گەنجێكی كورد تابلۆی ژمارە یەكی پایتەختی وەڵاتی هەنگاریا ی پێ دەدرێ‌

گەنجێكی كورد تابلۆی ژمارە یەكی پایتەختی وەڵاتی هەنگاریا ی پێ دەدرێ‌

دوای ئەوەی لەرێگەی قاچاغ و پاسپۆرتێك بە ڤیزایەكی ساختەوە، كوردستان بەرەو وەڵاتی سوید جێ‌ دەهێڵێ، لەسەر سنووری وەڵاتی هەنگاریا لەلایەن پۆلیسیەوە دەستگیر دەكرێت و 99 رۆژ دەخرێتە بەندیخانە، ئەو خەونی چوون بۆ سوید لە بیر دەكات و داوای مافی پەنابەری لە وەڵاتی هەنگاریا دەكات و دواتر لەلایەن وەزیری ناوخۆی ئەو وڵاتەوە پاداشت دەكرێت.
(هیوا محەممەد ئەحمەد) ی تەمەن 35 ساڵەی لە دایكبووی قەزای رواندز، لە ساڵی 2007 ەوە لە وڵاتی هەنگاریا دەژیت، ئەو وەك خۆبەخشێك كاری وەرگێران بۆ چەند رێكخراوێكی تایبەت بە كۆچبەران دەكات و هەنگاریا بە "وڵاتی دووەمی" خۆی دەزانێ، ئەو بۆ زاری كرمانجی دەڵێ‌"خەریكی كاری خۆبەخشیم لەگەڵ چەند رێكخراوێكی پەیوەست بە پەنابەران و كاری وەرگێریان بۆ دەكەم، بە تایبەت بۆ ئەو پەنابەرانەی كە لەوەڵاتانی رۆژهەڵاتی ناوەڕاستەوە روو لەهەنگاریا دەكەن"، هیوا هەروەكو خۆی هێمای بۆ دەكات جگە لەزمانی دایك چوار زمانی تریش دەزانێ‌ (هەنگاری، عەرەبی، فارسی، توركی)،
بەهۆی بوونی پەیوەندییەكی باش لەگەڵ بەرێوەبەری یەكێك لەو كەمپیانەی تێدا گیرساوەتەوە، ژیانی هیوا لەنێو چوار دیواری كەمپە داخراوەكانی ئەو وەڵاتە، دەگۆڕێ بەرەو ژیانێكی ئازادو پڕ لەبەرهەم، تا لەدواجار لەلایەن وەزیری ناوخۆی هەنگاریا، تابلۆی ژمارە یەكی پایتەختی ئەو وەڵاتەی بە ناوی خۆیەوە پێ دەبەخشرێ.
هیوا لە بارەی وەرگرتنی تابلۆی ژمارە یەكی (بوداپێست) ی پایتەختی هەنگاریا دەڵێ‌"كاری بەردەوامی خۆبەخشیم و هاوكاریكردنی حكومەتی هەنگاریا لەبارەی كۆچبەرانەوە، منی گەیاند بەوە رۆژە كە لەلایەن وەزیری ناوخۆی ئەو وەڵاتەوە دیارییەكی رەمزی وەڵاتەكەیم پێ ببەخشێ‌"، ئەوەش دەڵێ‌"لە 2007 ەوە داوای مافی پەنابەریم لەو وەڵاتە كرد، ئیدی لەو كاتەوە بیرم لەكاری خۆبەخشی كردەوە لەمەجالی كۆچبەران، ئەو كەمپەی تیدا نیشتەجێكرابووم لە شاری (دەبرسەن) كردمە دەستپەیەكی كارەكەم و لەوێ خۆبەخشانە كاری خاوینكردنەوەی كەمپ و چاودێریكردنی كۆچبەرانم لەئەستۆگرت و بوومە پەردێك لەنێوان كۆچبەران و ئیدارەی كەمپەكە، ئەوەش وایكرد پەیوەندییەكی باش لەگەڵ بەرێوەبەری كەمپەكە دروستبكەم كە ئافرەتێكی دڵسۆز و وەفاداربوو بەرامبەر پەنابەران، دوای وەرگرتنی ئیقامە و ئازادبوونم لەكەمپەكە، هاتم بۆ بوداپێست پایتەختی وەڵاتەكەو دوای ماوەیەك بەرێوەبەرە ئافرەتەكەش بوو بە بەرپرسی رێكخراوێكی خێرخوازی بەناوی رێكخراوی مانگی سووری هەنگاری و بنكەی سەرەكی رێكخراوەكە لە پایتەخت بوو، ئەوەش وایكرد كە جارێكی تر لە ساڵی 2013 لەنزیكەوە چاوم بەو ئافرەتە بكەوێتەوەو لەگەڵ ئەوان درێژ بە كارەكانم بدەم"،
