گەنجانی سۆران داواكارییان لە سەرپەرشتیاری ئیدارەی سەربەخۆ هەیە

گەنجانی سۆران داواكارییان لە سەرپەرشتیاری ئیدارەی سەربەخۆ هەیە

پشتیوان كەریم – زاری كرمانجی 


 گەنجان هەروەكو چۆن دڵخۆشبوون بە بوونی سۆران بە ئیدارەی سەربەخۆ، ئاواش بە دڵسۆزی و هەستكردن بە بەرپرسیاریەتی لەپێناو بەرەوپێشچوون و سەركەوتنی ئیدارەكە، هەمیشە پێشنیار و داواكاری خۆیان لەرێگەی زاری كرمانجی یەوە بۆ سەرپەرشتیاری ئیدارەی ناوبراو دەخەنە روو.  
هیمداد رەفعەت, قوتابی بەشی دەروونناسی لە زانكۆی سۆران، دەڵێ‌"وەك قوتابیەكی زانكۆ بوونی شوێنەكانی كات بەسەربردن بە پێویست دەزانم و گەرەكە ئیدارەی سەربەخۆ كاری زیاتری بۆ بكات، بە تایبەت دروستكردنی پارك، لە نێو سەنتەری بازاری قەزای سۆران، تەنها دوو پارك هەیە ئەویش وەك پێویست نین، دەكرێ پاركی سەردەمیانە و شارستانیەتر دروست بكرێن، بۆ ئەوەی ببێتە هۆكارێك كە هاوشارییان بە هەموو چین و توێژەكانییەوە رووی تێ بكەن و كاتەكانیان تێدا بەسەر ببەن، جا ئەو پاركانە گشتیی بن یا كەرتی تایبەت خاوەنداریەتیان بكات، لەسەر پێدانی رەزامەندی پاركەكانیش دەكرێ مەرج بۆ خاوەن كار دابنرێت كە لە كاتی دروست كردنی پاركدا چەندین شوێنی جیا دروست بكرێت بۆ هۆشیاری كۆمەڵایەتی وەكو یانەو كتێبخانەو سەنتەر و رێكخراوەكانی كۆمەڵگەی مەدەنی و سەنتەرەكانی فێربوونی زمان بەتایبەت زمانی ئینگلیزی، بۆ ئەوەی تاكەكانی كۆمەڵگەكەمان زۆرترین دەرفەتی كاریان هەبێت، وە شوێنی تایبەت هەبێت بە ئەنجامدانی خول و سمینار و كۆبوونەوە جەماوەریەكان لە ناو پاركەكان".
هیمداد ئەو ئەركە دەخاتە ئەستۆی زانكۆ و دەڵێ‌"دەبێ زانكۆ رۆڵی سەركی بگێڕێت لەم بوارانەدا و پێویستە مامۆستایانی ناچار بكات لە ماوەی هەر ساڵێكی كاركردنی لە زانكۆ، پێوستە بەشدار بێت لە بەڕێوەبردنی چەندین خول و سمینار و سەردانی مەیدانی سەنتەرەكان كە لە پارەكەكان شوێنیان بۆ دیاری كراوە، هەروەها قوتابیانی زانكۆ بە تایبەت بەشەكانی ئاداب وەك (مێژوو، دەرونزانی، كۆمەڵناسی، ئینگلیزی) ڕۆلیان هەبێت لە پێشكەشكردنی خول و سمینار لەژێر سەرپەرشتی مامۆستایانی پسپۆری بواری خۆیان بۆ ئەوەی لە دواجار كۆمەڵگە سود لە بڕوانامە و پسپۆریەكەیان وەربگرێت و ڕۆلیان هەبێت لە هۆشیاركردنەوەی كۆمەڵگە و دەرچوونیان تەنیا پارچە كاغەزێك نەبێت، لەگەڵ ئەوەشدا زۆر گرنگە هەر پڕۆژەیەكی كەرتی تایبەت، سەرپەرشتی و سپۆنسەری سەنتەرێكی رۆشنبیری و گەشەپێدان و پەرەپێدانی كۆمەڵایەتی بكات، وە پێوستە پەیكەری سەنتەرەكان سەرلەنوێ و بە هێز و توانای گەنجانەوە دابڕێژرێنەوەو هەر كارگێرێكی سەنتەر بەپێی پسپۆری و بڕوانامەكەیان بێت، كارگێرەكان ئەركی خۆیان ئەنجام بدەن لە رووی هۆشیاری كۆمەڵگە"،
