مووچەی سەدان كەمئەندامی دەڤەری سۆران دەگەڕێندرێتەوە

مووچەی سەدان كەمئەندامی دەڤەری سۆران دەگەڕێندرێتەوە

بەهۆی ئەنجامدانەوەی لێژنەكانی پزیشكی مووچەی زیاتر لە هەشت سەد كەمئەندامی دەڤەری سۆران راگیرابوو، دوای ناڕەزایی و تانای بەشێك لەم كەمئەندامانە جارێكی دیكە پشكنینیان بۆ ئەنجامدرا و مووچە بۆ سەدان لەم كەمئەندامانە گەڕێندرایەوە.
زیرەك قادر، بەرپرسی بەشی چاودێری كەمئەندامان، لە بەڕێوەبەرایەتی چاودێری و گەشەپێدانی كۆمەڵایەتی سۆران، بە زاری كرمانجی راگەیاند " سنووری بەڕێوەبەرایەتییەكەمان هەرچوار قەزاكانی (سۆران، مێرگەسۆر، چۆمان، رواندز) تا دەوروبەری ناحیەی هەریر لەخۆدەگرێت، كە نزیكەی 6 هەزار و 500 كەمئەندام لەم سنوورانە ناویان تۆماركراوە و مووچەی مانگانەیان پێدەدرێت، هەروەك لە چەند مانگی رابردوودا لەكاتی ئەنجامدانەوەی لێژنەی پزیشكی بۆ ئەم كەمئەندامانە، بەهۆی بەدەست نەهێنانی رێژەی پێویست، مووچەی زیاتر لە 850 كەمئەندام راگیرا، دوای ناڕەزایبونیان و تانەدان لە لێژنەكان، جارێكی دیكە پشكنینی پزیشكیان بۆ كرایەوە، لە ئەنجامدا 615 كەمئەندام جارێكی دیكە لە لێژنەی پزیشكی دەرچوونەوە".
ئاماژەشی بەوەدا " ئەم كەمئەندامانەی كە دووبارە لە لێژنەكانی پزیشكی دەرچوونە، بە لیستێكی جیاواز لەم هەفتەیە مووچەكانیان پێدەدرێت، سەبارەت بە قەربووكردنەوەی ئەم چەند مانگەی پێشتریش چاوەڕوانی رێنمایی سەروی خۆمانین.
لەلایەن خۆیەوە یوسف چاوشین، بەڕێوەبەری گشتی چاودێری و گەشەپێدانی كۆمەڵایەتی هەولێر، بە زاری كرمانجی ڕاگەیاند " تەواوی پرۆسەكانی پشكنینی پزیشكی كەمئەندامان و وردبینی كردنەوەیان لە لایەن وەزارەتی كار و كاروباری كۆمەڵایەتی كۆتایی پێهات و كەمئەندامانی دەرچوو لە لێژنە پزیشكیەكان لەو هەفتەیە مووچەی خۆیان وەردەگرن".
گووتیشی " بۆ سەرخستنی ئەو پرۆسەیە هەوڵ و ماندووبوونێكی زۆر درا و وەزارەتی كار بە هاوكاری لێژنە پزیشكییەكان رۆژانی پشوومان خستە سەر رۆژانی دەوام و ماندوونەناسانە كارمان كرد، تا دواجار توانیمان زیاتر لە 13 هەزار كەمئەندام بە مافەكانیان شاد كەینەوە.

زۆرترین بینراو