر پرسەو سەرەخۆشى ئاراستەى بنەماڵەى کۆچکردو د. فەرسەت سۆفى پارێزگارى هەولێر کردو درودو سڵاوى نارد بۆ گیانى پاکى کە لەم قۆناغە هەستیارەدا لەدەستدانى پیاوێکى خەمخۆر و جدى لەبەڕێوەبردنى کار و بەدەمەوە هاتنى داخوازییەکانى خەڵک، خەسارەتێکی گەورەیە بۆ خەڵک و حکومەتی ھەرێمی کوردستان. بۆ ئەمەش وتى: داواکارم لەپەروەردگاری مەزن ئەمە دوا کۆستى خانەوادە بەڕێزەکەیان بێت و سەبرو ئارامیش ببەخشێتە کەسوکارو ھاوڕێکانی. هەروەها پرسەو سەرەخۆشى ئاراستەى سەرجەم ئەو مامۆستاو فەرمانبەرو خوێندکارو قوتابیانە کرد لەم ماوەیەدا بە هۆى پەتاى نەگریسى کۆرۆنا گیانیان لەدەستداوە، بۆ ئەمەش هاوخەمى ئاراستەى کەسوکارو بنەماڵەو هاوڕێکانى کرد و هیواى خواست هەمو لایەک سەلامەت و تەندورست بن و کۆچکردوان بە بەهەشتى بەرین شاد بکات. سەبارەت بە کەمکردنەوەى کرێى خوێندن لە زانکۆ و پەیمانگە تایبەتەکان، د. ئارام محمد قادر وەزیرى خوێندنى باڵا و توێژینەوەى زانستى ئاماژەى بە کارى لێژنەى تایبەتمەند لەسەر ئاستى وەزارەت بەم ئەرکە کردو دەستخۆشى لێکردن بۆ کارەکانیان لە ڕابردو. بۆ ئەمەش وتى: هەرێمى کوردستان بە بارودۆخێکى تایبەت گوزەر دەکات بە شێوەیەک پێویستە هەموان ڕەچاوى بارو گوزەرانى دارایى خەڵکى خۆمان بکەین و لە هەمان کاتیشدا بتوانین هەلى خوێندن بۆ هەموان دەستەبەر بکەین، لەو چوارچێوەیەشدا وتى: بۆ ئەوەى روحیەتى کێبڕکێى زانستى لە دامەزراوە ئەکادیمیەکان بپارێزین و بە لەبەرچاوگرتنى باوردۆخى هاوڵاتیان بڕیارماندا بە کەمکردنەوەى کرێى خوێندن لە زانکۆ و پەیمانگە تایبەتەکان ئەویش بەپێى ئەنجامەکانى ڕێزبەندى نیشتیمانى زانکۆکانى کوردستان بۆ ساڵى (٢٠١٩) کە لەلایەن وەزارەتى خوێندنى باڵا و توێژینەوەى زانستى ڕاگەیەنراوە بەم شێوەى خوارەوە: * ئەو زانکۆیانەى دەکەونە گروپى B، بەڕێژەى (١٠%) کرێى خوێندن کەمدەکرێتەوە. * ئەو زانکۆیانەى دەکەونە گروپى C، بەڕێژەى (١٥%) کرێى خوێندن کەمدەکرێتەوە. * ئەو زانکۆیانەى دەکەونە گروپى D، بەڕێژەى (٢٠%) کرێى خوێندن کەمدەکرێتەوە. * سەرجەم پەیمانگە تایبەتەکان و کۆلێژە زانکۆییەکان بەڕێژەى (٢٠%) کرێى خوێندنیان کەمدەکرێتەوە.

زۆرترین بینراو