ئەمڕۆ ئۆكراینا بەرامبەر ئینگلیز قسەی خۆیان هەیە

ئەمڕۆ ئۆكراینا بەرامبەر ئینگلیز قسەی خۆیان هەیە

زاری كرمانجی- ئاژانسییە هەواڵییە وەرزشییەكان: هەڵبژاردەی چیك ئەگەرچی بە بردنەوەی لە هۆڵەندا گەیشتۆتە قۆناغی هەشت، بەڵام دەبێ لەو دانیماركە بترسێت كە بە 4 گۆڵی بێ بەرامبەر هەڵبژاردەی وێڵزی لە قۆناغی 16 دەركردووە، كە بێگومان دوای ئەو سەركەوتنە دانیماركییەكان زۆر متمانەیان بەخۆیانە بۆ ئەوەی زیاتر بچنە پێشەوە.
ئەمڕۆ كاتژمێر 7 ی ئێوارە بە كاتی باشووری كوردستان، لەسەر یاریگەی باكوی ئۆڵیمپی لە ئازەربایجان، چیك رووبەڕووی دانیمارك دەبێتەوەو شەڕ لەسەر بلیتێكی قۆناغی هەشت دەكەن.
سەرەتای دانیماركییەكان لە پاڵەوانێتییەكەدا كارەسات بوو، بەتایبەتی كە تواناكانی كریستیان ئێریكسنی ئەستێرەیان بەرامبەر فینلەندا لەدەستدا، كاتێك لەنێو یاریگەدا تووشی جەڵتەی دڵ بوو، بەڵام دواتر رێگەی راستیان دۆزییەوەو بە ورەیەكی بەرزەوە بەرامبەر چیك یاری دەكەن، وادیارە دانیماركییەكان ئامانجی گەورەتریان هەیە، بۆیە سیمۆن كایەری كاپتنیان لە كۆنگرەی رۆژنامەوانیدا گووتی" ئەركی ئێمە هێشتا كۆتایی نەهاتووە، نازناوەكە هێشتا زووە قسەی لەسەر بكەین، بەڵام ئێمە دەستبەرداری ئامانجەكەمان نابین".
ئەمە مانای ئەوە نییە كە چیكەكانیش بە سەركردایەتی پاتریك شیك بێ هیوابن، بەڵكو ئەوانیش یەكێك لە تیپە گەورەكانیان لە پاڵەوانێتییەكە دەركردووەو هەر تیپێك لە  هۆڵەندا بباتەوە، پێویستە بەرامبەرەكەی هەزار و یەك حسابی بۆ بكات.
لە یاری دووەمدا پێشبینییەكان لە بەرژەوەندی ئینگلتەرادان بۆ بڕینی بەربەستی ئۆكرایناو پەڕینەوە بۆ چوارگۆشەی زێڕین، كاتێك هەردوو هەڵبژاردە لەسەر یاریگەی ئۆڵیمپیكۆ لە رۆمای پایتەختی ئیتاڵیا دوایین یاری قۆناغی هەشت دەكەن.
ئینگلتەرا تا ئێستا نەدۆڕاوەو تەنانەت گۆڵیشی لێ تۆمارنەكراوە، لە قۆناغی 16 دا ئەڵمانیای كردە دەرەوە، لە كاتێكدا ئۆكراینا دووجار دۆڕاوەو تاكە تیپی نێو سێیەمی كۆمەڵەكان بوو كە بە 3 خاڵ سەربكەوێت، لە قۆناغی 16 شدا بە سوودوەرگرتن لە دەركردنی یاریزانێكی سوێد لە دوایین خولەكی نیوەی دووەمی زیادكراودا گەیشتە قۆناغی هەشت.
هەر چۆنێك بێت، ئینگلتەرای سێیەمی ریزبەندی فیفا لەسەر كاغەز بەربژێرە بۆ بردنەوە لە ئۆكرینای 24 ەمینی ریزبەندی فیفا، بەڵام لەنێو یاریگەدا بارودۆخەكە جیاواز دەبێت و ئۆكراینییەكان دەكرێت سوپرایزیان بۆ ئینگلیز هەبێت، ئەگەر بێتو كوڕانی شێڤچینكۆ بە رۆح و بە گیان یاری بكەن، وەك خۆی گووتی" هیچ شتێك مەحاڵ نیە"، بەتایبەتیش كە ئینگلیزەكان ئەمجارە لەنێو وێمبلی و بەرامبەر هاندەرەكانیان یاری ناكەن.
ئاندرێ شێڤچینكۆ، راهێنەری هەڵبژاردەی ئۆكراینا، بە متمانە بەخۆبوونێكی زۆرەوە رایگەیاند"یاریزانەكانم ئامادەن بۆ رووبەڕووبوونەوەی هەڵبژاردەی ئینگلتەرا و ئەوان تیپێكی بەهێزن، بەڵام ئێمەش بەهێزین".
ئاندرێ شێڤچینكۆ، راهێنەری هەڵبژاردەی ئۆكراینا، لە كۆنگرەی رۆژنامەوانی بەر لە یارییەكەدا قسەی بۆ رۆژنامەوانان كردو گووتی" دەزانم ئێمە رووبەڕووی هەڵبژاردەیەكی بەهێز دەبینەوە، پێموایە یەكێكە لە باشترین هەڵبژاردەكانی یۆرۆ، لە هەمووشیان رێكخراوتر و هاوسەنگترە".
ئەو راهێنەرەی ئۆكراینا لە بەردەوامی قسەكانیدا، ئاماژەی بۆ ئەوەكردو گووتیشی" ئەوان كۆمەڵێك یاریزانی بەتواناو جیاوازیان هەیە، دەمەوێ لێرەوە پیرۆزبایی لە ساوسگەیت بكەم بۆ ئەو كارە باشەی تا ئێستا لەگەڵ تیپەكەی كردوویەتی".
شێڤچینكۆ زیاتر گووتی" ئینگلتەرا ئێستا بە باشترین كاتەكانیدا تێدەپەڕێت و لە گۆڕان و بەرەو پێشوەچوونێكی بەردەوامدایە".
راهێنەری هەڵبژاردەی ئۆكراینا، لە كۆتایی قسەكانیدا، گووتیشی" ئەم یارییە زەحمەتترین یاری دەبێت بۆ ئێمە، كە بەرامبەر هەڵبژاردەیەكی جیاوازە، ئێمە لە پاڵەوانێتییەكەدا كەسایەتی خۆمان نیشانداوە، لە زیاتر لە یارییەكدا شێوازی یارییكردنی خۆمانمان سەپاندووە، سەرەڕای زەحمەتی یارییەكە متمانەم بە كەسایەی تیپەكەم و یاریزانەكانم هەیە".

زۆرترین بینراو