فەرمانگەی چاككردنەوەو پارستنی رێگاوبان كرایە بەڕێوەبەرایەتی

فەرمانگەی چاككردنەوەو پارستنی رێگاوبان كرایە بەڕێوەبەرایەتی

 

خۆسرەت سادق : فەرمانگەی سۆران لە هەیكەلی ئیداریی ساڵانە سڕابووە


*30 % بوودجە بۆ بەڕێوەبەرایەتییەكە تەرخان دەكرێ


*پێشتر بۆ بەكرێ گرتنی شۆفەڵێك سەت تەلەفۆنمان بۆ سەرەوە دەكرد


زاری كرمانجی – مەهدی محەممەد : دوێنێ سێشەممە 31/8/2021 بە ئامادەبوونی دانا عبدولكەریم وەزیری ئاوەدانكردنەوە و نیشتەجێكردن، بەڕێوەبەرایەتیی چاككردنەوەو پاراستنی رێگاوبانی سۆران كرایەوە، ئەمەش بە یەكەم بەڕێوەبەرایەتی دێت دوای راگەیاندنی ئیدارەی سۆران.
خۆسرەت سادق دری بەرێوەبەری بەرێوەبەرایەتی چاككردنەوەو پاراستنی رێگاوبانی سۆران لە بارەی گرینگی و سوودی بە بەرێوەبەرایەتی بوونی فەرمانگەكەیان بۆ زاری كرمانجی قسە دەكات و دەڵێ‌"ئەوەی كە پێشتر هەبوو هۆبەیەك بوو بە ناوی فەرمانگەی سۆران و سەر بە بەرێوەبەرایەتی چاككردنەوە و پاراستنی رێگاوبانی هەولێر بوو، تەبعەن ئەو هۆبەیە كۆمەڵێك دەسەڵاتی سنوورداری هەبوو و جاری واش هەبوو ئەسڵەن دەسەڵاتی هیچی نەبوو، كارە باشەكەی ئەو فەرمانگەیە ئەوە بوو كۆمەڵێك فەرمانبەری وەزارەتی ئاوەدانكردنەوە لێرە سەرپەرشتی هەرچوار قەزاكەی دەكرد و هەر موچە و پشتگیری هەبوایە دەهاتە فەرمانگەی سۆران، بەڵام لە رووی تەكنیكیەوە دەسەڵاتی نەبوو، ئەمانە هەستابوون تیمێكیان دانابوو بە ناوی كەرتی چوار، ئۆتۆماتیكیەن بەرپرسی فەرمانگە لەهەمانكات بەرپرسی كەرتی چواریش بوو هەتا دوو ساڵ بەر لە ئێستا، دواتر كەرتیان جیاوازكردەوەو فەرمانگەی سۆرانیش هەر بە یەكجاری وێران بوو، هیچ بایەخێكی لەسەرەوە پێ نەدەدرا، تا كار گەیشتە ئەوەی كە بڵێن فەرمانگە هیچ دەسەڵاتێكی یاسایی نییە و لە ساڵی 2018 ئەو فەرمانگەیان سڕییەوە لە هەیكەلی ئیداریی ساڵانە لە وەزارتی دارایی، یەك ساڵ بەدواداچوونم كرد تاكو وەكو خۆم لێكردەوە، دوای ئەوە ئیدی پێمان گووتن بەسە چیتر پێویست ناكات بۆ گرتنی شۆفەڵێك سەت تەلەفۆن بكەین بۆ بەرێوەبەری گشتی لە هەولێر و لەبەر ئەم و ئەو بپارێێنەوە، زیاتر لە 2 ساڵ بە فراوانییەوە لەسەر ئاستی قایممقام و مدیر ناحییەكانی هەرچوار قەزاكە كە بەندەش تێدا بەشدار بوو كۆنووسێكمان نووسی كە ئەو دەڤەرە بە پێی ئەوەی ناوچەیەكی شاخاوەییە و هۆكارەكانی تر بۆ تێكچوونی رێگاوبان، بەداواداچوونمان كرد لە سەردەمی د . فەرەسەت ی رەحمەتی ئەو كات پارێزگاری هەولێر بوو، ئەویش لای خۆییەوە پێشتگیری كرد و دوای ئەوە وەزعی كۆرۆنا هاتەگۆڕێ و، دووبارە دەستمان پێكردەوەو هەندێك گۆڕانكاری كرا و دوای ماندووبوونێكی زۆر لە 14 / 6/ 2021 بڕیاری فەرمانی وەزاری دەرچوو بۆ بە بەرێوەبەرایەتی كردنی فەرمانگە"،
بوونی بەرێوەبەرایەتییەكی وا پێویستی بە ئیمكانیات و بوودجەی پێویست هەیە، بۆ راپەڕاندنی ئەرك و كارەكانی، لەم رووەشەوە دری دەڵێ‌"دوو مانگ شەڕی بوودجەمان كرد، لە هەولێر دەیانگووت ئێمە بوودجەتان نادەینێ، ئێمەش پێمانگووتن بە پێی ناوچەكە دەبێ 40 % بدەنە ئێمە، دواتر دوای هەوڵ و كۆششێكی زۆر لەسەر 30 % رێكەوتین و لەوانەیە پاش ماوەیەكی تر بوودجەیەكی تایبەت بدەن"، 
لەسەر جیاوازی دەسەڵاتی نێوان فەرمانگە و بەرێوەبەرایەتی، بەرێوەبەری چاككردنەوەو پاراستنی رێگاوبانی سۆران دەڵێ‌"لەداهاتوو هەموو دەسەڵاتێك لە دەستی خۆمانە و، بۆ ئەنجامدانی هەر كارێك پێویست ناكات پرس بە سەرەوە بكەین".

 

 

 

 

 

زۆرترین بینراو