مانگی رابردوو بەرێوەچوونی كۆنفرانسێكی ئاینی تایبەت بە مەسیحییەكانی دانیشتووی وەڵاتە ئیسلامیەكانی رۆژهەڵاتی ناوەڕاست لە بوداپێست، دەرفەتێكی باش دەبێ بۆ هیوا كە لەنزیكەوە چاوی بە پینتەر ساندۆر وەزیری ناوخۆی هەنگاریا بكەوێت و پاداشتێكی رەمزی لێ وەربگرێ، هیوا دەڵَێ"بەرپرسی ئەو رێكخراوەی كاری لەگەڵ دەكەم، وتی هیوا ئێستا كاتی ئەوەیە وەفاداری خۆمت نیشان بدەم بەرامبەر ئەو هەموو كارە باشانەی تۆ كردووتە بۆ وەڵاتەكەمان و پەنابەران، دەمەوێت بە وەزیری ناوخۆی وەڵاتت بناسێنم، چووین بۆ لای و ئەویش زۆر سوپاسی كردم و وتی چ داوكارییەكت هەیە بۆت جێ بەجێ بكەم، منیش وتم سوپاس هیچم ناوێت، تەنها یەك داوكاریم هەیە ئەویش لەبارەی پەنابەرانی كوردە كە زۆرجار بە بێ هۆ لەلایەن دەزگا ئەمینەكانەوە رووبەرووی گرتن و لێپێچنەوە دەبنەوە، مافی بەدواداچوونمان هەبێ و كەسە باشەكان دوور بن لە كێشە، ئەو وتی بە دڵنیایەوە، بەڵام دیسان پێداگیری كرد لەوەی شتێكم بۆ بكات، منیش وتم جەنابی وەزیر لەبەر ئەوەی زۆر دەمێكە لەو وڵاتە دەژم و هەنگارییە بە وڵاتی دووەمی خۆم دەزانم، حەز دەكەم شتێكی رەمزی ئەو وڵاتەم پێشكەش بكەیت، ئەویش راستەوخۆ وتی ئۆتۆمبێلت هەیە؟ وتم بەڵێ، بۆیە لەگەڵ بەرێوەبەری پۆلیس قسەی كردو داوای لێكرد تابلۆیەكی ژمارە جوانی بۆ دیاربكەن، دوای تەلەفۆنكردن و پرسین، وتیان ژمارە یەك هەیە ئی بوداپێست و ماوەی سێ ساڵ دەبێ خاوەنەكەی مردووەو دەتوانێ چوار پیتی لەسەر بنووسی لەگەڵ ژمارە 1، منیش هەر چوار پیتی ناوەكەم پێ دان و لەگەڵ ژمارە یەكیان دانا، ئەوەبوو نوسراوێكی رەسمیان بۆ كردم و بردم بۆ بەرێوەبەرایەتی پۆلیسی هاتوچۆ و رادەستمكردن و وتیان چاوەڕێ تەلەفۆنی ئێمە بكە، كۆتا مانگی ساڵی رابردوو تابلۆیەكەم وەرگرت بە ناوی (HEWA - 01) و ئێستا بەو تابلۆیە بە نێو پایتەخت و شارەكانی تر هاتوچۆ دەكەم"،
لەوەڵاتانی ئەوروپا كرین و فڕۆشتن بە تابلۆی ژمارەكان دەكرێ و نرخەكەی لە 300 دۆلارەوە دەستپێدەكات بەرەو سەرەوە، هیوا لەو بارەوە دەڵێ‌ سیستەمی هەنگاریا لەو رووە جیاوازە"لەئەوروپای رۆژئاوا ئەو كارە رێگە پێدراوە، بەڵام لە هەنگاریا تەنها ئەو كەسانە دەتوانن ئەو ژمارانە دەستبخەن كە بڕوانامەی بەرزیان هەیە لە كاركردن و خزمەتیان لە 15 ساڵ كەمتر نەبێ"،
