گیا بەهارییەكان دەبنە سەرچاوەی داهاتی سەدان كاسبكاری دەڤەری سۆران

گیا بەهارییەكان دەبنە سەرچاوەی داهاتی سەدان كاسبكاری دەڤەری سۆران

زاری كرمانجی-سۆران: لەگەڵ هاتنی وەرزی بەهار، ژمارەیەكی زۆری كاسبكاران روودەكەنە ناوچە شاخاوەییەكانی دەڤەرەی سۆران، بۆ كۆكردنەوەی گژو گیا بەهارییەكان و فرۆشتنەوەیان لەبازاڕدا، بەمەش داهاتێك بۆخۆیان دەستەبەر دەكەن، لەبەرامبەریشدا راگەیاندنی دەزگای مین هۆشداری دەداتە هاووڵاتییان كە وریای مەترسییەكانی مین بن.
حوسێن محەمەد، كاسبكارێكی دەڤەری سۆران، بەزاری كرمانجی راگەیاند "ساڵانە لەگەڵ هاتنی وەرزی بەهار، لەگەڵ دەیان كاسبكاری دەڤەرەكەمان روودەكەینە ناوچە شاخاوییەكانی دەڤەری سۆران واتە سنوری هەرچوار قەزاكانی (سۆران، مێرگەسۆر، چۆمان، رواندز) بەمەبەستی كۆكردنەوەو هێنانی جۆرها گیایی بەهاری و هاوردەكردنیان بۆ بازاڕی سۆران و شارو شارۆچكەكانی دیكە، دواتر دەیانگوازینەوە بۆ بازاڕەكان و ژیانی چەندین كاسبكار لەسەر ئەم گیا بەهارییانەیە".
ئەم كاسبكارە گووتیشی " لەرێگەی ئەم گیا بەهارییانە چەندین كاسبكار داهاتێك بۆ خۆیان دەستەبەر دەكەن، وەك دیاریشە خواستی هاووڵاتییان لەسەر ئەم گیا باهارییانە لە زیادبوون دایە و رۆژانە داوای دەكەن".
سەروەر حەسەن، یەكێكە لەو دوكاندارانەی سۆران، بە زاری كرمانجی گووت "لەسەرەتای پێگەیشتنی گیا بەهارییەكان خواستی زۆری هاووڵاتییانی لەسەر دەبێت و نرخەكەشیان لەسەرتاوە گرانە دواتر بەپێی زیاتر پێگەیشتنی گیا بەهارییەكان و زۆر بوونیان لەبازاڕ نرخەكەیان دێتە خوارەوە، لەئێستاشدا ئەم گیا بەهارییانەی كە پێگەیشتوون، نرخەكانیان بۆ هەر كیلۆیەك لە نێوان (1500 تا 3000) دینارەوەیە، تەنها نرخی قارچك بەرزە، ئەویش هۆكارەكەی بۆ ئەوە دەگەڕێتەوە، كە بەشێوەیەكی كەم لە كوێستانەكان پیدادەبێت و زۆر دەگمەنە".
ئەم دووكاندارە دەشڵێت "بە كۆكردنەوەی كژو گیا بەهاریەكان چەندین كەس سوودمەند دەبێت، بۆ نموونە كاسبكاران رۆژانەیەك بۆخۆیان مسۆگەر دەكەن، هەروەها شۆفێران لەكاتی گواستنەوەی ئەم گیا بەهارییانە بە هەمانشێوە كرێی گواستنەوەیان دەست دەكەوێت، دواتریش دوكاندارو فرۆشیاران لەبازاڕەكان لەكاتی فرۆشتنی ئەم گیا بەهارییانە برە پارەیەكیان دەست دەكەوێ‌ لەئەنجامدا دەیان كەس لێی سوودمەند دەبن".
لە لای خۆشیەوە زێبار خالید، بەرپرسی راگەیاندنی بەڕێوەبەرایەتی گشتی كاروباری مین، رایگەیاند "پێویستە هاووڵاتییان لەكاتی چوونیان بۆ كوێستان و ناوچە سنوورییەكان هۆشیار بن، چونكە ساڵانە لە وەرزی زستان و باران بارین، لەناوچە شاخاوەییەكان بەتایبەت ئەو شوێنانەی پێشتر بنكەی سەربازی بوونە یا مۆڵگەكانی حزبی بەعس بوونە، مین و تەقەمەنی دەردەكەون، زۆرجاریش بەهۆی دروستبوونی ئاوەڕۆ و لافاو و باران بارین دێنە خوارەوە، بۆیە پێویستە لەسەر ئەم كاسبكارانەی بۆ كۆكردنەوەی گژو گیای بەهاری روو لە ناوچە شاخاوییەكان دەكەن، هۆشیاری خۆیان بن و لەكاتی بینینی مین و تەقەمەنییەكان، بەهیچ شێوەیەك لێیان نزیك نەبنەوەو تیمەكانمان لێی ئاگادار بكەنەوە".
گووتیشی: "بەپێی ئامارەكانی بەڕێوەبەرایەتی گشتی كاروباری مین، ساڵانە لەم وەرزانەدا خەڵكانێك لەكاتی گەشت و چوونیان بۆ كۆكردنەوەی گژو گیا بەهارییەكان، دووچاری رووداوی مین و تەقەمەنییەكان بوونەتەوەو بەهۆیە گیانیان لەدەستداو كەمئەندام بوونە، بۆ دووبارە نەبوونەوەی ئەم جۆرە رووداوانە، پێویستە هاووڵاتییان و گەشتیاران هۆشیار بن".

زۆرترین بینراو