ئیدارەی سۆران دەستی ئاوەدانی دەگەیەنێتە دەڤەری باڵەكایەتی

ئیدارەی سۆران دەستی ئاوەدانی دەگەیەنێتە دەڤەری باڵەكایەتی

كەریم سمكۆ - چۆمان:
ئیدارەی سەربەخۆی سۆران پڕۆژە خزمەتگوزارییەكانی دەگەیەنێتە سەنتەری ناحیە و گوندەكانی دەڤەری باڵەكایەتی و لە بەرنامەیدایە گرنگییەكی باشتر بە ناوچە دوورە دەستەكان بدات و دەستی ئاوەدانییان بۆ رابكێشێت.
لە ماوەی رابردوو، لە لایەن كابینەی نۆیەمی حكومەتی هەرێمی كوردستان بە سەرۆكایەتی مەسروور بارزانی، سۆران كرا بە ئیدارەیەكی سەربەخۆ تا هاوشێوەی پارێزگە مامەڵەی لەگەڵ بكرێت و لە مەودووا ئاسانكاری باش لە كار و باری كارگێڕی بۆ هاووڵاتییانی هەر چوار قەزای دەڤەری سۆران دروست دەبێت و حكوومەتی خۆجێیش دەستی واڵاترە بۆ ئەنجامدانی پڕۆەی زیاتر، دووای دروست بوونی ئیدارەی سەربەخۆ، ژمارەیەك پڕۆژەی خزمەت گوزاری گەێندرانە باڵەكایەتی. 
تەها ئەحمەد، هاووڵاتییەكی دانیشتووی ناحیەی سمیلانە و بۆ زاری كرمانجی ئاماژەیدا: كابینەی نۆیەم گرنگییەكی باشی بە رێگاوبانەكان داوە، لەگەڵ ئەم پڕۆژانەش رێگای ناو ناحیەی سمیلان قیرتاو دەكرێت، ئەمە بەلای ئێمەوە زۆر گرنگە، هیوادارم حكوومەتی هەرێم لەم كارە باشانەی بەردەوام بێت و زیاتر بپڕژێتە سەر چارەسەركردنی كەموكوڕەییەكان و پەرەدان بە كەرتی كشتوكاڵی و گەشتیاری كە ناوچەكە زۆر گونجاوە پڕۆژەی كشتوكاڵی و گەشتیاری تێدا ئەنجام بدرێت.
بەهرام محەمەد، دانیشتووی ناحیەی حاجی ئۆمەرانە و بۆ زاری كرمانجی دەڵێت: گرنگی ئەم پڕۆژانە خۆی لەوە دەبینێتەوە كە پێداویستییەكی هەرەلەپێشی هاووڵاتییانی ئەم سنوورانەن، واتا پێشتر ئێمە كێشەمان هەبوو لەرووی كۆنكرێتكردنی كووچە و كۆڵانەكان، لە رێگاوبانەكان، بەڵام ئێستا لەگەڵ جێبەجێكردنی ئەم پڕۆژانە ئەو كێشانە چارەسەر دەبن، بەڵام پێویستە حكوومەتی هەرێمی كوردستان ئاوڕی جددیتر لە حاجی ئۆمەران بداتەوە لەبەر دوو هۆكار: یەكەم: حاجی ئۆمەران یەكەم شارەدێی سەر سنوورە و رێگای سنووری نێودەوڵەتی حاجی ئۆمەران بەناو بازاڕی ناحیەدایە و رۆژانە كامیۆن و بارهەڵگرەكان بەناو بازاڕی ناحیەكەدا تێپەڕ دەبن، كە پێویستە رێگای سنوور جیا بكرێتەوە و گرنگی زیاتر بەم شارەدێیە بدرێت.
دووەم: بەهۆی پێگە شۆرشگێڕییەكەی حاجی ئۆمەران لەشۆرشەكانی گەلی كوردستان و بەتایبەتی شۆرشی ئەیلوول و گوڵان، مەڵبەندی بەرخۆدان و قوربانییەكی زۆری داوە و پێویستە گرنگی زیاتر بە ژیانی خەڵكی ئەم ناوچانە بدرێـت و راستە شت كراوە، بەڵام ئێمە چاومان لە كاری باشترە بۆمان بكرێت.
لای خۆیەوە، هەڵگورد شێخ نەجیب، سەرپەرشتیاری ئیدارەی سەربەخۆی سۆران بە زاری كرمانجی راگەیاند: لەچەند رۆژی رابردوو بۆ دانانی بەردی بناغەی كۆمەڵێك پڕۆژەی گرنگ لەگەڵ قائیمقامی چۆمان و بەڕێوەبەری ناحیەكان سەردانی هەر چوار ناحیەكانی (گەڵاڵە، سمیلان، قەسرێ، حاجی ئۆمەران)نمان لە سنووری قەزای چۆمان كرد، ئەم پڕۆژانە راستەوخۆ لەژێر چاودێری ئیدارەی سەربەخۆی سۆران جێبەجێ دەكرێن و دەمانەوێ دەستی ئاوەدانی و بەجێگەیاندنی پڕۆژە خزمەتگوزارییەكان لە ناوچە دوورەدەستەكانیش زیاتر بكەین بۆ ئەوەی ئەم پڕۆژانە ببنە هۆكاری ئاوەدانی گوند و لادێكان و خزمەتكردنی هاووڵاتییانی ئەم سنوورانە، لە بەرنامەشماندایە لە داهاتوودا پڕۆژەی زیاتر بۆ ئەو ناوچانە جێبەجێ بكەین.
گووتیشی: بودجەی پڕۆژە خزمەتگوزارییەكان بریتییە لە 1 میارد و 300 ملیۆن دینار، ئێستا پڕۆژەكان لەلایەن كۆمپانیای جێبەجێكار كاریان تێدا دەكرێت، هەوڵ دەدەین پێش ئەوەی وەرزی سەرما و سۆڵە دەستپێبكات، پڕۆژەكان تەواو بكەین.
وەك هەڵگورد شێخ نەجیب ئاماژەی بەوەكرد، پڕۆژەكان زیاتر خۆی لە دروستكردنی رێگاوبانەكان و پڕۆژەی كۆنكرێتكردنی شەقام و كۆڵانەكان و دروستكردنی جۆگەی كراوە و قیرتاو كردنی رێگا گشتییەكانی ناو سەنتەری ناحیەكان دەبینێتەوە، لەگەڵ دروستكردنی دیواری پاڵپشت و قەنتەرە. راشیگەیاند: "لە هەندێك ناوچەش پڕۆژەی ئاوی خواردنەوەی ماڵانیش لەخۆ دەگرێت كە مەبەستمانە لە رێگای ئەم پڕۆژانە درێژە بە كاروانی ئاوەدانی كوردستان بدەین، كە ئەمە لە كارە لەپێشینەكانی كابینەی نۆیەمی حكوومەتی هەرێمی كوردستانە".
شایەنی باسە، لەدوای راگەیاندنی ئیدارەی سەربەخۆی سۆران، جێبەجێكردنی ئەم پڕۆژانە لە سنووری دەڤەری باڵەكایەتی دەبنە یەكەم پڕۆژەی خزمەتگوزاری كە راستەوخۆ لەژێر چاودێری ئیدارەی سەربەخۆی سۆران جێبەجێ دەكرێن و گوژمەی تایبەتیان بۆ تەرخان كراوە.

 

زۆرترین بینراو