ساڵی 2017 لە ریفراندۆمێكدا 90 % گەلی هەنگاریا بەڵیان بۆ ئەوە كرد كە نابێ خەڵكی پەنابەر بهێنە نێو خاكی وەڵاتەكەیان، بۆیە ئەو وەڵاتە بە درێژایی 180 كم لە سنووری وەڵاتی خۆی تەلبەند كردو بە توندی هەڵسوكەوتی لەگەڵ ئەو پەنابەرانە دەكرد كە روویان لە سنووری وەڵاتەكەی دەكرد، هەروەكو هیوا ئاماژەی بۆ دەكات ماوەی چەند ساڵێكە زیاتر لە 95 هاوڵاتی كوردی باشووری كوردستان لە كەمپەكانی ئەو وەڵاتە گیریان خواردووە"كەمپێك هەیە لەباشووری هەنگاریا نزیك بە سنووری سربیا، زیاتر لە 15 خانەوادەی كورد لەو كەمپە نیشتەجێكراون و داوای مافی پەنابەری لەو وەڵاتە دەكەن، ئێستا لەبارودۆخێكی زۆر خراپ ژیان دەكەن و لەژێر چاودێریەكی زۆر توند دان و بە هیچ شێوەیەك مافی هاتنە دەرەوەیان نییە لەو كەمپە، تاكو حكومەت بریار لەسەر چارەنووسیان دەدات، بەوەی كە مافی پەنابەریان پێ بدات، یاخود سنوورداشی دەرەوەی سنوور بكرێنەوە، خەڵك هەیە زیاتر لەساڵ و نیویەكە لەو كەمپەدا جێگیركراون و چاوەرێ دوا بریاری حكومەتی هەنگاری دەكەن و بە هیچ شێوەیەك ناخوازن بگەڕێنەوە وەڵاتەكەی خۆیان، بەم بۆنەشەوە تووشی دەیان نەخۆشی بوونەو رەوشی تەندروستی زۆریان خراپە"، هیوا باس لەوەش دەكات كە چەند جارێك لەگەڵ نوینەری حكومەتی كوردستان لەئەوروپا قسەی كردووە لەسەر بارودۆخی كوردانی نێو كەمپەكانی هەنگاریا، بەڵام تا ئێستا حكومەتی هەرێم هیچ هەنگاوێكی كرداری نەناوە، ئەو دەڵێ زیاتر لە 95 كورد كە هەر هەموویان خەڵكی باشووری كوردستانن لەنێو كەمپەكانی ئەو وەڵاتە گیریان خواردووە و نازانن چارەنووسی ئەوان چی بەسەر دەهێت.
هیوا هەروەكو خۆی دەڵێ‌ بۆتە فریادرەسی ئەو پیشمەرگە و قوتابیانەی بە مەبەستی چارەسەركردن و خوێندن روو لەو وەڵاتە دەكەن و ئاسانكاریان بۆ دەكات و خۆبەخشانە دەبێتە وەرگیریان بۆ رایی كردنی كارەكانیان، لەگەڵ ئەوەشدا هەوڵی زیاتر دەدا بۆ ناساندنی كورد بە هەنگارییەكان و باشتركردنی بارودۆخی پەنابەران، ئەو ئێستا خەریكی لێكوڵینەوەیەك لەسەر شارەدێیەك كە لەو وەڵاتە بوونی هەیە بە نێوی كورد كە پاشماوەی سەربازانی خەلافەتی عوسمانین و لە دوای كۆتایی هاتنی دەسەڵاتی خەلافەتی ناوبراو، لەو شوێنە مانەوەتەوەو نەگەڕاونەتەوە نیشتیمانەكەی خۆیان، لەگەڵ ئەوەشدا سەرقاڵی وەرگێڕانی دوو پەرتووكە بۆ سەر زمانی كوردی كە لەبارەی كوردانی ئەو وەڵاتە نوسراوە.

بیروڕا

زۆرترین بینراو