گۆڕانكاری و بڕیارە نوێیەكانی یەكێتی ئاشكرا كران

گۆڕانكاری و بڕیارە نوێیەكانی یەكێتی ئاشكرا كران

زاری كرمانجی- ماڵپەری ئاوێنە:  میدیای نزیك لەماڵی تاڵەبانی بڵاویكردەوە لەماوەی دوو هەفتەی داهاتوودا گۆڕانكاری لە ئۆرگان و مەكتەب و مەڵبەندەكانی یەكێتیدا دەكرێت و سیستمی هاوسەرۆكیش هەڵدەوەشێنرێتەوە. هەروەها بڕیاریشە ماڵی تاڵەبانی كۆمەڵێك بەڵگەنامە بڵاو بكەنەوە.   

بەگوێرەی ئەو زانیارییانەی لەمیدیاكانی نزیك لە ماڵی تاڵەبانییەوە بڵاوكراونەتەوە ، گەڕانەوە بۆ پێش ڕووداوەكانی 8 تەمموز نییە، گۆڕانكاریكردنیش ئۆرگانەكانی یەكێتی و شێوازی كاركردنی ئەم حیزبە دەگرێتەوە بەگۆڕینی سیستمی هاوسەرۆكایەتییەوە.  

هەنگاوەكانی سەرەتا بە گۆڕینی هەندێك لە لێپرسراوی مەڵبەندەكان دەست پێدەكات و لێپێچینەوەش لەهەندێك لە كەسانی نزیك لە لاهور شێخ جەنگی هاوسەرۆكی یەكێتی درێژەی دەبێت بەتایبەت پاش ئەوەی ئەم هاوسەرۆكە هێشتا لە سلێمانی نیشتەجێیە و ژمارەیەك لەكەسە نزیكەكانی لەگەڵدایە بەهیوای دۆزینەوەی دەرچەیەك بۆ كێشەكان، ئەمەش پێچەوانەی خواستی ماڵی تاڵەبانییە كە پێداگرن لەسەر كۆتاییهاتنی یەكجاریی سەرجەم ئەرك و بەرپرسیارێتی و ئامادەیی لە كایەی حیزبی و چوونەدەرەوەی لە كوردستان لە ئێستادا.  

هەر بەگوێرەی میدیاكانی ماڵی تاڵەبانی، كۆمه‌ڵێك "دۆسییەی گه‌وره‌ و هەستیار" بۆ خه‌ڵكی ئاشكرا ده‌كرێن، ئەمەش ئاماژەیە بۆ كارنامەی كوڕانی شێخ جەنگی لە حیزب و حكومەت بەتایبەت پاش كۆنگرەی كۆتایی 2019.   

بەدوای ئەمەشدا سۆشیال میدیای سەربە لاهور جەنگی بڵاویكردەوە "هەموو ئەو بڕیارانەی دەرکراون ناشەرعین و قبوڵکراو نین وە جەماوەری یەکێتی دڵنیا دەکەینەوە دەستێکی چەپەڵ هەیە لە پشتی ئەم بڕیارانەوە".   

ئێوارەی 8 تەمموزی 2021، بافڵ تاڵەبانی  هاوسەرۆكی یەكێتی و قوباد تاڵەبانی جێگری سەرۆك وەزیران، بەرپرسانی دەزگای زانیاری و دژە تیرۆریان گۆڕی كە یەكەمیان كەسێكی نزیكی لاهور جەنگی و ئەویتریان پۆلاد جەنگی بوو، بەدوای ئەوەشدا بافڵ تاڵەبانی دەستی گرت بەسەر دەزگا میدیایی و حزبییەكانی سەر بە لاهور شێخ جەنگی هاوسەرۆكەكەیتری یەكێتی و پرۆسەكە بەفەرمی ناونرا "ڕاستكردنەوەی ڕێڕەو".  

زۆرترین بینراو