په‌رله‌مانی كوردستان میوانداری 4 وه‌زیر ده‌كات

په‌رله‌مانی كوردستان میوانداری 4 وه‌زیر ده‌كات

زاری كرمانجی - سبەی سێشەممە 25 - 5- 2021،  پەرلەمانی کوردستان بە ئامادەبوونی  هه‌ریه‌ك له‌وه‌زیرانی ناوخۆ ، ئه‌وقاف و كاروباری ئاینی ، كاروباری كۆمه‌ڵایه‌تی ، رۆشنبیری و  ئەمینداری ئەنجومەنی باڵای خانمان  كۆده‌بێته‌وه‌ و گفتوگۆ لەسەر تاوانەكانی كوشتن بەگشتی و كوشتنی ئافرەت و خۆكوشتن دەکەن.
 له‌راگه‌یاندراوێكدا ده‌سته‌ی سه‌رۆكایه‌تی په‌رله‌مانی كوردستان كارنامه‌ی دانیشتنی سبه‌ی بڵاو كرده‌وه‌ به‌م شێوه‌یه‌ :

به‌پێی حوكمی مادده‌ی (5)و بڕگه‌كانی (یه‌كه‌م و دووەم و سێیەم) له‌مادده‌ی (16)و بڕگه‌ی (سێیه‌م) له‌مادده‌ی (18)و بڕگه‌كانی (یه‌كه‌م و دووه‌م و سێیه‌م و چواره‌م و پێنجه‌م) له‌مادده‌ی (20)و مادده‌كانی (47، 48، 52، 54، 55، 56، 57) له‌په‌یڕه‌وی ناوخۆی په‌رله‌مانی كوردستان-عێراق، ده‌سته‌ی سه‌رۆكایه‌تیی په‌رله‌مان بڕیاریدا به‌رنامه‌ی كاری دانیشتنی ژماره‌ (14)ی ئاسایی خولی بەهارەی ساڵی سێیەم له خولی پێنجه‌می هه‌ڵبژاردنی په‌رله‌مان له‌كاتژمێر (11)ی پێشنیوه‌ڕۆی رۆژی سێشەممە رێكه‌وتی 2021/5/25، به‌م شێوه‌یه‌ بێت:
یەكەم: خستنەڕووی بیرۆكەی بەرێز پەرلەمانتار (عبدالستار مجید قادر) پەیوەست بە(دۆزینەوەی هەڵی كار لەڕێگای بەگەرخستنەوەی كارگەكان)، بەپێی حوكمی خاڵی (2)ی بڕگەی (یەكەم) لەماددەی (49)ی پەیڕەوی ناوخۆی پەرلەمانی كوردستان-عێراق.
دووەم: خستنەڕوو و گفتوگۆكردنی دیاردەی (تاوانەكانی كوشتن بەگشتی و كوشتنی ئافرەت و خۆكوشتن) بەئامادەبوونی لایەنی پەیوەندیدار لەحكومەتی هەرێمی كوردستان، بەپێی حوكمی بڕگەی (یەكەم)ی ماددەی (66) لەپەیڕەوی ناوخۆی پەرلەمانی كوردستان.
سێیەم: خوێندنه‌وه‌ی دووه‌م بۆ پێشنیازەیاسای (هەمواری یەكەمی یاسای ژمارە (3)ی ساڵی 2019 یاسای بەخاوەنكردنی ئەو زەوییانەی كە لەسنووری شارەوانییەكان زێدەڕۆییان لەسەر كراوە لەهەرێمی كوردستان-عێراق)، به‌پێی حوكمی مادده‌كانی (87، 88، 89) له‌په‌یڕه‌وی ناوخۆی په‌رله‌مانی كوردستان.

زۆرترین بینراو