عێراق دۆڕایە ئێران و سەركەوت بۆ قۆناغی داهاتوو

عێراق دۆڕایە ئێران و سەركەوت بۆ قۆناغی داهاتوو

زاری كرمانجی- ئاژانسییە هەواڵییە وەرزشییەكان: هەڵبژاردەی عێراق یارییە گرنگەكەی بە هەڵبژاردەی ئێران دۆڕاند، بەڵام سەرەڕای ئەوەش گەیشتە قۆناغی كۆتایی پاڵاوتنەكانی كیشوەری ئاسیا بۆ مۆندیالی 2022 ی قەتەر.
لە یاریی لووتكەی گەڕی هەشتەم و كۆتایی پاڵاوتنەكانی كیشوەری ئاسیا بۆ مۆندیالی 2022 هەڵبژاردەی عێراق و ئێران لە بەحرەین رووبەڕووی یەكتر بوونەوەو یارییەكە لە بەرژەوەندی ئێرانییەكان بە گۆڵێكی بێبەرامبەر كۆتایی هات.
تاكە گۆڵی یارییەكە لە لایەن سەردار ئەزموونی هێرشبەری ئێرانی لە خولەكی 35 ی یارییەكە تۆماركرا.
بەم سەركەوتنە، هەڵبژاردەی ئێران تا بەر لەم یارییە بە 15 خاڵ لە پلەی دووەمی ریزبەندیی كۆمەڵەكە بوو، بە 18 خاڵ پێشەنگی لە عێراقی خاوەن 17 خاڵ وەرگرت و گەیشتە قۆناغی كۆتایی پاڵاوتنەكانی ئاسیا بۆ مۆندیالی 2022، بەڵام هەڵبژاردەی عێراقیش وەك یەكێك لە باشترین دووەمەكان بلیتێكی قۆناغی كۆتایی بەدەستهێنا.
بەر لەم یارییە بە چەند رۆژێك میدیاو یاریزانانی ئێران جیاواز لە هەموو یارییەكانی دیكە شەڕیان بەرامبەر عێراق راگەیاندبوو، رۆژنامەكانی ئێران دەیانگووت" ئەمە یاری ژیانە بۆ هەڵبژاردەكەیان"، یاریزانەكانیشی كۆك بوون لەسەر ئەوەی وانەیەكی مێژووی بدەنە عێراق، توانیشیان سەركەوتووبن.
بەڵام یاریزانانی پاڵەوانی ئاسیای 2007 ئارامتر لە ئێرانییەكان سەیری ئەم یارییەیان دەكرد، چونكە گوشارێكی ئەوتۆیان لەسەر نەبوو، لەبەرئەوەی بە یەكسانبوون و بردنەوە دەگەیشتنە قۆناغی كۆتایی پاڵاوتنەكان و تەنانەت لە كۆتاییدا بە دۆڕاندنیش گەیشتنە قۆناغی كۆتایی.
بۆ هاندانی زیاتری یاریزانەكانی لەپێناو بردنەوەی یارییەكەدا، یەكێتی تۆپی پێی ئێران بڕیاری دابوو 5 هەزار دۆلار وەك پاداشت بداتە هەر یەكێك لە یاریزانەكانی و ئەندامانی شاندەكە ئەگەر لە یارییەكەدا بردنەوە بەدەستبێنن، چونكە هەڵبژاردەكە جگە لە بردنەوە هیچ رێگەیەكی دیكەی لەپێش نەبوو بۆ گەیشتن بە قۆناغی داهاتوو، كەواتە هەر یاریزانێكی ئێران 5 هەزار دۆلاری بەدەستهێنا.

 

زۆرترین بینراو