ئینێركی هیچ یاریزانێكی ریالی بانگهێشت نەكردووە 

ئینێركی هیچ یاریزانێكی ریالی بانگهێشت نەكردووە 

زاری كرمانجی- ئاژانسییە هەواڵییە وەرزشییەكان: لویس ئێنركی، راهێنەری هەڵبژاردەی ئیسپانیا، لیستی یاریزانانی هەڵبژاردەكەی بۆ جامی نەتەوەكانی ئەوروپا راگەیاند و هیچ یاریزانێكی یانەی ریال مەدریدی تێدانیە.
ئێنریكی ناوی 24 یاریزانی بۆ نوێنەرایەتیكردنی هەڵبژاردەی ئیسپانیا، لە یارییەكانی جامی نەتەوەكانی ئەوروپا راگەیاند، بەشێوەیەكی چاوەڕواننەكراو ناوی هیچ یاریزانێكی یانەی ریال مەدرید لە لیستی لارۆخادا نیە، كە ئەمە یەكەمجارە لە سەددەی 21 هەڵبژاردەی ئیسپانیا بەبێ هیچ یاریزانێكی ریال مەدرید بەشداری لە پاڵەوانێتییەكی فەرمیدا بكات.
میدیای ئیسپانیا رەخنەی تووندی لە بڕیاری لویس ئێنركی گرتووەو دەڵێن" بانگهێشتنەكردنی سێرجیۆ رامۆس بۆ یارییەكانی یۆرۆ كارەساتێكی گەورەیە".
لەكاتێكدا چاوەڕواندەكرا هەریەكە لە رامۆس و ناچۆ بانگهێشتی هەڵبژاردەكە بكرێن، بەڵام هیچ یەكێك لەو دوو یاریزانە بانگهێشت نەكراون.
بڕیارێكی دیكەی سەرنجڕاكێش لە ریزەكانی هەڵبژاردەی ئیسپانیا، بانگهێشتكردنی ئێمریك لاپۆرت، بەرگریكاری بە رەچەڵەك فەڕەنسی و یانەی مانچێستەر سیتیە، كە لە ماوەی رابردوودا لەلایەن دیدێ دیشامپ، راهێنەرەی فەڕەنساوە پشتی پێنەبەستراوە و ئەویش بڕیارییدا بۆ هەڵبژاردەی ئیسپانیا یاری بكات.
یارییەكانی جامی نەتەوەكانی ئەوروپای 2020 كە بەهۆی كۆرۆناوە بۆ ئەم هاوینە دواخراون 11ی مانگی داهاتوو دەست پێدەكات، هەڵبژاردەی لارۆخا لە كۆمەڵەی پێنجەم بەرامبەر سوێد، پۆڵەندا و سلۆڤاكیا یاری دەكات.

زۆرترین بینراو