گەورەترین پڕۆژەی گەشتیاری لە خەلیفان دروست دەكرێت

گەورەترین پڕۆژەی گەشتیاری لە خەلیفان دروست دەكرێت

محەمەد ئامۆكەیی- خەلیفان: بەهۆی هەڵكەوتەی جوگرافیاو بوونی روبار و دیمەنی جوانی شاخەكان هاووڵاتیانی شارەدێی خەلیفان داوادەكەن ناوچەكەیان بكرێتە شوێنێكی گەشتیاری گرنگ، بۆ ئەوەی خەڵكی سودی لێ ببینن حكومەتیش زیاتر پشت بە كەرتی گەشتیاری ببەستێت، خەلیفان شوێنێكی ستراتیژیەو چەند شارێكی كوردستان یەكەوە دەبستێتەوە ئەمە قسەی گەنجێكی شارەكەیە بۆ زاری كرمانجی گووتی" خەلیفان بەهەموو پێوەرەكان لە بارە بۆ ئەوەی زۆرترین پڕۆژەی گەشتیاری لێ دروست بكرێت لەبەر ئەوەی تاڤگەی گەلی عەلی بەگ، سەرچاوەكەی ئەو روبارەیە كە بە نێو خەلیفان دەڕوات بۆیە شارەكەمان یەكێكە لەو شوێنانەی زۆرترین دارو درەختی هەیە ئەوەش دەكرێت لە لایەن گەشتوگوزارەوە كەپری گەشتیاری بۆ دروست بكات هەم بۆ خەڵكی ناوچەكەو هەمیش بۆ لایەنی حكومەت باشتر دەبێت.
ڤیان محەمەد، دانیشتوی خەلیفانە بۆ زاری كرمانجی دەڵێت"دەبوا دەمێكە خەلیفان زۆرترین پڕۆژەی پێشكەش بكرابا لەبەر ئەوەی شارەكەمان شوێنێكی گەشتیارییەو رۆژانە بەسەدان گەشتیار بەنێو شار گوزەر دەكەن بۆ شوێنە گەشتیاریەكانی سۆران، ئەگەر بێت تەلەفریكێك دروست بكرێت شتێكی زۆر باش دەبێت وادەكات چەند پڕۆژەیەكی تریش بخرێنە واری جێبەجێكردن، بەڵام تا ئێستا ئەو شوێنانەی كەهەن لە خەلیفان هیچ سودی بۆ ئێمە نەبووە لەبەرئەوەی خێزانەكان ناتوانن رووبكەنە كوێ تەنیا هەندێ كەپری گەشتیاری هەن ئەوەش خۆش نیە دەبوا پاركێكی خێزانی دروستبكراو بۆ ئەوەی دانیشتوانی روونەكەنە شارەكانی تر، داوا لەبەرپرسانی شارەكە دەكەم هەرچی زووە خەلیفان وا لێبكەن لە سەرانسەری عێراق و كوردستان بگرە دەروەی ووڵاتیش گەشتیاران رووی تێبكەن.
خاوەنی نوسینگەیەكی كڕین و فرۆشتنی زەوی گووتی" لە ئێستادا بازاڕی كڕین و فرۆشتنی زەوی لە خەلیفان سستەو هۆكارەكەشی بۆ نەبوونی پڕۆژەكانی خزمەتگوزاری دەگەڕێتەوە، ئەگەر هاتوو ئەو دەنگۆیە راست بێت و خەلیفان بكرێتە شوێنێكی گرنگی گەشتیاری پێم وایە نرخی زەوی لە شارەكەمان بەڕێژەیەكی بەرچاو بەرز دەبێتەوە بەوەش سودێكی زۆری دەبێت.
كاوان كریمخان، بەڕێوەبەری ناحیەی خەلیفان، بە زاری كرمانجی راگەیاند" خەلیفان ناوچەیەكی تەواو گەشتیارییە ئەگەر خزمەت بكرێت پاڵپشتییەكی تەواوی بكرێت ڕەنگە لە تەواوی عێراق و هەرێمی كوردستان ببێتە جەمسەری گەشتیاری، چونكە خەلیفان كەوتۆتە سەر ڕێگای سەرەكی ناوچە گەشتیارییەكان، ئاو هەوای لەباری هەیە، بەتایبەت مانگە گەرمەكانی ساڵ، بۆیە هەوڵمانداوە و بەردەوامیشین بۆ هاندانی كەرتی گەشتیاری، هەموو هەوڵێك دەدەین لە ماوەیەكی نزیكدا یەكێك لە پڕۆژە گەورەكانی گەشتیاری لە خەلیفانە دروست بكرێت، بەڵام كێشەی هەرە گەورەمان بریتییە ڕۆتینی زۆری حكومەت، بۆ نموونە بمانەوێ ڕەگەزی زەوییەكی شارەوانی بگۆرین بۆ پڕۆژەیەكی گەشتیاری ڕۆتینەكە ماوەیەكی زۆر دەخایەنێت و بەمەش رەنگە كارەكانمان دوا بكەوێت، لە كاتێكدا بە دروستكردنی ئەو پڕۆژەیە دەبێتە سەرچاوەیەكی زۆری داهات بۆ حكومەت و باشتركردنی گوزەرانی شارەكەو بەخشینی سیمایەكی جوانیش بە ناوچەكە.
لای خۆشیەوە بارزان محەمەد، بەڕێوەبەری گەشتوگوزاری سۆران بۆ زاری كرمانجی ئاشكرایكرد" دەمێكە لەسەر خەتین بۆ ئەوەی پرٍۆژەیەكی گەشتیاری لە خەلیفان ئەنجام بدەین، چاوەڕێی رەزامەندی كۆتاین هەر كات نوسراومان بۆهات دەستی پێدەكەین، ئەو شوێنەی پڕۆژەكەی لەسەر بنیات دەنرێت دەكەوێتە بناری چیای كۆڕەك نزیكەی 280 دۆنم زەوی بۆ تەرخانكراوە، بەكردنەوەی ئەو پڕۆژەیەش خەلیفان دەبێتە ناوچەیەكی گرنگی گەشتیاری و بوژانەوەیەكی باشی ئابورییش بەخۆیەوە دەبینێت.
بەڕێوەبەری گەشتوگوزاری سۆران ئەوەشی خستەڕوو" زیاتر لە 30 شوێنی گەشتیاری لە سنووری سۆران هەن و لە سەر ئاستی كوردستان و پارێزگای هەولێر ساڵانە زۆرترین گەشتیار رووی تێدەكەن.

بیروڕا

زۆرترین بینراو