‎ خانەی فەرهەنگی شین لەشاری سۆران كرایەوە

‎ خانەی فەرهەنگی شین لەشاری سۆران كرایەوە

دیدار محەمەد- هەسنانی: بۆیەكەمینجار بەسەرپەرشتی دوو گەنجی دانیشتووی شاری سۆران، خانەی فەرهەنگیی شین دامەزرا، رێكان وەلید یەكێك لە ئەندامی سەرپەرشتیاری دامەزرێنەری خانە فەرهەنگیەكە، لە دیدارێكی زاری كرمانجیدا زانیاری لەسەر كردنەوەی خانەكەو پڕۆژەو بەرنامەكانیان دەخاتەروو.
رێكان وەلید، ئەندامی سەرپەرشتیاری دامەزرێنەری خانەی فەرهەنگی شین، بە زاری كرمانجی راگەیاند " بەسەرپەرشتی خۆم و سۆران خالیدی هاوڕێم، هەروەها بە پاڵپشتی كۆمەڵێك گەنج و رۆشنبیرانی دەڤەرەكە، بیرمان لە كردنەوەو دامەزارندنی شوێنێك كردەوە تا گەنجان و لاوان و خاوەن بەهرەو شاعێر و نووسەرانمان لە سۆران رۆلی خۆیان تێدا ببینەوە، دواجار بڕیارماندا خانەی فەرهەنگی شین، بكەینەوە، كە خانەیەكی ڕۆشنبیری و ئەدەبی و هونەری سەربەخۆی قازانج نەویستە، لە پێناو گرینگی دان بە بواری ڕۆشنبیركردنی تاك و ئاراستە كردنی بە گرینگی دان بە كتێب و پڕۆژە ڕۆشنبیریەكان لە پێناو پێگەیاندنی ئاستی زانستی تاك لە كۆمەڵگەدا، كە پەرتووكخانەو سینەما و قاوەخانە لەخۆدەگرێت، رۆژانە لە كاتژمێر 9ی بەیانییەوە تاوەكو 11ی شەو بەرووی میوانانیدا كراوەیەوە. هەروەها هەفتانە جارێك فیلمێكی سینەمایی ناوەخۆی و بیانی تێدا نمایشدەكرێت.
گووتیشی " بۆیەكەمینجارە لە باشووری كوردستان بەگشتی و لە سۆران بە دیاریكراوی، سیستەمێكی خۆبەخشی بۆ لاوان دادەمەزرێت، خۆبەخشانی خانەی فەرهەنگی شین، مافی ئەوەیان هەیە بەخۆڕایی سوود لە خزمەتگوزارییەكانی خانەكە وەربگرن و هەفتانە پەرتووكێك بۆ خوێندنەوە بە ئارەزووی خۆیان ببەنەوەو لە چالاكییەكانی خانەكەدا جێگەی دیاریكراوی خۆیان دەبێت و رێزلێگیراو دەبن. هەموو كەسێك مافی بوون بە ئەندامی خۆبەخشانی خانەكەیان هەیە و مانگانە بۆ پشتیوانیكردن لە بەردەوامبوونی خانەكە پێنج هەزار دینار وەك هاوكاری پێشكەش بە خانەكە دەكەن.
دەربارەی هەڵبژاردنی ناوەكەش بۆ خانەكەیان، دەڵێت " ئێمە تەنها شین وەك ڕەنگمان هەڵنەبژاردووە بۆ ناو، بەڵكو تەواوی ژیان لە ژێر ئاسمانی شیندایە، وشەی شین لە ئەدەبی كوریدا مانی زۆر لەخۆ دەگرێ، لە هەندێ شوێندا شین وەك واتای بوون یا پێگەیشتن دێت، بۆ نمونە دەڵێن (دار و درەخت شین بووە) ، یاخود لە هەندێ شوێندا بە واتای گەورە یان مەزنی دێت، شین لە فەرهەنگی كۆندا بۆ پرسەش بەكار هاتووە بۆ نمونە دەیان ووت ( فڵان خێزان شینیان دەگێڕا ) واتە خەم و خەفتیان بە دەنگ و گریان دەردەبڕی، ئەمەو چەندی واتای دیكە لەخۆدەگرێت.
