گەنجێكی باڵەكایەتی دەبێتە مامۆستای زانكۆیەكی رووسیا

گەنجێكی باڵەكایەتی دەبێتە مامۆستای زانكۆیەكی رووسیا

موڕشید برادۆستی– سۆران: گەنجێكی خەڵكی باڵەكایەتی، بەهۆی لێهاتوویی لە خوێندنی دكتۆراكەی دەبێتە مامۆستای زانكۆیەكی وڵاتی رووسیا.
هیوا حسێن عومەر، ساڵی 1985 شاری نەغەدە وڵاتی ئێران لەدایكبووە، كوڕی ماڵباتێكی پێشمەرگەیە و بە هۆی كوردایەتییەوە لە ئاوارەیی لە دایكبووە و برایەك و دوو خووشكی هەیە، دایك و باوكی هاندەری سەرەكی بوون بۆ ئەوەی بەردەوام بێ لە خوێندن و بە گووتەی خۆی باوك و باپیری بەهۆی پێشمەرگایەتی شاخ نەیانتوانیوە خوێندەواربن و بڕوانامەی باش بەدەست بێنن، بۆیە بۆ سەرخستنی كوردستان بە چەكی قەلەم و زانست ئەو خەباتە بەردەوامی پێدەدات.
هیوا حسێن مامۆستای زانكۆ لە وڵاتی رووسیا، بۆ زاری كرمانجی باس لە دەستپێكی خوێندنەكەی دەكات و چۆنییەتی بەدەست هێنانی ئەو بڕوانامەیە دەكات و دەڵێت " لە ساڵی 2002 لە زانكۆی سەڵاحەددیین بەشی ئەندازیاری میكانیك وەرگیرام و خویندنی زانكۆم بە سەركەوتوویی لە ساڵی 2006 تەواو كرد. لە دوای تەواو كردن لە كارگەی ئاوی كانی لە بێخال وەكوو ئەندازیار دامەزرام".
زیاتر گووتی " لە ساڵی 2009 حكومەتی هەرێمی كوردستان كۆمەڵێك زەماڵەی خوێندنی لە روسیا راگەیاند و یەكێك لەو بوارانە كە دەست نیشان كرابوو، خویندن بوو لە بواری ئەندازیاری فڕۆكە و منیش لەبەر ئەوەی خولیایەكی زۆرم بۆ فرۆكە و بواری ئەندازیاری هەبوو سیڤی خۆم پێشكەش كرد. دوای ئەنجامدانی چەندین چاوپێكەوتن یەكێك بووم لەو قوتابییانەی هەلبژێردران بە مەبەستی خوێندن لە وڵاتی روسیا لە بەشی ئەندازیاری فرۆكە".
ساڵی 2010 كۆرسی زمانی رووسی بە سەركەوتوویی تەواو كردووە و داخلی زانكۆی (مایی)Moscow Aviation Institute (National research University) بووەو خوێندنی بەكالۆریۆسی لە ساڵی 2014 لەو زانكۆیە تەواو كردووە.
هیوا روونی دەكاتەوە " بە هۆی بەرزی نمرەكانم لە قۆناغی خوێندنی بەكالۆریۆس دا زانكۆی ( مایی) دیپلۆمی سوریان پێبەخشیم كە بەدەست ‌هێنانی ئەم بروانامەییە لە روسیا گرنگییەكی تایبەتی هەیە و دەدرێتە قوتابییە یەكەمەكانی سەر ئاستی زانكۆ. دوای تەواو كردنی بەكالۆریۆس بۆ زیاتر بەرزكردنەوەی ئاستی زانستیم و زیاتر شارەزابوون بڕیاری بەردەوامی خوێندنمدا و لە ڕێگای نوێنەرایەتی حكومەتی هەرێم لە روسیای فیدراڵ داواكاریم پێشكەشی قونسوڵییەی روسیا لە كوردستان كرد بە مەبەستی وەرگرتم لە ماستەر لە هەمان پسپۆڕی و بەهۆی بەرزی نمرەكانم و بەدەست هێنانی دیپلۆمی سور لە بەكالۆریۆس توانیم سكۆلارشیپی خوێندنی ماستەر لە روسیا لە هەمان زانكۆ بەدەست بێنم و لە ساڵی 2016دا توانیم بڕوانامەی ماستەر لە زانكۆی ( مایی) و بە دیپلۆمی سور تەواو بكەم".
لە بەردەوامی قسەكانیدا گووتی " ساڵی 2017 دووای ساڵێك گەرانەوە لە روسیا بۆ كوردستان بڕیارمدا دووبارە بە مەبەستی خوێندنی دكتۆرا رێی روسیا بگرمەبەر و بۆ ئەم مەبەستە سوودم لەو 40 كورسی خوێندنە وەرگرت كە حكومەتی روسیای فیدراڵ ساڵانە بۆ قوتابییانی هەرێمی كوردستان دابین دەكات و لە رێگای سایتی فەرمی و قونسوڵخانەی روسیا لە كوردستان دۆسییە و سیڤی خۆم پێشكەشكرد و دووبارە توانیم سكۆلارشیپ لە زانكۆی سامارا كە یەكێكە لە زانكۆ هەرە پێشكەوتەوەكانی وڵاتی روسیا لە بواری ئەندازیاری فڕۆكە و رۆكێت و بۆشاییگەری دەست بە خوێندنی دكتۆرا بكەم، زانكۆیەكە ناوی لە ناو لیستی زانكۆ باوەرپێكراوەكانی وەزارەتی خوێندنی باڵای كوردستان و عێراقیشدا هەیە و ئەمساڵ لە قۆناغی دووەمی دكتۆرام لەم زانكۆیە و دوای بەشداربوون لە كۆرسەكانی وانەبێژی و پێشكەشكردنی چەندین سمینار و هەڵسەنگاندن و زیاتر لە دوو مانگ هەوڵدان توانیم وەك ی.ماموستا لە زانكۆی سامارا لە فاكەلتی (Theory of aircraft engines) دابمەزرێم و دەست بە ووتنەوەی وانە بكەم لەم زانكۆیە.
وەرگیرانی لەو زانكۆیە خۆشحاڵی خۆی و خانەوادەی بەدووا هات و تا رادەیەك دەستكەوتێكی باشیشە بۆ كوردستان دەڵێت " وەرگیرانم بە شێوەی مامۆستا خۆشحاڵییەكی زۆر بۆ من و ئومێدەوارم بتوانم بەهەگبەی پڕتر و زانستێكی بەرزتر بگەرێمەوە كوردستان و خزمەتی قوتابییان و پڕۆسەی زانستی و خوێندن لە كوردستان بكەم و ئەو خەونەی هەموو كات هەم بوو، ئەوێش خزمەت كردنی كوردستانە بگەینمە جێ".
هیوا حوسێن مامۆستای زانكۆ لە وڵاتی رووسیا گووتیشی " ئەوەی لە ژیان دا گرنگە و هەموو كەسێكی سەركەوتوو ئەنجامی دەدا ئەوە دانانی پلان و ئامانجە و هەنگاو نان بەرەو سەركەوتن، ئامانجی منیش خزمەتكردن بە رێگای قەلەم و زانستە بە كوردستان بۆ بەدیهێنانی ئەم ئامانجە ساڵانێكی زۆرە بە دوور لە خانەوادە و كەسە نزیكەكانم لە دەرەوە و لە غەریبی ژیان دەكەم و سوپاس بۆ خوا كە توانیمە رێگایەكی زۆر لە بەدیهێنانی ئەم ئامانجە ببڕم".

 

زۆرترین بینراو