ئەو قوتابییەی زانكۆ، بڕیاری سەربەخۆبوونی ئیدارەی سۆران دڵخۆشیكردووەو داواكاریشە كەوا تیمی ئیدارەی سەربەخۆ لە پێشینەی كارەكانیان، هۆشیاركردنەوەی تاكەكانی كۆمەڵگە بێت و پێی وایە"تاكی هۆشیار كۆمەڵگەیەكی تەندروست و رۆشنبیر و رۆشنفكرت بۆ بەرهەم دێنێت".
فاتیمە فەیسەل قوتابی بەشی یاسا لە زانكۆی سۆران، جگە لە پێشنیاری دروستكردنی چەند پاركێك، داواكاریشە بایەخی زیاتر بە پەرتووكخانەی گشتی بدرێت و دەڵێ‌"باشترە بایەخی زیاتر بە كردنەوەی پەرتووكخانەی گشتی بدرێت و نزێك لە سەنتەری بازار بێ، بۆ ئەوەی قوتابیان بتوانن سوودی لێ وەربگرن و بە خواستن پەرتووكەكان وەربگرن و دواتر بیگەڕێننەوە"، ئەو دەڵێ‌"ناكرێ شوێنێكی گەورەی وەك سۆران، تەنیا یەك پاڕك و دوو سێ كتێبخانەی هەبێ"، فاتیمە باس لە پەراوێزخستنی هونەر و شانۆ دەكات لە دەڤەرەكە و دەڵێ‌"بە دروستكردنی هۆڵی سینەما و شانۆ رووح بەبەر ئەو دوو هونەرە دەگڕێتەوە و لە كاڵبوونەوەی یەكجاری رزگاری دەبێ و گڕوتین دەبەخشێتەوە بە هونەردۆستان و شانۆكاران".
فاتیمە خانمایش لەبیر ناكات و بوونی كافێ بۆیان بە پێویست دەبینێ"بەداخەوە بوونی كافێی تایبەت بە ئافرەتان پشتگوێ خراوەو دەكرێ لە داهاتوو كار لەسەر ئەمەش بكرێ".
محەمەد رزگار قوتابی زانكۆی سۆران، باس لە بەهرە جیاوازەكانی گەنجانی دەڤەرەكە دەكات و ئەویش بوونی هۆڵێكی شانۆ بە گرنگ دەزانێ بۆ ئیدارەی سەربەخۆ و دەڵێ‌"هۆڵێكی شانۆ زۆر گرنگە هەبێ، چونكە بە دەییان گەنجی بەهرەدارمان هەیە و دەتوانن لەم بوارەدا خزمەت بكەن و ئاست و توانایی خۆیان نیشان بدەن".
نەزیرە ئیسماعیل وەكو سەتتان گەنجی تری ئەم دەڤەرە خوازیاری ئەوەیە لە كاتە بۆشەكاندا، شوێنێك هەبێ رووی تێبكات و كاتەكانی تێدا بەسەربەرێت، ئەو قوتابی دەرچووی زانكۆیە، باس لەوانە دەكات كە خاوەنی بڕوانامە و تاكو ئێستا دانەمەزراون"لەم دەڤەرە رێژەیەكی زۆر لە دەرچووانی زانكۆ و پەیمانگەكان هەن و تاكو ئێستا دانەمەزراون و بێ كار تێ دەسوڕێنەوە، باشترە سەرەتا كار بۆ دامەزراندنیان بكرێت لەلایەن ئیدارەكەوە، ئەوەی تریش بایەخدانە بە دروستكردنی پاركی زیاترە، بەتایبەت پاركەكانی هاوشێوەی شارە گەورەكانی كوردستان كە خاوەنی چەند بەشێكی خزمەتگوزاری بێ و هەروەها بایەخدان بە كردنەوەی سەنتەرێ گەشەپێدان، كە هەمیشە خولی نایاب بۆ گەنجان بكاتەوە بەبێ بەرامبەر،  چ بۆ فێربوونی زمان یاخود پەرەپێدان بە بەهرەی گەنجان لە فێربوونی ئامێری موزیك و كردنەوەی خولی جۆراوجۆر بۆ كچ و كوڕانی دەڤەرەكە" .
نەزیرە باس لە پاراستنی ژینگە و هۆشیاری و ئاشتكردنەوەی گەنجان دەكات لەگەڵ سروشت و دەڵێ‌"بە پێویستی دەزانم تیمێكی باش و پڕ ئەزموون لە سۆران بوونی هەبێت، بۆ ئاشتكردنەوەی گەنجان بە سروشت، مانگانە ئەم تیمە لەگەڵ كۆمەڵێ گەنج، گەشت بۆ ناو سروشت ئەنجام بدەن و كات لەگەڵ جوانییەكانی سروشتی ناوچەكە بەسەر ببەن بۆ ئارامبوونەوەی دڵ و دەروونیان".

 

زۆرترین بینراو