گەنجێكی دەڤەری بارزان پێنچ هەزار نەمام دەچێنێت

گەنجێكی دەڤەری بارزان پێنچ هەزار نەمام دەچێنێت

رەمەزان هەرنی – بارزان : گەنجێكی‌ دەڤەری‌ بارزان دەستی كردووە بەهەڵمەتێكی نیشتمانی بۆ سەوزكردنی سرووشتی ناوچەكە و پێنج هەزار نەمامی دەگمەن لە ناوچەی بارزان دەچێنێت كە لەگەڵ ژینگەی ناوچەكە دەگونجێن.

شەو‌ان بارزانی‌، خاوەنی پڕۆژەكە بە زاری كرمانجی راگەیاند : لە سۆنگەی‌ هەستكردن بە بەرپرسیارێتی‌ و لەبەرچاوگرتن و پاراستنی‌ سروشت و ژینگە، دەستم كردووە بە هەڵمەتی‌ چاندنی‌ نەمام لە دەڤەری‌ بارزان.

شەوان گوتیشی :" وێڕای‌ ئەوەی دەڤەری‌ بارزان خاوەنی‌ مێژوویەكی جوانە لە پاراستنی‌ ژینگە و سروشت بە دار و ئاژەڵەكێوی‌ و سەرچاوەكانی‌ ئاو، بەڵام لەگەڵ ئەوەش پێویستە زیاتر پەرە بە ژینگە و سروشت بدرێت، بۆیە وەك ئەركێكی‌ نیشتمانی‌ دەستم كردووە بە هەڵمەتێكی‌ فراوانی‌ چاندنی‌ نەمام لە دەڤەری‌ بارزان و لە هەڵمەتەكەدا زیاتر لە پێنج هەزار نەمام دەچێنرێت.

شەوان ئەوەشی خستەڕوو:" هەڵمەتەكە زیاتر ئەو ناوچانە بەخۆیەوە دەگرێت كە داری كەمی تێدایە، هەروەها هەموو ئەو ناوچانەش دەگرێتەوە كە ناوچەی‌ گەشتوگۆزار و سەیرانگا و شوێنی‌ گشتین و هاووڵاتییان بە مەبەستی‌ جۆراوجۆر ڕووی‌ تێدەكەن.

شەوان روونیكردەوە:"  بۆ ئەو هەڵمەتە زیاتر بایەخم بە دارە دەگمەنەكان داوە و داری بەروو، كەڤوت و مازی و چەند جۆرەدارێكی‌ ترم بەڵاوە مەبەستە بۆ ناشتن، چونكە تەمەنێكی‌ زۆریان دەبێت و لەگەڵ سروشتی ناوچەكەمان دەگونجێن.

شەوان خاوەن پرۆژەكە زیاتر گوتی :" داوا لە هاووڵاتیانی‌ سنووری‌ دەڤەری‌ بارزان دەكەم كە هەر كەسێ پێویستی‌ بە دار هەبێت یاخود دەتوانێت لە هەڵمەتەكەدا بەشداربن، با بە زووترین كات سەردانمان بكەن و ئێمەش بە هەموو شێوەیەك هاوكارییان دەكەین بۆ ئەوەی‌ هەڵمەتەكە بەشێوەیەكی‌ رێكوپێك بەڕێوە بچێت.

زۆرترین بینراو