نەتەوە یەکگرتووەکان: هێرشەکەی سەر هەولێر سووکایەتیکردنە بە سەروەریی یاسا

نەتەوە یەکگرتووەکان: هێرشەکەی سەر هەولێر سووکایەتیکردنە بە سەروەریی یاسا

زاری كرمانجی -  نێردەی تایبەتی سکرتێری گشتیی رێکخراوی نەتەوەیەکگرتووەکان لە عێراق لەبارەی هێرشەکەی شەوی رابردووی سەر هەولێر رایدەگەیێنێت، "ئەو کردارانە وڵاتەکە بەرەو ئاراستەیەکی نادیار دەبات، لە کاتێکدا گەلی عێراق بەرزترین باجی ئەم هێرشانە دەدات".

جێنین پلاسخارت، نێردەی تایبەتی سکرتێری گشتیی رێکخراوی نەتەوەیەکگرتووەکان لە عێراق لە تویتێکدا رایدەگەیێنێت، "ئەم هێرشە بەردەوامانە، وەک ئەوەی دوێنێ شەو بۆ سەر هەولێر کە دووبارە بوونەتەوە، سووکایەتیکردنە بە سەروەری یاسا." هەروەها دەشڵێت، "نابێت رەوایەتی دەوڵەت بکەوێتەژێر هەڕەشەی گرووپە چەکدارە دڵرەقەکان".

بە گوێرەی زانیارییەکانی دژە تیرۆری کوردستان و ئەو راگەیێندراوەکەی دژەتیرۆر بڵاویکردووەتەوە، هێرشەکە کاتژمێر 11:30 خولەکی شەوی سێشەممە 06-07-2021 بە فڕۆکەی بێفڕۆکەوانیی بۆمبڕێژکراو هێرش کراوەتەوە سەر فڕۆکەخانەی نێودەوڵەتیی هەولێر.

دژەتیرۆری هەرێمی کوردستان ئاماژە بەوەش دەدات، هێرشەکە هیچ زیانێکی گیانی و ماددی نەبووە، تەنها ئاگر لە پووش و پەڵاش کەوتووەتەوە و تیمەکانی ئاگرکوژێنەوەش سەرقاڵی کۆنتڕۆڵکردنی ئاگرەکەن.

دوای هێرشەکە، واین مۆرۆتۆ، گوتەبێژی هێزەکانی هاوپەیمانیی نێودەوڵەتیی دژی داعش لە تویتێکدا رایگەیاند، لە هێرشەکەی سەر هەولێردا، یەک درۆن بەکارهێنراوە.

واین مۆرۆتۆ نووسیویەتی: "بەگوێرەی راپۆرتە سەرەتاییەکان، بە نزیکەیی کاتژمێر 11:15ی شەو، یەک فڕۆکەی بێفڕۆکەوان بەر بنکەی سەربازیی هەولێر کەوتووە لە عێراق. لەم کاتەدا راپۆرتە سەرەتاییەکان ئاماژە بە هیچ بریندار، کوژراو یان زیان ناکەن."

زۆرترین بینراو