یانەی هەولێر گۆڵكاری كوردستان دێنێتەوە ریزەكانی

یانەی هەولێر گۆڵكاری كوردستان دێنێتەوە ریزەكانی

زاری كرمانجی: یانەی هەولێر بەمەبەستی درووستكردنی پێكهاتەی نوێی تیپی خولی نایابی عێراق، دەیەوێ گرێبەست لەگەڵ سێ یاریزانی شاری سلێمانی واژۆ بكات.
ئەمساڵ یانەی هەولێر بەسەركردایەتی رادان گاسانینی راهێنەر، دەیەوێ بەپێكهاتەیەك كە سێبەشی یاریزانەكانی كورد بن بەشداری بكات لە خولی نایابی عێراق.
محەممەد خۆشناو، ئەندامی دەستەی كارگێڕی یانەی هەولێر لە لێدوانێكدا گووتی" لە دواین كۆبوونەوەماندا لیژنەیەكمان درووستكرد بۆ هێنان و دەستنیشانكردنی یاریزانان و گفتۆگۆ لەگەڵیان، لەم رووەوە بایەخێكی زۆر تایبەت بە یاریزانی كورد دەدەین، لەوانەش هەریەك لە دیار عەلی، شێروان كوردستان، شوانە مەحموود لە ناو ئەو ناوانەدان گفتوگۆی گرێبەستیان لەگەڵ دەكەین".
یانەی هەولێر خاوەن چوار نازناوی خولی یانە نایابەكانی عێراقە، هەروەها دووجار پلەی دووەمی لە جامی یەكێتی یانەكانی ئاسیا بەدەستهێناوە.
ئەو ئەندامەی دەستەی كارگێڕی یانەی هەولێر، لەبارەی یاریزانانی كوردی خۆیانەوە جەختی لەسەرئەوەكردەوە" لە چەند رۆژی داهاتوودا لەگەڵ یاریزانەكانمان دادەنیشین و دەمانەوێ گرێبەستیان لەگەڵ نوێ بكەینەوە بەپێی خواستی راهێنەر، هەروەها رادان گاسانین بەر لە مانگێك لە دەستپێكردنی خولی عێراق دەگەڕێتەوە شاری هەولێر".
دیار عەلی، كە بە حەمكە ناودەبرێت، پێشتر یاری بۆ یانەی هەولێر كردووەو سێ وەرزە بەسەریەكەوە لەگەڵ یانەی نەورۆز دەبێتە گۆڵكاری خولی نایابی كوردستان، یەكێكە لە ئامانجە سەرەكییەكانی یانەی هەولێر، كە دەیەوێت بە گەڕاندنەوەی یاریزانە كۆنەكەی هێڵی هێرشبردنەكەی بەهێزتر بكات.

زۆرترین بینراو