گەردەلول و رەیحانە منیان ناساند

گەردەلول و رەیحانە منیان ناساند

رەمەزان هەرنی– سلێمانی: هونەرمەندی ناسراوی باشووری كوردستان، لانە ئیبراهیم ئەحمەد، لە دیمانەیەكی هەفتەنامەی زاری كرمانجیدا، باس لە ژیانی تایبەتی خۆی و هونەری دەكات، تیشك دەخاتە سەر كارە هونەرییەكانی و گلەیی لەنەبوونی یارمەتی دەكات و دەشڵێت" بۆ كەسێك گریاوم".
* كەی دەستت بە كاری هونەری كردووە و چەند كارت ئەنجامداوە؟
- لە قۆناغی سەرەتایی خوێندن بووم بەشداریم كرد لە چەندین شانۆگەری قوتابخانە، ئەو شانۆگەرییانە بوون بە دەرگایەك كە بەردەوام بم، ئەو كات كاری هونەری خۆشییەكی یەكجار زۆری هەبوو، دواتر لەگەڵ تێپەڕبوونی كات حەزوخولیای هونەریم لا زیاتر بوو، تا توانیم بەفەرمی بەشداری چەندین شانۆگەری بكەم و هەر ئەو شانۆگەرییانە بوون منیان گەیاندە ئەمڕۆ، تا ئێستا بەشداریم كردووە لە چەندین فیلمی سینەمایی و دارما و كورتە فیلم، لەچەندین دراما بەشدار بووم لەبەشی دووهەمی درامای گەردەلوول و لەگەڵ چەندین كاری شانۆیی.
* ئەگەر بەشی چوارەمی گەردەلوول دروستبكرێت بەشدار دەبیت؟
- ئەگەر ئێستا بەشی چوارەمی دراماكە دروست بكرێت نازانم بەشدار دەبم یا نە، تا سیناریۆی كارەكە نەبینم ناتوانم بڕیار لەسەر بەشداریكردن و نەكردن بدەم، لە هەموو كارە هونەرییەكان بڕیاری بە پەلەم نەداوە تا لە سیناریۆ كارەكە دڵنیا بوویمە ئەوكات بەشداریم كردووە.
* لە چ شتێك نێو ژیانت پەشیمانی ؟
- بەگشتی لە هیچ كارێك كە لە ژیانمدا ئەنجامم دابێت پەشیمان نیم، لە بواری هونەری و ئاسایی ئەوانەی سەرنەكەوتوومە بوونەتە وانەیەك، ئەوانەشی سەركەوتوو بوومە زیاتر هانیانداوم كاری تازەتر بكەم، بەگشتی كەسێكی سەركەوتوومە لەژیانمدا.
* هونەر چ شتێكی لە ژیانی تۆدا زیاد كردووە؟
- هونەر زۆر شتی لێ وەرگرتم و لەبەرامبەریشدا زۆر شتی پێبەخشیم، بۆیە هونەر بۆمن زۆر گرنگە لە منداڵییەوە لەگەلم گەوەرە بووە.
* چەند گرنگە هونەرمەند كەسێك جوان و شەرنج راكێش بێت؟
- جوانی گرنگ نییە، گرنگ ناخی مرۆڤە، گرنگ مرۆڤە كە راستگۆ بێت، خۆی بە گەورە نەزانێت خۆی لە هەموو كەس بچووكتر بكاتەوە، ئەمەیە جوانی راستەقینە، جوانی روخسار كاتییە، بەڵام جوانی ناخ تا مردنە.
* بۆ وەك پێویست گرنگی بەهونەر نادرێت لەكوردستان؟
- خەڵكێكی یەكجار زۆر رۆشنبیرمان هەیە لە دەرهێنەرو ئەكتەر و بینەر، بەڵام وەزارەتی رۆشنبیری وەك پێویست گرنگی بە هونەر نادات و یارمەتی هونەرمەندان نادات بۆ كاری هونەری.
* رێگرێت لێكراوە كاری هونەری نەكەیت؟
- بەڵێ باوكم زۆر رازی نییە من كاری هونەری دەكەم، ئەو پێیوایە لەم وڵاتەی ئێمە ئەوەی گرنگ نەبێت هونەرە، هونەر بۆتە پارەو پشگیری نییەو بۆتە واستەو خزم خزمانێ، ئەوانەش بۆ تۆ ناكرێت، لە هونەر تەنها ناوبانگییەو هیچی تر بەدی ناكەم، لەروی مادیشەوە هیچ زیاد ناكەن، ئەمە رای باوكمە كە رازی نییە كار بكەم لەبەر ئەم هۆیانە، بەڵام لەرووی رۆشنبیرییەوە باوكم باوەری تەواو هەیە بە هونەری دراما، شانۆ سینەماو گۆرانی، هەر دەڵێت ئەمانەن وڵات و گەل دەناسێنن زور بەداخم بۆی.
* لە چ كارێكی هونەریدا ناسراو بۆیت و ناوبانگت دەركرد؟
- هەموو كارەكان بۆ من جوان و باش بوون، بەڵام زیاتر لە رێحانەو نامەكانی ئەشرەف و گەردەلول ناو بانگم دەركردو ناسران، دەمەوێت سوپاسی دەرهێنەری درامای رەیحانەو نامەكانی ئەشرەف بكەم، كە تاكە دەرهێنەرن لەبواری كولتووری كوردیدا كار بكەن و كولتوور زیندوو بكەنەوە، من بە باشترین دەرهێنەر دادەنێم، دەرهێنەری گەردەلول جەلیل زەنگەنە ئەو رۆڵ و كاریگەری زۆری هەبوو بۆ ناساندنی شۆڕش و رزگار كردنی كورد بەتایبەت بۆ نەوە تازەكان، بەڵام بەگشتی هەموو كارەكانم خۆشدەوێن.

بیروڕا

زۆرترین بینراو