یانەی هەولێر بارودۆخی دارایی خراپە

یانەی هەولێر بارودۆخی دارایی خراپە

زاری كرمانجی: یانەی هەولێر دەڵێت، ئەگەر حكومەت هاوكاریمان نەكات بۆ بەشداریكردن لە خولی عێراقدا، ناچار دەبین دەرگەكانی یانەكە دابخەین و بچینەوە ماڵەكانمان.
پشتیوان شبیب، سەرۆكی لیژنەی هەڵسەنگاندنی یاریزانان لە یانەی هەولێر گووتی" چەند ساڵێكە یانەكەمان قەیرانی دارایی هەیە، بەڵام هیچ كاتێك هێندەی ئەمساڵ بارودۆخی یانەكە خراپ نەبووە، بەهۆی ئەوەی سەرچاوەكانی داهاتی یانەكە تووشی كێشەبوون، بۆیەش بڕیارمانداوە وەكو یانەی هەولێر بۆ وەرزی داهاتوو پشت بە یاریزانی كورد ببەستین، بەڵام بەو تیپەی كە ئێمە دەمانبێت بەشداری لە خولی عێراق بكەین، ئەنجامی باشمان نابێت و ئەگەر بتوانین بمێنینەوە بەم یاریزانانەی ئێستا هەن شتێكی باشە".
لە وەڵامی پرسیارێكدا كە یاریزانە كوردەكان هەمیشە گلەیی دەكەن كە هەولێر لە قەیراندا بیری یاریزانی كوردی دێتەوە, لەو بارەیەوە شبیب گووتی" ئەگەر بتەوێ ركابەری لەسەر بردنەوەی نازناوەكان بكەیت پێویستیت بە یاریزانی باش دەبێت، ئەگینا یاریزانی كوردمان هەمیشە لەبیربووە، ئەگەر بگەڕێینەوە بۆ دواوە ئەو كاتەی نێچیرڤان بارزانی هاوكاریكردین چوار ساڵ بووینە پاڵەوانی عێراق و یاریزانە باشەكانمان هێنایە هەولێر، بۆیە ئەگەر بتەوێ نازناو ببەیتەوەو دەبێت یاریزانی باش بگوازیتەوە".
شبیب لەبارەی وادەی ئامادەبوونی پێكهاتەی یانەی هەولێر دەڵێت" ئێستا گرێبەستمان لەگەڵ 11 یاریزان كردووە، پێویستیمان بە نزیكەی 13 بۆ 14 یاریزانی دیكە هەیە، بۆ ئەوەش پێویستی بە كات و پارە هەیە، ئێستا یاریزانی كوردیش ئامادەنییە یاریت بۆ بكات، لەكاتێكدا لە بەغدا 200 ملیۆن گرێبەستی پێشكێشكردووە، لەگەڵ ئەو یاریزانانەی چوونەتە خولی عێراقیش قسەمان كردووە، بەڵام ئەوان ئامادەنین بە مووچە یاری بكەن، یاریزان هەیە لە یانەی هەولێر پێگەیشتووەو ئێستا ئاستی زۆرباشە، دەڵێت پێویستیم بە پارەیە، بۆیە گرێبەستمان لەگەڵ ناكات".
سەرۆكی لیژنەی هەڵسەنگاندنی یاریزانان لە یانەی هەولێر دەڵێت" هەوڵدەدەین تا 1ی مانگی داهاتوو دەست بە مەشقەكان بكەینەوە، ئەگەر توانیمان تیپەكە ئامادەبكەین، ئەگەرنا چەند جارێك پێشنیازمان بۆ یانەكە كردووە نامەیەك بۆ حكومەت بنووسرێت، ئەگەر هاوكاری یانەكە نەكرێت، یانەی هەولێر دادەخەین، لەكاتێكدا تەنیا خوشەویستی وەرزش ئێمەی هێناوەتە یانەكەو زیاتر نا، بۆیە داوادەكەین ئاوڕێك لە وەرزشوانان بدرێتەوەو هاوكاری بكرێن، چونكە وەرزش كایەیەكی گرنگی ژیانە".
رۆژی 20ی ئەیلوولی داهاتوو ركابەرییەكانی وەرزی نوێی خولی عێراق دەست پێدەكات، هەردوو یانەی زاخۆو هەولێر لە باشووری كوردستان بەشداری لە خولەكەدا دەكەن.

زۆرترین بینراو