یادی 170 ساڵەی ڕۆژنامەگەری ئاشووری كرایەوە

یادی 170 ساڵەی ڕۆژنامەگەری ئاشووری كرایەوە

زاری كرمانجی-سۆران: بەبۆنەی 170 ساڵەی دەرچوونی یەكەم ڕۆژنامەی ئاشووری بەناوی (زەهڕیڕێ دبەهڕا) لە پەیمانگەی تەكنیكی تایبەتی رواندز پانێلێك رێكخرا.ئێوارەی ڕۆژی 5-11- 2019 (ناوەندی دیانا بۆ ڕاگەیاندن) بەهاوكاری پەیمانگەی تەكنیكی تایبەتی ڕواندز، هەڵسا بە ڕێكخستنی پانێلێك بۆ هەردوو ڕۆژنامەنووس ( ئیسماعیل ئیبراهیم و ایڤان جانێ) لە ژێر ناونیشانی ڕۆژنامەگەری ئاشووری لە قووڵایی ڕۆژهەڵاتی ناوەڕاست.
لەسەرتادا م.دلاوەر جەوهەر ڕاگری پەیمانگەی تەكنیكی تایبەتی ڕواندز، لە وتەیەكیدا تیشكی خستە سەر گرنگی ئەم جۆرە چاڵاكییانەو جەختی كردەوە لەسەر ئەوەی كە پەیمانگە هەمیشە بووە و دەبێتە سەكۆیێكی ئازاد بۆ ڕۆشنبیران و بیرمەندان كە هەڵگری پەیامی هاوسەنگن و كار بۆ بڵاوكردنەوەی ڕۆشنبیری و بیری تەبایی وپێكەوە ژیان لە نێوان گشت ئایین و نەتەوە و چین و توێژەكانی هەرێمی كوردستان.
دواتر لەبەشی یەكەمی پانێلەكە رۆژنامەوان ئیسماعیل ئیبراهیم بەڕێوەبەری دەزگاری زاری كرمانجی، بۆ ڕۆشنبیری و ڕاگەیاندن باسی بابەتی (گەنجی ڕاگەیاندنكار وڕاگەیاندنی گەنج) كرد، كە چۆن هاوكاری گەنج بكرێت تاكو بێتە نیو كاری ڕاگەیاندن وڕولی خۆی بگێڕێت، چونكە نوێبوونەوە لەكاری ڕاگەیاندن و هەر كارێكی تر كاری گەنجە و بەگەنج دەكرێت، هەروەها ئاماژە بە پێگەی گرنگی ئافرەتان لەم بوارەدا و شێكردنەوەیێكی پۆخت بۆ ئەو كێشە ئاستەنگانە خستە بەرباس،‌ كە ڕووبەڕووی ئافرەتی ڕاگەیاندنكار دەبن.
لەبەشی دووەمی‌ پانێلەكە ڕۆژنامەنووس ایڤان جانێ، بەڕێوەبەری ناوەندی دیانا بۆ ڕاگەیاندن باسی مێژووی ڕۆژنامەگەری ئاشووری كرد، لە خاڵی دەستپێكەوە لە ئورمییە تاكو دیانا، ئەوەشی خستە ڕوو كە ڕۆژنامەی (زەهڕیڕی دبەهڕا) بەدایكی ڕۆژنامە ئاشوورییەكان هەژماردەكرێت و یەكەم ژمارەی ساڵی 1849 لەشاری ئورمییەی ئێران دەرچووە. هەروەها باسە گرنگترین ڕۆژنامە ئاشوورییەكانی نیوخۆ و درەوەی ووڵاتی كرد و باسی ڕولی ڕۆژنامەنووسە ئاشوورییەكان كرد لە دامەزراندنی وپێشخستنی كاری ڕاگەیاندن.

زۆرترین بینراو