گرنگی باخچەی منداڵان لە پرۆسەی پەروەردە و فێركردن

بكر كریم حسن

بەرێوەبەری گشتی چاڵاكی وەرزش و هونەرماستەر لە كارگێری پەروەردەیی

پێویستە پەروەردەكاران بە گرنگی وبایەخەوە بڕواننە باخچەكان و هەوڵ بدەن لە گوندەكان و كۆمەڵگاكان باخچەی منداڵان بكەنەوە
شۆرشگێرو وتاربێژی فەرەنسی دانتون دەڵێ" دوای پاروە نان پێویستی یەكەمی گەلان پەروەردەیە".
بێگومان هەموو میللەتێك دوای ژیان پێویستی بە پەروەردە و فێركردن هەیە، واتە پێویستی سەرەكی دوای پاروە نان بریتییە لە پەروەردە، باخچەی منداڵانیش كە دەزگایەكی پەروەردەیی و فێركردنە پێش قوتابخانە، منداڵ دەتوانێ لە (4)چوار ساڵی دا پەیوەندی بە باخچەی منداڵان بكات، چونكە باخچەی منداڵان كاریگەری راستەوخۆ و ئەرێنی هەیە لەسەر ژیانی منداڵ. چ وەكو ئامادەكاری و ئامادەسازییەك بۆ چوونە قوتابخانە، هەروەها پەرەپێدان ومكوم كردنی زیاتری زمانی قسە كردن وكارامەییەكان بەگشتی و هەروەها فێربوونی خوێندنەوە و نووسین و بڕوا و متمانە بەخۆبوون، جگە لەوەش تێكەڵاوی كۆمەڵایەتی دروست دەكات لە نێوان منداڵان بە گشتی كە كاریگەری باشی دەبێت لە سەر كۆی سیفاتە كۆمەڵایەتییەكان و یاری كردن لەگەڵ یەكتری و هاورێیەتی و خۆشەویستی و سۆز و چارەسەكردنی گرفتەكانیان، واتە باخچەی منداڵان وێستگەیەكی هەرە گرنگە لە ژیانی منداڵان و لە هەمان كاتیشدا دەزگایەكی پەروەردەیی و فێركردنی گرنگە، پێویستە پەروەردەكاران بە گرنگی وبایەخەوە بڕواننە باخچەكان و هەوڵ بدەن لە گوندەكان و كۆمەڵگاكان وگەرەكەكانی شارەكان باخچەی منداڵان بكەنەوە، لەبەر ئەوەی وێستگەیەكی هەرە گرنگی پرۆسەی پەروەردە و فێركردنە، لە هەمان كاتیشدا پێویستییەكی گرنگی ژیانی مرۆڤایەتییە، بۆیە گرنگە دیدگای پاشەرۆژ بۆ پەرەپێدان وگەشەپێدانی باخچەی منداڵان بخەینە روو و چیمان پێویستە بە پێی پلانی دیراسەت كراو پێداویستییەكانی بۆ فەراهەم بكەین، تاوەكو بتوانین لە رێگای باخچەی منداڵانەوە مرۆڤی كوردستانی بنیات بنێین بۆ بەیانی كە رۆژ دوای رۆژ پێویستیمان بە كەسانی بەتوانا هەیە، تاوەكو بەشداری كاریگەری هەبێت لە بنیاتنانی كۆمەڵگە و هەڵكشان بەرەو لوتكە، لەوەش دەبێ لە باخچەوە دەست پێ بكەین، نابێ رۆڵ وكاریگەری باخچەی منداڵان نادیدە بگرێن لە بەشداری كردن وپێگەیاندن وتێگەیاندنی نەوەی دوا رۆژ و پاراستنی منداڵەكانمان لە قۆناغێكی زوو لە رەشەبای لادان و توندوتیژی، بێگومان هەر باخچەی منداڵانە ئەو باوەشی ئارامی و فێركردن و پەروەردەكردن، لەهەمان كاتیشدا كاتێكی زێرینە لە ژیانی تاكەكان، كەهەردەم كاریگەری ئەرێنی قازانج بەخشی هەیە لەسەر ئامادەكردن ونەش ونماكردنی هەر تاكێك بە شێوەیەكی تەندروست و پێویستی كۆمەڵگە، بۆیە گرنگە لە بەرنامە و پلان ودیدگەی هەر پەروەردەیەك هەبێت بۆ زیادكردنی ژمارەی باخچەی منداڵان و یانیش كردنەوەی پۆل و هۆبە وژوور لە قۆناغی بنەڕەتی(1تا6) تەرخان كردنی چەند ژوورێك بۆ باخچەی منداڵان و بڵاوكردنەوەی هۆشیاری گشتی لە كۆمەڵگە، وە هاندانی تاكەكان لە پێناو پاڵپشتی كردن و رەخساندن و دەستەبەركردنی كەشێكی لە بارو گونجاو و بەردەوام بۆ پەرەپێدان وگەشەپێدانی باخچەی منداڵان وكردنەوەی خول بۆ مامۆستایانی باخچەكان و هەوڵدان لەگەڵ رێكخراوە پەروەردەییە نێودەوڵەتییەكان بۆدابین كردنی پێداویستییەكانی باخچەی منداڵان وەكو (رێكخراوی یونسێف)بۆ كردنەوەی باخچەی منداڵان لە گوندە دوورەكان ناوچە هەژار نشینەكان بێ جیاوازی، لە هەمان كاتیشدا بەدواداچوون و سەرپەرشتی كردن لەلایەن پەروەردە و یەكەی سەرپەرشتیاری بەردەوام هەبێت بۆ گرنگیدان بەو لایەنە پەروەردەیی وفێركردنە كە لایەنێكی سەرەكییە لە پرۆسەكە دا نابێ فەرامۆش و پەراوێز بخرێ، چونكە باخچەی منداڵان قۆناغێكی هەستیار و گرنگە لە قۆناغەكانی پرۆسەی پەروەردە و فێركردن.

بابەتى پەیوەندیدار بیروڕا

بیروڕا

زۆرترین بینراو