گەرمای هاوین هاووڵاتیان پەلكێشی رووبارەكان دەكات

گەرمای هاوین هاووڵاتیان پەلكێشی رووبارەكان دەكات

محەمەد ئامۆكەیی- سۆران: بەرزبوونەوەی پلەكانی گەرما هاووڵاتیان و گەشتیاران پەلكێشی سەیرانگاو روبارەكان دەكات، بە چونووت بۆ شوێنە گەشتیاریەكان و رووبارەكانی سنووری سۆران خەڵكێكی بەرچاو بەمەبەستی خۆ فێنككردنەوە و مەلەكردن دەبینرێت لە نێو رووبار و رۆخ ئاوەكان كە خەریكی بەسەر بردنی كاتن، زۆر جاریش لە كاتی مەلەكردن بەهۆی ناشارەزاییەوە خەڵكانێك خنكاون و یاخوود لە خنكان رزگار كراون، زاری كرمانجی قسەی چەند گەشتیارێكی وەرگرتوە كە بەمەستی گەشت و مەلەكردن هاتبوونە رووبار و شوێنە گەشتیاریەكانی سنووری سۆران.
عەلی زاهیر گەنجێكی تەمەن 20 ساڵانە لەگەڵ پۆلێك لە هاوڕێیانی لە سلێمانیەوە هاتبووە سۆران، دەڵێت" بەرزبوونەوەی پلەكانی گەرما وای لە ئێمەكرد بڕیار گەشتكردن بۆ سەیرانگاكانی سۆران بدەین، ئەگەر چی سنووری ئێمەش شوێنی دڵڕفێنی هەیە، بەڵام ئێرەمان نەبینیبوو".
ئەو گەشتیارە زیاتردەشڵێت" لێرە خەڵكی بێ گوێدانە شوێنە قولەكان مەلە دەكەن ئەوەش دەبێتە هۆی مەترسی بۆ سەر گیانیان من داوادەكەم لە كاتی چونە نێو ئاوی رووبارەكان وشیار بن و خۆیان لە شوێنە قولەكان بپارێزن كە دەبنە هۆی ژێر ئاوكەوتنیان.
سەرەوت ئەحمەد دانیشتوی سۆران بوو، گووتی" هەفتەی سێ رۆژ بۆ مەلەكردن دێمە رووباری بەرزێوە، چەند ساڵ دەبێت مەلەوانی دەزانم بەڵام مرۆڤ دەبێت ئاگاداربێت چونكە ئاو هەمووكات بۆی هەیە بتبات و ژێری بكەوی، بۆیە پێویستە لەسەر بەرگری شارستانی لەو شوێنانەی كە قول و مەترسی دارن و ناشێن بۆ مەلەكردن تابڵۆی ئاگادار كەرەوە دانێن و خەڵك نەتوانێت لەو شوێنانە نزیك بێتەوە بۆ سەڵامەتی گیانیان.
ئاسیا عومەر ئافرەتێكی دانیشتووی هەولێر بوو بۆ زاری كرمانجی گووتی" بەگشتی سەیرانگاكانی سۆران شوێنی خۆشن، لەگەڵ خانەوادەكەم هاتوینەتە بێخاڵ، شاری ئێمە زۆر گەرمەو مرۆڤ توانای ئەوەی نەماوە بەڕۆژیش بێتە دەروە، ئێرە كەشێكی فێنكی هەیە دەتوانین خۆمانی لێ فێنك بكەینەوە، بەڵام ئەوەی لێرم بەدی كرد ئەو گەشتیارانە كە دەچنە نێو ئاو شەڕە ئاو دەكەن و زۆر جار دەبێتە هۆی خزانی كەسەكەو بەوەش دەكەوێتە نێو ئاو و ژیانی دەكەوێتە مەترسی، بۆیە دەبێت وشیاری خۆمان بین ئەو گەشتەی كە دەیكەین هەر بەخۆشی تەواو بێت نەك ناخۆشی.
راید بەیار باڵەكی گووتەبێژی بەڕێوبەرایەتی بەرگری شارستانی سۆران، بە زاری كرمانجی راگەیاند" ساڵانە لە وەرزی هاوین خەڵكێكی زۆر روو لە رووبار و سەیرانگان دەكەن بە مەبەستی مەلەكردن و حەسانەوە، زۆر جار لە رووبارەكان خەڵكانێك دەچنە نێو ئاو بێ ئەوەی ئەزمونی مەلەوانیان هەبێت، بۆیە داوا لەو كەسانە دەكەین خۆیان لە شوێنە قولەكان بپارێزن بۆ ئەوەی لە رووداوی خنكان بەدوور بن، ئەگەر چی وەك بەرگری شارستانی تابڵۆمان لەو شوێنانە هەڵواسیوە كە قولن و بۆ مەلەكردن ناشێن، بەڵام خەڵك زۆر پابەند نیەو ئەوەش وایكردوە رووداوەكانی خنكان لەم وەرزە زیاتربن.

زۆرترین بینراو