گروپێكی چەكدار هەڕەشە دەكات و بەرپرسانیش بەكاری پەكەكەی دەزانن

گروپێكی چەكدار هەڕەشە دەكات و بەرپرسانیش بەكاری پەكەكەی دەزانن

ماوەی چەند رۆژێكە گروپێكی چەكدار لە مەڕاسیمێكی سەربازیدا پەیامێكی ڤیدیۆییان بڵاو كردەوە و خۆیان بە كەتیبەی برادۆست ناساند.
كەتیبە سەربازییەكە، لە ژمارەیەك كچ و كوڕی چەكدار پێكهاتوون و هەڵگری چەكن و دەمامكییان بەستووە، وەك لە گرتە ڤیدیۆیەكەدا دەردەكەوێت، كەسێك كە خۆی بە ئەندامانی ئەو كەتیبەكە دەناسێنێت دەڵێت " ئێمە گەنجانی برادۆست و بادینان لە چوارچێوەی هێڵی پاراستنی جەوهەری خۆمان بە ڕیكخستن كردووە. بە ئامانجی خۆ پاراستن لە دژی ئەو داگیركارییەی لەسەر دەڤەرەكەمان هەیە".
داواش لە تەواوی چین و توێژەكان دەكات شانبەشانییان و هاوكاریان بن، بەرپرسێكی ئەمنی لە سیدەكان بۆ زاری كرمانجی روونی دەكاتەوە " خەریكی كۆكردنەوەی زانیارین لە سەر ئەو جۆرە كەتیبە سەربازییە، بەپێی زانیارییەكانی ئێمە هیچ گەنجێكی برادۆست و سنووری سیدەكان لە نێو گروپە چەكدار و دەمامكدارەكەدا نییە".
لەلای خۆیەوە، كرمانج عزەت قائیمقامی قەزای سۆران بە زاری كرمانجی راگەیاند" هەر كاتێك بە فەرمی هەر جۆرە گروپێكی چەكدار، یان كەتیبەكی سەربازی لە سنووری كارگێڕیمان هەبێ بێگومان وەڵامی جددیمان دەبێت و هیچ جۆرە گروپێكی نایاسایی و نافەرمی لە دەڤەرەكەمان شوێنیان نابێتەوە".
قائیمقامی سۆران دەڵێت " پێمان وایە راگەیاندنی ئەو جۆرە گروپە سەربازییە، كاری راگەیاندنی چەكدارانی پەكەكەیە، بۆیە لە هیچ لایەنێك قبوڵ ناكەین مەترسی لەسەر ئاسایشی گشتی هاووڵاتییان دروست بكات".

 

زۆرترین بینراو