گرنگییەكی باش بە وەرزشی ئافرەتان دەدرێت

گرنگییەكی باش بە وەرزشی ئافرەتان دەدرێت

رەمەزان هەرنی- زاری كرمانجی: ساڤیا سەمیر كچە یاریزانی لاوانی تیپی بالەی كچانی یانەی دەربەندیخانەو ماوەی چەندین ساڵە دەستی كردووە بە وەرزش لەگەل تیپەكانی شارەكە تائێستاش بەردەوامە.
ساڤیا سەمیر لە دیمانەیەكدا بۆ زاری كرمانجی گووتی" لە كوردستان وەرزش پێشكەوتنێكی زۆری بە خۆیەوە دیوە بە كوڕان و كچانەوە, لە تێكڕای وەرزشەكاندا لە هەمووشی گرنگتر ئێستا زۆر گرنگی بە ئافرەتان ئەدرێت بۆ هاتنە ناو بواری وەرزش, ئەتوانم بڵێم وەرزش بە تایبەتی لە رووی ئافرەتانەوە بە شێوەیەكی بەرچاو پەرەی سەندووە لە جیهان بە گشتی و كوردستان بەتایبەتی, لە وڵاتی خۆشمان یاریزانی زۆر ئاست بەرزو كاریگەرمان هەیەو چەندین جار بۆندیان پێشكەش كراوە, وەك كچە یاریزانێكی قەزای دەربەندیخان پەیامم ئەوەیە كچان زیاتر بێنە ناو بواری وەرزشەوەو واز لەو بیركردنەوە بێنن كە كچان بۆ ناو بواری وەرزش نابن یان هەر بوارێكیتر, چونكە كچان هیچیان لە كوڕان كەمتر نییە, ئەمەوێ ئەو پەیامە بگەیەنم بە كۆمەڵگە لە رێگەی وەرزشەوەو هەمووان هاوكاری یەكتر بین نەك یەكتر بشكێنین, هەم بۆ زیاتر بەرەو پێشچوونی كۆمەڵگەكەمان هەم لەپێناو خۆشمان كە سودی زۆری هەیە".
ساڤیا گوتیشی" ئەوەی مەبەستم بوو بەدەستمهێنا, هەر لە منداڵیەوە ئامانجم ئەوە بووە رۆژێك ببم بە یاریزان, لە قۆناغی شەشی سەرەتایی تا ئەم ساتەش بەشداریم لە خولی قوتابخانەكان كردووەو ئەنجامی باشمان بەدەست هێناوەو ئامانجم ئەوە بووە رۆژێك پەیوەندی بە تیپێكەوە بكەم, بۆ ئەوەی سودێكم هەبێت هەم بۆ خۆشم هەم بۆ تیپەكەو شارەكەم, خێزانەكەم هەمیشە پاڵ پشتم بوون بەتایبەت باوكم, لە مانگی 7ی 2017 پەیوەندیم بە تیپی بالەی كچانی یانەی وەرزشی دەربەندیخان كردو تا ئێستاش لەو تیپە بەردەوامم لەسەر ئاستی لاوان, هەرچەندە رێژەی پیاوان لە بواری وەرزش زیاترە, بەڵام هاتنی ئافرەتانیش بە شێوەیەكی بەرچاو پێشكەوتنی بە خۆوە دیوەو زۆریش گرنگیان پێ ئەدرێ".
ساڤیا ئەوەشی خستەڕوو" دوای پەیوەندی كردنم بە تیپی بالەی كچانی دەربەندیخانەوە بە هاوكاری راهێنەرەكەمان علی ئەحمەدو یاریزانەكانی تر بەرەو پێشچوونی ئاستی لاوان بەرچاوە، دەستەكەوتەكانمان ساڵی رابردوو لە خولی بالەی ژیانەوە توانیمان پلەی سێیەم بەدەست بێنین, تیپەكەمان لە 3 ئاست پێكهاتووە یاریزانی سەرەكی و لاوان و فێرگەو یاریزانە سەرەكیەكان تەمەنیان لە نێوان 18 بۆ 21 ساڵەو زۆربەیان قوتابی قۆناغی شەشی ئامادەیی و زانكۆن، لاوەكانمان 14 بۆ 17 ساڵەو قوتابیانی قۆناغی بنەڕەتی و ئامادەیین و فێرگەكەشمان 8 بۆ 12 ساڵە قوتابیانی قۆناغی سەرەتایی و بنەڕەتین".

 

بابەتى پەیوەندیدار وەرزشى

زۆرترین بینراو