داوا دەكەن ئاڵایەكی بەرز لە ناو فلكەی سەرەكی بازاڕی سۆران بچەقێندرێت

داوا دەكەن ئاڵایەكی بەرز لە ناو فلكەی سەرەكی بازاڕی سۆران بچەقێندرێت


ئا/ گولستان بەهجەت: 

بەرپرسی دەزگای پاراستنی ئاڵای كوردستان لە سنووری ئیدارەی سەربەخۆی سۆران، باسی لە پڕۆژەی هەڵدانی گەورەترین ئاڵای لە فلكەی سەرەكی ناو بازاری سۆران كردن هەروەها گووتی زیاتر لە 50 هەزار ئاڵامان لە سۆران دابەشكردووە.
نورەددین عەبدوڵقادر دری،  بە زاری كرمانجی گووت " ئەركی سەرەكی دەزگاكەمان بریتییە لە چاودێری كردنی ئاڵای پیرۆزی كوردستان، بۆ ئەوەی لە سەر دامەزراوە فەرمییەكانی حكومی، نا حكومی، رێكخراوەكان و كۆمپانیاكان بە شێوەیەكی رێز لێندراو بپارێزێت، لەبەر ئەوەی لە ژێر ئەم ئاڵایە و لە پێناو سەربەرزی ئەم نەتەوەیە هەزاران رۆڵەی نیشتیمان بوونەتە قوربانی، هەروەها ئاڵا لە نێو هەموو نەتەوەكان ئاماژەی شكۆمەندی و هەیبەت و ناسنامەیانەن بۆیە ناشێ لە كوردستان بابەتی رێزگرتن لە ئاڵا بە هەند وەرنەگیرێت".
 لە بارەی هاوكارییەكانی دەزگاكەیانەوە بەرپرسی دەزگاكە گووتی " تا ئێستا ئێمە وەك خۆبەخش ئەركی پاراستنی ئاڵامان لە ئەستۆ گرتووە، بەڵام لە هەموو بۆنە و یادەكانی نەتەوەی یا ئاسایی بە هاوكاری كۆمەڵێك كەسی نیشتمانپەروەر ئاڵامان بۆ دابینكراوە، بە تایبەتی لە سنووری ئیدارەی سەربەخۆی سۆران".
زیاتر روونیكردەوە" بەهۆی چاودێری كردنی ئێمەوە بەسەر دامەزراوەكان تا ئاڵای كوردستان لەسەر باڵەخانەكەیانەوە بێرەنگ و كاڵ نەبێتەوەو نەدرێت، ئێستا ئاڵای كوردستان زۆر بە بەرزی و هیبەتەوە دەشەكێتەوە".
لە بارەی ژمارەی ئەو ئاڵایانەی تا ئێستا دابەشیانكردوون، نورەددین دری، گووتی" تەنها لە كاتی رێفراندۆمی سەربەخۆی كوردستان بە سەرۆكایەتی جەنابی سەرۆك بارزانی زیاتر لە 38 هەزار ئاڵامان دابەشكرد، لە دوای ئەوەش تا ئێستا زیاتر لە 20 هەزار ئاڵای دیكەمان دابەش كردووە، جگە لەمانەش لە دەروازەی شاری سۆران و فلكەی ئاڵا دەیان ئاڵامان بەستوونی مەزن هەڵواسیون هەروەها پڕۆژەی چەقاندنی ئاڵا بە ستوونەوە لە دەروازەی رواندز لەسەر پێشنیاری ئێمە بوو".
لە كۆتایی قسەكانی بەرپرسی دەزگای ئاڵا گووتی " پڕۆژەیەكەمان پێشنیار كردووە، كە ئاڵای كوردستان بە بەرزی 24 مەتر لە ناوەندی فلكەی سەرەكی بازاڕی سۆران بچەقێنین، بەڵام چەند ساڵە ئەم پڕۆژەیەمان پێ جێبەجێ نەكراوە، لەبەر تێچووی زۆری پڕۆژەكە، هەر چەندە ستوونی ئاڵاكە ئامادە كراوە تەنها ئامادە كردنی ئاڵاكە و تێچووی بناغەی ستوونەكەی پێویستی بە سپۆنسەرە كە نەماتوانیوە بۆی دابین بكەین، لەبەرئەوەی نزیكەی (15) ملیۆن دیناری تێدەچێت، پێشنیار دەكەم، سەرۆكی ئیدارەی سەربەخۆیی سۆران ئەم بابەتە بە هەند وەربگرێت و لە رۆژی ئاڵای كوردستان و لە بۆنەیەكی شایستەدا یادەكە بە بەرزكردنەوەی ئەم ئاڵایە بەرز رابگیرێت".  
 

زۆرترین بینراو