گەلان تەمەنێكی بچووك و بەهرەیەكی زۆر

گەلان تەمەنێكی بچووك و بەهرەیەكی زۆر

دیمانە/ رۆژان قیاس
گەلان جەبار ی 21 ساڵ لەدایكبووی قەزای چۆمان و قوتابی بەشی ئادابی ئینگلیزی لە زانكۆی سۆران، قوتابیەك تەژی لە بەهرەو خەونی مەزن، ئەو گەرچی بە تەمەن بچووكە، بەڵام هەوڵدانەكانی لە ژیان، گەورەو پڕ لە چالاكین، كچێكە هەمیشە بەدەم ژیانەوە پێدەكەنێ و دڵسۆزانە كارەكانی رادەپەڕێنێ و هەرگیز ماندوو نابێ.
لە دیمانەیەكی كورتی زاری كرمانجی دا، گەلان باس لە حەزوخولیاو كارو چالاكییەكانی دەكات، كاتێ‌ قسە دەكات وەك كەسێكی گەورە دەردەكەوێت، دەڵێ‌"لە 1 ی حوزەیرانی ساڵی 1999 لە چۆمان لە دایك بووم و لە چۆمانیش دەژیم، قۆناغەكانی خوێندنم بە سەركەوتوویی و پڕ لە چالاكییەوە بڕیووەو تا ئێستاش لە خوێندن بەرەوامم، تەبعەن ئەویش بە پاڵپشتی و هاوكاری دایكم"،
گەلان باس لە حەز و خولیاو كاری فۆتۆگرافی خۆی دەكات و دەڵێ‌"لەوانەیە لە رووی فۆتۆگرافیەوە كەسێكی تەواو پڕۆفێشناڵ نەبم، بەڵام هەوڵمداوە وێنەكان بە جوانی و سروشتی خۆیەوە دەربكەون و هەوڵی بەردەوامیش دەدەم لەو مەجالەدا سەركەوتنی زیاتر بە دەست بهێنم، چونكە حەزی منداڵی خۆمەو ئامانجی گەورەم هەیە لەو بوارەدا"، سروشتی جوانی ناوچەكەیان حەزی گەلانی زیاتر كردووە بۆ كاری فۆتۆگرافی و نمایشكردنیان لە تۆڕە كۆمەڵایەتیەكان"سرووشتی جوانی ناوچەكەمان، هەمیشە پاڵنەربووە بۆ كارەكانم و لە ڕێگەی گرتنی وێنەو ڤیدیۆوە بە مۆبایل سرووشتی ناوچەكەم پیشان داوە لە ڕێگەی دروست كردنی پەیجێكەوە لە ئینستاگرام وە بڕوانامەم لە فۆتۆگرافی دا پێدراوەو وێنەكانم لە پێشاگاكاندا هەڵبژێردراون، وەك یوتوبەر كار ئەكەم و سەبسكرایبەرێكی زۆرم هەیە كە ئێستا زیاترە لە 86 هەزار لە چەناڵەكەمدا ڤیدیۆی سرووشتی ناوچەی كوردستان و ئەو چالاكیانەی كە ئەیكەم ئاپڵۆود ئەكەم". ئەو باس لەوەش دەكات كە سۆشیاڵ مێدیا دەرفەتێكی باشی بۆ رەخساندووە تاكو بەرهەمەكانی خۆی تێدا بڵاوبكاتەوە، جگە لەوەش گەلان كار لەسەر وەرگێرانیش دەكات و دەڵێ‌"لە رێگەی پەیجێكی ترمەوە زانیاری لەسەر ژنانی بلیمەت و فەیلەسۆف و كەسایەتی ناودار بڵاو ئەكەمەوە كە لە سەرچاوەی ئینگلیزییەوە وەریان ئەگێڕمە سەر زمانی كوردی و زۆر جاریش كچانی بەهرەدار پەیوەندیم پێوە ئەكەن لە ڕێگەی مەسێجەوە جا چ شعر یان وێنە یاخود گۆرانی بۆیان بڵاو ئەكەمەوە"،
گەلان لە خەمی كچانی نیشتیمانەكەی دایە و داواكارە پاڵپشتی و هاوكاری زیاتر بكرێن بۆ گەیشتن بە ئامانجەكانیان"هەمیشە ئەڵێم پێویستە كچانمان پاڵپشتی یەك بن، چونكە لە ڕۆژهەڵاتی ناوەڕاست بە گشتی و كوردستان بەتایبەتی، كچان هەڵی ئەوەیان بۆ نەڕەخساوە بتوانن بەهرەی خۆیان دەربخەن"، ئەوەش دەڵێ‌"زۆربەی جار وتار و ئارتیكڵ بۆ ڕۆژنامەو ماڵپەڕەكان ئەنووسم و پێشتر لە رۆژنامەو ماڵپەڕەكانەوە بڵاو كراونەتەوە و لە ساڵی 2018 لە ڕێگەی نووسینێكمەوە سەرۆكی ڕێكخراوی میدڵ ئێسترن وۆمەن كۆوڵەیشن بانگێشتی ئەمریكای كردم".
گەلان ئەندامی دامەزرێنەری پلاتفۆرمی قوتابییە بەهرەدارەكانی زانكۆی سۆرانە، بۆیە دەڵێ‌"ساڵی 2019 پلاتفۆرمی قوتابییە بەهرەدارەكانی زانكۆی سۆرانمان بە پاڵپشتی و یارمەتی سەرۆكی زانكۆ بەڕێز دكتۆر موسڵیح و دكتۆر هێمن میرانی دروستكردوو خۆشم سەرپەرشتی ئەو پلاتفۆرمە ئەكەم و ئامانجمان دەرخستنی بەهرەو توانای قوتابی زانكۆكەمانەو چەندان چالاكیمان لە زانكۆ و دەرەوەی زانكۆ كردووە و چالاكی ژینگەیی و وەرزشی و ئەنجامدانی پێشبڕكێ‌ و پێشەنگاو........ هیتر. چەندان قوتابی زانكۆكەمان لە ڕێگەیەوە بەهرەی خۆیان دەرخستووە و لە پاڵ خوێندنەكەیانەوە بە بەهرەی جیاوازەوە".
لەكۆتا قسەكانی خۆی دا گەلان بە پێكەنینەوە دەڵێ‌"لەپاڵ ئەو كارە خۆبەخشیانەمەوە، خوێندنی خۆشم فەرامۆش نەكردووەو لە بەشەكەی خۆم یەكێكم لە قوتابییە یەكەمەكان و، زۆربەی كاتەكانی ژیانم بە خوێندنەوە و چالاكی وەرزشی و وێنەكێشان و گوێگرتن لە میوزیك بەسەر ئەبەم و بەردەوام لە هەوڵدان ئەبم بۆ فێربوون و بەرەو لووتكەی سەركەوتن".

 

 

زۆرترین بینراو