رێكان وەلید، ئەوەش دەخاتەروو " نەبوونی دەرفەتی كار و ژیانێكی شایستە گەنجی كوردی رووبەرووی چەندین گیروگرفت كردووەتەوە، ئەمەش لە سۆران بەئاشكرا هەستی پی َدەكرێت. رەنگە ژمارەیەكی بەرچاو لە كافێ لەم شارە هەبن، بەڵام هیچ كام لەم كافێیانە نەیانتوانییوە وەك پێویست هاوكاری گەنجابن و ئاستی زانستیان وەك پێویست بەرزبكەنەوەو داهاتوویان لەگەڵدا بنیادبنێن، رەنگە بەشێكیان زیانێكی گەورەشیان هەم لە رووی تەندرووستی، هەمیش لە رووی كات كوشتن بۆ گەنجەكان هەبێت. بۆیە خانەی فەرهەنگی شین، ئامانجییەتی هاوكاری گەنجانبێت و ژیانێكی شایستەتریان بۆ فەراهم بكات، بەجۆرێك سوود لە تواناكانیان ببیندرێت و ئاستی كۆمەڵگەی پێ بەرەوپێشببرێت. تاكە خواست و ئامانجی خانەی فەرهەنگی شین، هاوكاربوونی گەنجان و بەرەوپێشبردنی كۆمەڵگەیە. ئێمە وەك دوو گەنج هەموو هەوڵ و توانایەكمان خستووە گەڕ و لەسەر ئەمەش بەردەوام دەبین تاوەكو هاوكاربین و دەستی گەنجانی شارەكەمان بگرین و دهاتووییەكی پڕشنگدارتریان بۆ دەستەبەر بكەین، دەمانەوێت گەنجانی ئێمە نموونەی دیاری كوردستان و ناوچەكەبن و پێشەنگبن لە كارەكانیاندا، رووبەرووی بەربەستەكان ببەنەوە و بە تواناكانیان بیسەلمێنن كە گەنجانی ئێمە دەتوانن چی بكەن و چۆن داهاتووی خۆیان و شارەكەیان و هەرێمەكەشیان بۆ باشترین دەگۆڕن.
پێشیوابوو " لە خانەی فەرهەنگی شین، هونەرمەندان، نووسەران، بەهرەمەندان دەتوانن بەرهەمەكانیان نمایشبكەن و بیرۆكەكانیان بەیەكەوە ئاڵوگۆڕ بكەن، تابلۆكان و وێنەكانیان نمایشبكەن و شعرەكانیان بخوێننەوە، سمینار، دیبەیت، سیمپۆزیۆم، دیبریف، كۆنفرانس و دایەلۆگ ئەنجامبدەن، تاوەكو هەموویان بەیەكەوە بەشداربن لە بەرەوپێشبردنی ناوچەكە و هەرێمەكەمان. خانەی فەرهەنگی شین پشتیوانیان دەبێت و دەبێتە ماڵێك بۆ هەموویان، هاوكات میوانداری بەرهەمەند و گەنجانی شارەكانی دیكەی كوردستان دەكات، هەم لە رۆژهەڵات، لە باكوور، لە رۆژئاوا و لە شارەكانی دیكەی هەرێمی كوردستانیش، دەبێتە ناوەندێك و پردێك بۆ كۆكردنەوەی گەنجان و بەهرەمەندانی كورد.
لەدوا قسەكانیدا رێكان وەلید دەڵێت " ( خانەی فەرهەنگیی شین) هیوایەكە لە بێ ئومێدی گەنجان سەرچاوەی گرتووە، راستە ئێمە وەك دوو گەنجی ئەم شارە بە تێچووی شەخسی خۆمان بەبێ هیچ پاڵپشتیەكی ماددی، لەگەڵ چەندین هاوڕێی خۆبەخش ملمان خستۆتە بەر ئەو ئەركە مەزن و قورسە، بەڵام ئەم جەنگە بەتەنها بە ئێمە ناكرێت، لە كاتێكدا خانەیەكی فەرهەنگ بەتەنیا بتوانێ جەنگی ئەم هەموو كافێیە بازرگانییە بكات، بۆیە پێویستیمان بە هاوكاری هەمەلایەن هەیە، بۆ بەردەوام بوون لە بەجێگەیاندنی ئەم ئەركە، پشتمان بە گەنجان و رۆشنبیران و خەمخۆران بەستوەو پێویستیمان بە گشت توانایەك هەیە، هاوكاری دامەزراوەكانی دەوڵەت، بۆ كارەكانمان پاڵپشتیەكی مەزن دەبێت، ئومێد دەكەین لە ئاست ئەو بەرپرسیارەتیەدا بین و بتوانین خزمەتی رۆشنبیری و فەرهەنگی پێشكەش بكەین.

زۆرترین بینراو