ئیدارەی سۆران پێویستی بە خانەی بێ سەرپەرشتانە

ئیدارەی سۆران پێویستی بە خانەی بێ سەرپەرشتانە

زاری كرمانجی- سۆران: دووریا شێروانی، چالاكوان و بەرپرسی رێكخراوی ئایلان، كە تایبەتە بە پاراستنی و چاودێری كردنی مافی منداڵان، لەم دیمانەیەدا تیشك دەخاتە سەر دۆخی ئەو منداڵانەی لە شوێنە گشتییەكان و كافتریاكان كار دەكەن، هەر وەها هۆكاری دوور كەوتنەوەی ژمارەیەك لە منداڵ لە خوێندن دەخاتەروو.

ئا/ گولستان بەهجەت: 

*  رێكخراوی ئایلان بێ دەنگە بۆ ؟
- رێكخراوی ئایلان بۆ پرسی ئافرەتان و منداڵان بێدەنگ نەبووە، بەڵام بەهۆی ئەم بارودۆخەی هاتۆتە پێشەوە وەك پێشتر كار و چالاكیمان نەبووە و هەوڵمانداوە چ وەك رێكخراو چ لەسەر ئاستی تاكە كەسی بەردەوامبین لەكارەكانمان.
* كار كردنی منداڵان لە سەر شەقام و ناوچەی پیشەسازی و شوێنە گشتییەكان بۆتە دیاردە، ئێوە هەڵوێستان چییە؟
- پرسی كاركردنی منداڵان بۆ ئێمە پرسێكی گرنگ بووە، بەجۆرێك  كە هەوڵمانداوە ئەم دیاردەیە كەمبكرێتەوە بە هاوكاری لایەنی پەیوەندیدار، بەڵام بەهۆی بەردەوامی پەستانخستنە سەر دەروونی منداڵ لەلایەن خێزانەكانیانەوە بەداخەوە ئەم دیاردەیە بوونی هەیە و سەرەڕای  نالەباری بارودۆخی ئابووری لەم كاتەدا منداڵ بووەتە قوربانی.  
* رێژەی دابڕانی منداڵان لە خوێندن خەریكە بەرز دەبێتەوە، ئەمە پەیوەندی بە چیەوە هەیە و چی بكرێت باشە ؟
- دابڕانی منداڵان لەخوێندن هۆكارەكەی بۆ دانانی كەسی نەشیاوە لە ئەرك و راپەڕاندن، و بێ بەهابوونی بڕوانامەكانە، هەروەها كاریگەری واستەكردن و نەمانی خواستی فێربوونە.
لە بەرامبەردا خواستی كات بەسەربردن و ئاڵوودە بوون بە یارییە ئەلیكترۆنییەكان لە زیادبوونە و لاواز بوونی باری دارایی هاووڵاتییان وادەكات منداڵان لەبری خوێندن بۆ كاسبی و نان پەیداكردن راستەڕێ بكرێن.
* رێژەیەكی زۆر لە مێرمنداڵان لەكافتریاكان دەبیندرێن ئایا ئەمە مەترسی لەسەر پەروەردە و بە لاڕێ دابردنی مێرمنداڵان نییە ؟
- هەبوونی مێرد منداڵان لە كافتریاكان نەبوون و نەچەسپاندنی یاسایە وەك خۆی، ئەمەش خاوەن كافتریاكان بەرپرسیاری یەكەمن لە ڕۆڵەی داهاتووی ئەم گەلە، دواتر لایەنی پەیوەندیدار كە ئەمەش داهاتووی دەسەڵاتی كوردی و كۆمەڵگە و بەها ئەخلاقییەكانیش دەخاتە مەترسییەوە، چونكە ئەم شوێنانە ڕێخۆشكەرن بۆ بەلاڕێدا بردنی مێرد منداڵان و لاوازكردنی كەسایەتیان و داڕمانی بناغەی پەروەردەییان.  
* لە سۆران لانەی بێ سەرپەرشتان نییە، لە كاتێكدا ژمارەیەك منداڵی بێ سەرپەرشت لە سنووری ئیدارەی سەربەخۆی سۆران هەن، و لە لایەن كەسانێكەوە بەخێو دەكرێن كە هەم منەتیان بەسەرەوە دەكەن هەمیش وەك پێویست هاوكاریان نین ، ئێوە پێتان باشە چی بكرێت بۆ ئەم بابەتە؟
- هەبوونی لانەی بێسەرپەرشتان ئەركی هەرە لەپێشینەی لایەنی پەیوەندیدارە، بۆ بونیادنانی تاكێك خزمەت بە داهاتووی خۆی و وڵاتەكەی بكات و ببێتە جێی شانازی كۆمەڵگە، چونكە بەڕاستی حكومەتی كوردی ئەوەی لەم كاتە پێویستی پێیەتی بونیادنانی مرۆڤایەتییە و ڕێكخستنەوەی كۆمەڵگەیە، بەرزی بیناكان بەبێ وجودی مرۆڤێك بەمانای مرۆڤایەتی لەناویدا بێ سوود و بێ بنەمایە.
* هەست بەجۆرێك لە دابڕان دەكرێت لە نێوان رێكخراوەكان ئەمە هۆكارەكەی بۆ چی دەگەرێتەوە و چی بكرێت باشە ؟
- دابڕانی رێكخراوەكان كەمتەرخەمی لایەنی پەیوەندیدارە و نەبوونی دەستەیەكی سەروەرە بۆ كۆكردنەوەی ڕێكخراوەكان و ئیدارەدانیان و هەندێكجاریش بۆ خەمساردی و جیاوازی ئامانجی رێكخراوەكانی دەگەڕێنمەوە بەڕای من یەكخستنەوەی ڕێكخراوەكان لە یەك خاڵ و ئامانج كە خزمەتكردنە لەبواری جیاوازدا كارێكی گەلێك پێویست و لەجێی خۆیەتی .

زۆرترین بینراو